1Ch 10 | ZomZIV | STEP | Tu-in Philistia-te in Israel a sim uh hi; amaute mai-ah Israel-te taikek uh a, Gilboa Vum ah tampi a si uh hi.

1 Chronicles 10

Saul Amah Kithat

1 Tu-in Philistia-te in Israel a sim uh hi; amaute mai-ah Israel-te taikek uh a, Gilboa Vum ah tampi a si uh hi. 2 Saul le a tapate nung panin Philistia-te in phadong lua uh a, a tapate Jonathan, Abinadab le Malkisshua a that uh hi. 3 Saul kimkotah kidona nasia lua-a, thal tawite in amah a phak uh ciangin a liamsak uh hi.

4 Saul in a galvan puapa kiangah, “Na namsau dok inla kei hong dawtlet in tua hi kei leh hih vun-at lohte hong pai-in kei hong khelbawl ding uh hi,” a ci hi.

Ahi hangin a galvan puapa lau-in a hih ngam kei hi; tua ciangin Saul in ama namsau dokin a tungah a puk hi. 5 A galvan puapa in Saul sih a muh ciangin amah zong a namsau tungah pukin a si hi. 6 Tua bangin Saul le a tapa thumte le a innkuan khempeuh un a sikhawm uh hi.

7 Kuam sunga om Israel-te khempeuh in Israel galkapte taikek khina, Saul le a tapate sih a muh uh ciangin a khuapite uh nusia-in a taikek uh hi. Tua ciangin Philistia-te pai uh a tuate a va luah uh hi.

8 A zing ciangin Philistia-te misi van hawkkhia dingin a pai uh ciangin Gilboa Vum ah Saul le a tapa thumte a sisa-a om a mu uh hi. 9 Amaute in a nate uh hawkkhia-in a lutang le a galvante la uh a, Philistia gam buppi, amau milimte le amau mite lakah tua thu tangko dingin kamtaite a sawl uh hi. 10 Amaute in ama galvante a pasiante uh biakna inn ah koihin Dagon biakinn ah a lutang a khai uh hi. ^a

11 Philistia-te in Saul a bawlna uh Jabesh Gilead a tengte khempeuh in a zak uh ciangin 12 a galhangte khempeuh uh kuanin Saul le a tapate luangte la uh a, Jabesh ah a pua uh hi. Tua ciangin amaute guhte Jabesh a suang lianpi nuai-ah phum uh a, ni sagih sung an a tang uh hi. ^b

13 TOPA tungah Saul muanhuai lo ahi manin a si hi; amah in TOPA thu zui lo-a, a lamlak dingin vankahte nangawn thu dongin 14 TOPA a dong kei hi. Tua ciangin TOPA in amah sisak a, Jesse tapa David tungah a kumpigam a hei hi.