1 Kings 13

Judah Pana Pasian Mipa

1Biakna-tau gei-ah biakna pia dingin Jeroboam a din laitakin Judah panin TOPA kammal hangin Pasian mipa khat Bethel ah a va pai hi. 2TOPA kammal bangin tua biakna-tau langkhat ah otsan a: “Biakna-tau, biakna-tau aw! TOPA in: David innkuan panin Josiah min nei tapa khat a suak ding hi. Amah in tu-a hih munsang tungah biakna a pia siampite nang tungah biakna-in hong pia dinga, nang tungah mihing guhte a kihal ding hi,’ ci hi,” a ci hi. 3Tua ni mah in Pasian mipa in lim khat laka, “TOPA hong lahsa lim hih ahi hi: Biakna-tau kiphel suah dinga, a tunga vutte kibuakhia ding hi,” a ci hi. ^a

4 Pasian mipa in Bethel a biakna-tau langkhat ah a otsan lam Kumpi Jeroboam in a zak ciangin biakna-tau panin a khut zan phei a, “Amah man uau!” a ci hi. Ahi hangin mipa lama a zan ama khut keugaw-a a ton kik thei nawn kei hi. 5TOPA kammal bangin Pasian mipa limpiaksa tawh kituakin biakna-tau zong kiphelsuah a, vutte a buakhia hi.

6 Tua ciangin kumpipa in Pasian mipa kiangah, “Ka khut a ngeina a bat kik theih nadingin TOPA na Pasian tungah hong thumsak in,” a ci hi. Tua ciangin Pasian mipa in TOPA tungah thumsak-a, kumpipa khut dam kikin a ngeina a bang hi.

7 Kumpipa in Pasian mipa kiangah, “Inn ah kei tawh ton ni, bang khatpeuh ne inla letsong zong kong pia ding hi,” a ci hi. ^b

8 Ahi hangin Pasian mipa in kumpipa kiangah, “Na neihsate a lang nong pia zawzen zongin kong zui kei dinga, hih lai-ah anlum ne loin tuisik zong ka dawn kei ding hi. 9Ahang in, TOPA kammal in, ‘Anlum ne loin tuisik zong na dawn kei dinga, na paina lamah na kileh kik kei ding hi,’ ci-in hong sawl hi,” a ci hi. 10Tua ciangin amah in lampi dang khat tawna, Bethel pana hong paina lampi a tawn nawn kei hi. ^c

11 Tua hunin Bethel ah kamsang putek khat a teng hi; a tapate hong pai-in tua ni-a Pasian mipa sepsate khempeuh a ko uh hi. Amaute in a pa uh kiangah, amah in kumpipa tunga a thugen zong a gen uh hi. 12A pa un amaute kiangah, “Aman koilam tawn a hia?” ci-in a dong hi. Tuateh a tapate in Judah pana Pasian mipa totna lam a lak uh hi. 13Tua ciangin amah in a tapate kiangah, “Ka laa tutphah hong vawhsak un,” a ci hi. Amaute in laa tutphah a vawhsak khit uh ciangin amah tuanga, 14Pasian mipa a nungdelh hi. Amah in tawsaw nuai khatah a tut laitak mu a, “Nang Judah pana hong pai Pasian mipa na hi hiam?” ci-in a dong hi.

Amah in, “Ka hi hi,” ci-in a dawng hi.

15 Tua ciangin kamsangpa in, “Ka inn ah hong zui inla an ne in,” a ci hi.

16 Pasian mipa in, “Kei kileh kikin nang kong zui thei kei dinga, hih mun ah nang tawh anlum zong ne loin, tuisik zong ka dawn thei kei ding hi. 17TOPA kammal in kei kiangah: ‘Tua lai-ah anlum na ne kei dinga, tuisik zong dawn loin, na kuana na totsa lampi ah na ciah kik kei ding hi,’ ci-a hong gensa ahi hi,” a ci hi.

18 Kamsang putekpa in, “Kei zong nangmah bangin kamsang khat ka hi hi. Vansawltak khat in TOPA kammal hong gena: ‘Anlum ne ding le tuisik dawn dingin na inn ah amah tonpih kikin,’ hong ci hi,” a ci hi. (Ahi hangin amah’n a khem ahi hi.) 19Tua ciangin Pasian mipa amah tawh kileha, a inn ah ne-in a dawn hi. ^d

20 Amaute in sabuai a um laitakun amah a pikik kamsang putekpa tungah TOPA thu a tung hi. 21Judah pana pai Pasian mipa tungah amah kiko in, “Hih in TOPA gen ahi hi: ‘TOPA kammal na thusim kei a, TOPA na Pasian in hong thupiaksa na zui kei hi. 22Na nek na dawn loh nadinga hong genna munah anlum ne in tuisik na dawn hi. Tua ahi ciangin na pate hanah na luang a kivui kei ding hi,’ ci hi,” a ci hi. ^e

23 Pasian mipa in a nek a dawn khit ciangin amah a pikik kamsangpa in ama ading laa tutphah a vawhsak hi. 24Lampi ah a pai laitakin humpi khat in dawntuahin amah thata, a luang lampi ah lawnin, humpi le laa a gei-ah a ding khawm uh hi. 25Tua lai a tawn mi pawlkhat in a luang tua lai-ah kipai-a, a luang gei-ah humpi a din lam a muh uh ciangin kamsang putekpa khuapi sungah tua thu a gen uh hi. ^f

26 A khualzin kimlai a paipih kik kamsangpa in a zak ciangin, “Tua pa pen TOPA thu a thusim lo Pasian mipa ahi hi. TOPA thu in amah a vauhilhsa bangin TOPA in amah humpi tungah pia-a, humpi in amah bawhpekin a thah ahi hi,” a ci hi.

27 Kamsangpa in a tapate kiangah “Laa tutphah hong vawhsak un,” ci-a, a vawhsak uh hi. 28Tua ciangin amah pai-a lampi tungah a luang kipaii in, a gei-ah humpi le laa a ding a mu hi. Humpi in a luang ne loin laa zong a bawhpeek kei hi. 29Tua ciangin kamsangpa in Pasian mipa luang tawmin a laa tungah suana, kah ding le vui dingin ama tenna khuapi ah a pua kik hi. 30Tua ciangin aluang ama han sungah siala, amaute in kahin, “Ka sanggampa aw,” a ci uh hi.

31 Amah a vui khit uh ciangin a tapate kiangah, “Ka sih ciangin Pasian mipa kivuina han ah hong vui unla ama guhte gei-ah ka guhte sial un. 32Ahang in, amah in Bethel a biakna-tau le Samaria khuapite sung munsangte tunga biakbuknote khempeuh langah TOPA kammal a pulakkhiat thute maantakin a tung pelmawh ding hi,” a ci hi. ^g

33 Hih teng khit ciang nangawnin Jeroboam in a gitlohna khel tuan lo a, mi nam cin panin munsangte a siampi ding khat vei a seh kik hi. Siampi a suak nuam peuhpeuh munsangte a siampi dingin a ap pahpah hi. 34Hih in lei maitang panin a kiatsukna uh le a kisiatna uh a tun Jeroboam innkuante mawhna ahi hi.