1Cor 14 | ZomZIV | STEP | Itna lampi tawnin khalam letsongte lawptakin na lunggulh un; adiakdiakin kamsanga thu gentheihna letsong na deih un.

1 Corinthians 14

Kamsanna le Paute Letsongte

1 Itna lampi tawnin khalam letsongte lawptakin na lunggulh un; adiakdiakin kamsanga thu gentheihna letsong na deih un. 2 Ahang in, pau khat ^{▼▼14.2 Ahikeh pau dang; tg. 4, 13, 14, 19, 26 le 27 ah zong} a thugente mi tawh kiho hi loin Pasian tawh kiho ahi hi. A taktakin kuamah in amah a theitel kei hi; ama kha ^{▼▼14.2 Ahikeh tua Kha tawh} tawh thuthukte a gen ahi hi. 3 Kam sanga thugente peuhmah in, amaute tha khauhsak ding, hanthawn ding le hehnem dingin mihing tungah thu a gen hi. 4 Pautuam khata thugente ama phattuam nading hi-a; kam sanga thugente in pawlpi a phatuamsak hi. 5 Note khempeuh paute ^{▼▼14.5 Ahikeh pau dangte, tg. 6, 8, 22, 23 le 39 ah zong} zangin thugen thei hi le uh cin ka ut hi. Ahi hangin kam sanga thugen thei hi le uhcin ka utzaw lai hi. Paute ^{▼▼14.5 Ahikeh pau dangte, tg. 6, 8, 22, 23 le 39 ah zong} zanga thugen mi in pawlpi phattuam nadingin a thugen a khiatna a gen kei leh amah sangin kam sanga thugenpa a lianzaw hi. ^e

6 Tu-in sanggamte aw, note kiangah hong pai-in paute zanga thu ka gen hangin kilaakna ahi a, theihna ahi zongin, kamsanga thugenna ahi a, thuhilhna kammal ahi zongin kong puak kei leh no adingin ka phattuamna bang om ahi hiam? 7 Nuntakna nei lo a ging thei bek nate nangawn: tamngai ahi zongin, harp ahi zongin, a bite ah khentelna om loin kiteltaka a gin kei leh bang aw in kitum hiam, cih kua in bangci theih ding ahi hiam? 8 Tua banah pengkul kiteltakin ging lo-a, a cihnopna a kitheih kei leh galsim dingin kua kithawi ding ahi hiam? 9 Note zong tua mah bang na hi uh hi. Na leii uh tawh a kitheithei kammalte na gen loh ngalun, kua in na thugen uh thei ding ahi hiam? Note huih laka thugen na suak lel ding uh hi. 10 Leitungah pau nam khempeuh a om takpi hi-a, ahi hangin khiatna nei lo khat beek a om kei hi. 11 Tua ahileh mi khatpeuh thugen bang a cihnopna hiam, cih ka theihtel theih kei leh tua thugenpa adingin gamdang mi ka suak a, kei adingin amah gamdang mi a suak hi. 12 Note zong tua mah bang na hi uh hi. Note in khalam letsongte neih ding lawp na hih nungsangun pawlpi a khangsak a ginazaw letsongte neih ding na hanciam un. ^f

13 Hih thu hangin pautuam khat zanga thugen mi in, a thugen a khiatna a theih nadingin ngen ta hen. 14 Ahang in, pautuam khat zanga thu ka nget leh ka kha-in thu ka ngen a, ahi hangin ka lungsim in gah a gah kei hi. 15 Tua ahileh bang ka cih ding hiam? Ka kha-in thu ka ngen dinga ka lungsimin zong thu ka ngen ding hi. Ka kha-in la ka sa dinga ka lungsimin zong la ka sa ding hi. 16 Na kha-in Pasian na phat leh amaute lakah na thugen, a theitel lo-a kitheite ^{▼▼14.16 Ahikeh hongkante lakah} in na lungdamkohna-a na gen a theih loh nungsang bangci-in “Ámen” ci thei ding ahi hiam? 17 Nang pen lungdam a ko takpi na hi kha ding hi. Ahi hangin midangte a phatuamsak tuan kei hi. ^h

18 Note khempeuh sangin paute zanga thu ka gen theih zawk manin Pasian tungah ka lungdam hi. 19 Ahi hangin midangte lamlak dingin pawlpi sungah pautuam khat zangin kammal tulsawm ka gen sangin a kithei kammal nga ka genzaw ding hi.

20 Sanggamte aw, naupang banga na ngaihsutnate uh tawp ta un. Gitlohna lamah naungeekte hi un; ahi hangin lungsim ngaihsutna lamah a khang hamsate na hi un. 21 Thukham sungah:

“Pau theih loh mite tungtawn le gamdang mite muk tungtawnin
hih mite tungah thu ka gen dinga
ahi hangin tua ciang nangawnin
amaute in ka thu a ngai kei ding uh hi,

Topa in ci hi,” ^{▼▼14.21 Isa. 28:11,12}
ci-in kigelh hi.

22 Tua ahi ciangin paute pen a umte ading hi loin a um lote adingin lim ahi hi. Kamsanga thugenna ahileh a um lote ading hi loin a umte ading ahi hi. 23 Tua ahi ciangin pawlpi mite a vekun hong kikhawmin, a vekun paute zangin pau le uh, a theitel ^{▼▼14.23 Ahikeh a kan pawlkhatte} nai lo pawlkhat ahi zongin, a um lo mi pawlkhat ahi zongin hong lut leh note mihai hong sa lo ding uh ahi hiam? 24 Ahi hangin mi khempeuh in kamsangin thu a gen laitakin a um lote ahi zongin, a theitel ^{▼▼14.24 Ahikeh ahi kei leh a kan pawlkhat} nai lote ahi zongin va lut leh amah mimawh ahilam mi khempeuh in phawksakin thu khen ding uh a, 25 tua ciangin a lungtang sunga thusimte a kilang ding hi. Tua ciangin amah kiko-in,” Note lakah Pasian om takpi hi!” ci-in bokin Pasian a bia ding hi.

A Kilawma Biakna Zia

26 Tua ahileh sanggamte aw, bang gen ding i hi hiam? Na kikhop uh ciangin biakna la hiam, lamlahna hiam, kilaakna hiam, pautuam khat hiam, a khiatna genna hiam, khat ciat na nei tek uh hi. Hihte khempeuh pawlpi thahatsak nadinga zat pelmawh ding ahi hi. 27 Mi khatpeuh in pautuam khat a zat leh nih ahikeh a tampen thum in genin, khatkhatin kigenkhelin khat peuhmah in kam a phen pelmawh kul ding hi. 28 Kamphen ding a om kei leh biakinn sungah thugenpa daitakin om henla amah le Pasian tungah thu gen hen. ^l

29 Kamsangte nih ahikeh thum in thu genin adangte in a thugen limtakin khaikak uh hen. 30 A tu mite khatpeuh tungah kilaakna a tun leh thugen masa pen khawl hen. 31 Ahang in, mi khempeuh lam kilakin a kihanthawn ahi theih nadingin note khempeuh in kikhelin thu na gen thei uh hi. 32 Kamsangte’ khate kamsangte ukna nuai-ah a om hi. 33 Ahang in, Pasian pen buaina Pasian hi loin lemna Pasian ahi hi. ^m

Misiangte kikhopna khempeuh bangin 34 pawlpi sungah zong numeite dai dide-in om uh hen. Amaute pau ding a kiphal kei hi; ahi hangin Thukham in a gen bangin amaute ukna nuai-ah om uh hen. 35 Amaute in thu khatpeuh a kan nop uh leh a inn ah a pasalte uh dong uh hen. Ahang in, numeite adingin pawlpi sunga thugen zumhuai hi. ⁿ

36 Pasian thu note pana kipankhia ahi hiam? Ahikeh Pasian thu tunna note bek na hi uh hiam? 37 Mi khatpeuh, kamsangpa khat ahikeh khalam letsong nei mi khatin a kingaihsut leh note kianga kong gelhte Topa thupiakin sang ta hen. 38 Amah in hih thu a thusim keileh amah a kithusim kei ding hi. ^{▼▼14.38 Khutgelh pawlkhatah Amah in hih thusim kei le, amah thusimsak dah un
,} ^p

39 Tua ahi manin ka sanggamte aw, kamsanga thugen ding na lawp unla, paute a thugen ding zong na kham kei un. 40 Ahi hangin na khempeuh a kilawm a kituaka hih ding ahi hi.