1Ch 23 | ZomZIV | STEP | David tekin a kum tampi a phak ciangin, Israel tungah a tapa Solomon kumpi a suaksak hi.

1 Chronicles 23

Levi-te

1 David tekin a kum tampi a phak ciangin, Israel tungah a tapa Solomon kumpi a suaksak hi.

2 Amah in Israel makaite khempeuh siampite le Levi-te tawh a kikhawmsak hi. 3 Levi-te kum sawmthum pan a tungsiah kisim a, pasal tul sawmthum le tul giat a pha hi. 4 David in, “Hihte lak pan tul sawmnih le tul li in TOPA biakinnpi nasep uk dinga, tulgukte uliante le tukhente hi ding uh hi. 5 Tulli-te in kongpi cing ding uh a, tulli-te in tumtheihte tawh amah phat nadinga ka hihsate-in TOPA a phat ding uh hi,” a ci hi. ^a

6 David in Levi’ tapate: Gershon, Kohath le Merari-te tawh kithuah dingin Levi-te a pawlpawlin a khen hi. ^b

Gershon-te

7 Gershon-te tawh kisaite:

Ladan le Shimei.
8 Ladan tapate:
Jehiel ta upa, Zetham le Joel - a vekin thum
9 Shimei tapate:
Shelomoth, Haziel le Haran - a vek in thum.
Hihte Ladan innkuan lutangte ahi hi.
10 Tuateh Shimei tapate:
Jahath, Ziza, ^{▼▼23.10 Hebrew khutgelh khat, Septuagint le Vulgate (tg.11 ah zong en in); Hebrew khutgelh tampen in Zina} Jeush le Beriah.
Hihte Shimei tapate hi-a - a vekin li ahi hi.
11 Jahath a ta masa hi-a, Ziza a nihna, Jeush le Beriah in tapa tampi a nei kei uh hi; tua hi-a innkuan khatin kisima nasep kipiakhawm hi.

Kohath-te

12 Kohath tapate:

Amram, Izhar, Hebron le Uzziel - a vekin li. ^d
13 Amram tapate: ^e
Aaron le Moses.
Aaron le ama suante a tawntungin a siangtho pen nate ap ding, TOPA mai-ah biakna pia ding, ama mai-ah biakna nasem ding le ama minin thupha a pia tawntung dingin a kituamseh ahi hi. 14 Pasian mipa Moses tapate, Levi behte lakah a kihel hi. ^f
15 Moses tapate:
Gershom le Eliezer.
16 Gershom suante:
Shubael a upapen ahi hi.
17 Eliezer suante:
Rehabiah a upapen ahi hi.
Eliezer in tapa dang nei lo-a, ahi hangin Rehabiah tapate a tam mahmah uh hi.
18 Izhar tapate:
Shelomith a upapen ahi hi.
19 Hebron tapate:
Jeriah a khatna, Amariah a nihna, Jahaziel a thumna hi-in Jekmeam a lina ahi hi.
20 Uzziel tapate:
Micah a khatna hi-a Isshiah a nihna ahi hi.

Merari-te

21 Merari tapate: ^g

Mahli le Mushi.
Mahli tapate:
Eleazar le Kish.
22 Eleazar tapa nei loin si a; tanu bek a nei hi. Kish tapa amau sanggamte in amaute a tenpih uh hi.
23 Mushi tapate:
Mahli, Eder le Jerimoth - a vekin thum ahi hi.

24 Hihte amau innkuan tawh kizui-in Levi suante hi a, - TOPA biakinnpi sunga nasem kum sawmnih pan a tungsiah a mimalin a mina mi phazah tawh kizui-in a kiciamteh innkuan lutangte ahi uh hi. 25 Ahang in, David in, “TOPA, Israel Pasian in ama mite tawlngasaka, Jerusalem a teng dingin tungsak khin ahi nungsang 26 Levi-te in biakbuk le a sunga vanzatte khatpeuh a puak ding uh kisam nawn lo hi,” a ci hi. 27 David lamlahna a nunungpen tawh kizui-in Levi-te kum sawmnih pan a tungsiah a kisim ahi hi.

28 Levi-te nasep in TOPA biakinnpi sunga Aaron suante nasep huh ding hi a: huang sung, a panga inndeite le a siangtho nate khempeuh siantho-sakna ukin Pasian inn sunga nasep khatpeuh a sem ding uh hi. 29 Amaute in sabuai tunga kikoih anlumte, an-a biakna ding annel, silngo sawhloh anpheng, a emzia le a helzia, a phazah le a phacia a uk ding uh hi. 30 Zingsang simin TOPA tunga lungdam ko ding le amah phat dingin a ding ding uh hi. Nitak in zong tua mah bangin sem ding uh a, 31 Sabbath-te le Kha Thak pawi ni le a kiseh pawite ah TOPA tungah meihal biaknate ah zong tuamah bangin pia ding uh hi. Amaute in TOPA mai-ah a hunhunin a phazah a kisam bang le amau hih ding a kilahzia bangin a sem ding uh hi.

32 Tua ciangin Levi-te in Kikhopna Puanbuk le Mun Siangtho-te vanin, a sanggamte uh Aaron suante khutnuai-ah TOPA biakinnpi sunga nasep a sem ding uh hi. ^h