1 Chronicles 28
Biakinnpi ading David Geelnate
1David in Israel ulian khempeuh: behte a uk uliante, kumpi nasem galkap khen a uk galkap mangte, a tulte a ukte le a zate a ukte le van khempeuh le kumpipa neihsa ganhonte le a tapate a uk uliante tawh kumpi inn uliante, mi thahatte le galsiam mi hangsan khempeuh Jerusalem ah a kikhawmsak hi. 2 Kumpi David a khe in dinga: “Ka sanggamte le ka mite aw, ka thugen na ngai un. TOPA thukhun singkuangpi khawl nading le eite Pasian khe ngak nadingin mun khatah inn lam ka sawm-a, tua lam nading geelnasa ka nei khin hi. 3Ahi hangin Pasian in kei tungah, ‘Nang, ka Min adingin inn na lam kei ding hi, bang hang hiam cih leh nang galhang na hi a, sisan na luangsak hi,’ hong ci hi. a 4 “Hi napi TOPA Israel Pasian in Israel uk kumpi a hi tawntung dingin ka innkuan bup panun kei hong teel hi. A makai-in Judah teel-a, tuateh Judah innkuan panin kei innkuan teel-a, ka pa tapate panin Israel khempeuh a uk kumpi dingin kei a lungkim hi. 5Ka tapate khempeuh - TOPA in tampi hong piakte sungah - TOPA kumpi-gam kumpi tokhom ah tu-in Israel a uk dingin ka tapa Solomon a teel khin hi. 6Amah in kei tungah, ‘Na tapa Solomon ka tapa dingin ka teel khina, kei ama aa hi ding ka hi manin amah in ka inn le ka huangte a lam ding hi. 7Amah in ka thupiakte le ka thukhamte, tu huna a kizuih bangin kiheisan loin a zuih nak leh a kumpi-gam ka kipsak tawntung ding hi,’ hong ci hi. b 8 “Tua ahi ciangin tu-in TOPA mai-a kikhawm Israel khempeuh muhna le eite Pasian zaka kong sawl inah: Note in hih gam hoih nei-in note suante dongah goutanh-a a neihsuak theih nadingun TOPA note Pasian thupiakte khempeuh limtakin zui un. c 9 Tuateh nang ka tapa Solomon aw, na pa’ Pasian thei in, TOPA in lungsim khempeuh zonga ngaihsutna zui-a gamtatnate theitel ahi manin na lungsim neihzahin ki-ap inla lungsim utsa in ama na sem in. Amah na zon leh na mu ding hi; amah na taisan leh amah in a tawntungin nang hong nolh ding hi. 10Tu-in TOPA in mun siangtho ding biakinnpi khat lam dingin nang hong teel khin ahi manin ngaihsun in. Hat inla na sem in,” a ci hi. d 11 Tua ciangin David in a tapa Solomon tungah biakinnpi talaap, a innpite, a van koihna inndeite, a tungnung khente, a sungnung inndeite, le thoihdamna munte a geelna a pia hi. 12Amah in Kha in a lungsima a guat khempeuh - biakinnpi tualte, a kimkota inndeite, TOPA biakinnpi goukholnate le a ki-ap nate kholnate geelna amah a pia hi. 13Amah in siampite le Levi-te khenna lahna le TOPA biakinnpi sunga biakna nasep nading khempeuh le nasepna-a zat ding nate khempeuh, a zatzia ding khempeuh lahnate a pia hi. 14Amah in nasepna tuamtuama zat ding kham vanzatte khempeuh a gikna a tuamin koih a, nasepna a tuamtuam a zat ding ngun vanzatte gikna tuam koih in: 15kham meivak tunnate le meivakte gikna, meivak tunna le a meivak khat gikna; meivak khat tunna a zatna tawh kizui-in, ngun meivak tunna le a meivak ciat a gikna, 16anlum apna kham sabuaite a gikna ciat; ngun sabuaite ading ngun gikna; 17kham citak sikkeu-kate, tuithehna kuang-ukte le sikkeu-ka bulneite a gikna; kham kuang khat a kham gikna ciat; ngun kuang khat a ngun gikna ciat; 18le gimnamtui biakna-tau ding kham siangsa giknate a pia hi. Amah in kham cherub-te in a khate uh zalin TOPA thukhun singkuangpi a liah nadingin a geelna zong a pia hi. e 19 David in, “Hihte khempeuh lai-a kigelh ahi hi, bang hang hiam cih leh TOPA khut in kei hong ompih a, geelna khempeuh a neng a tawngin kei hong theitelsak hi,” a ci hi. f 20 David in a tapa Solomon kiangah zong, “Hat inla hangin na sem in. Pasian, TOPA keima Pasian in nang hong ompih ahi manin kihta kei inla lungkia kei in. Amah in TOPA biakinnpi sep a kizawh matengin hong lawhsamsak loin hong taisan kei ding hi. 21Pasian biakinnpi-a nasem dingin siampite le Levi-te a khenkhenin om khin uh a, khutsiamna a nei peuhmah in amau utthu-in nasep khempeuh hong huh ding uh hi. Uliante le mite khempeuh in na sawl peuhpeuh hong mang ding uh hi,” a ci hi. g
Copyright information for
ZomZIV