1Ki 15 | ZomZIV | STEP | Nebat tapa Jeroboam kumpi a suah zawh a kum sawm le giatna kumin Abijah Judah kumpi suaka,

1 Kings 15

Judah Kumpi Abijah

1 Nebat tapa Jeroboam kumpi a suah zawh a kum sawm le giatna kumin Abijah ^{▼▼15.1 Hebrew khutgelh pawlkhat le Septuagint (2Kh. 12:16 zong en in) Hebrew khutgelh a tampen ah Abijam;tg.7 le 8 ah zong} Judah kumpi suaka, 2 Jerusalem ah kum thum sung a uk hi. A nu min Maacah hi a, Abishalom ^{▼▼15.2 Absalom tawh kilamdang lo} tanu ahi hi. ^c

3 Amah in ama mai-a a pa bawlsa mawhnate khempeuh bawl hi; a pu David lungsim bangin TOPA a Pasian tungah a lungsim bup a ki-ap zo kei hi. 4 Tua hi ta leh TOPA ama Pasian in David a cihna-in Jerusalem ah meivak khat pia-a, a zalaih ding a tapa laamto in Jerusalem a thakhauhsak hi. 5 Ahang in, TOPA mit ah David a maanin gamta a, Hit-te Uriah tawh a thu longal - a nuntak sungteng TOPA thupiakte a zuih loh khat beek a om kei hi. ^d

6 Abijah nuntak sung teng Rehoboam ^{▼▼15.6 Hebrew khutgelh a tampen le Syriac ah Abijam (tua in Abijah)} le Jeroboam a kido tawntung uh hi. 7 Abijah uk sunga thupiang adangte le ama sep khempeuh Judah kumpi khangthu ciamtehna laibu sungah kigelh hi lo ahi hiam? Abijah le Jeroboam gal a kido uh hi. 8 Tuateh Abijah a pate tawh tawlnga ta a, David Khuapi ah a kivui hi. Tuateh a tapa Asa in a za luah a kumpi a suak hi.

Judah Kumpi Asa

9 Jeroboam, Israel kumpi a suah zawh a kum sawmnihna kumin Asa, Judah kumpi suak-a, 10 Jerusalem ah kum sawmli le khat sung a uk hi. A pi min Maacah hi a, Abishalom tanu ahi hi.

11 Asa in a pa David bangin TOPA mit-ah thumanin na a sem hi. 12 Amah in gam sung biakbuknote-a pasal kizuakte hawlkhia-a, a pa bawlsa milim khempeuh a maimangsak hi. 13 Amah in a pi Maacah nangawn kumpinu’ nu hihna panin a hemkhia hi, bang hang hiam cihleh tuanu in a muhthadahhuai Asherah khuam khat a bawl hi. Asa in tua khuam phuka, Kidron Kuam ah a hal hi. 14 Asa in munsangte a khinkhiat loh hangin a nuntak sungteng a lungsim buppi TOPA tungah a ap hi. 15 Amah in amah le a pa apsa ngun le kham le vanzatte TOPA biakinnpi sungah a puak hi. ^f

16 Asa le Israel kumpi Baasha uk sung tawntung amaute gel galin a kido den uh hi. 17 Judah sim dingin Israel kumpipa Baasha kuanto a, Judah kumpipa Asa gam sungah kuamah paikhia loin kuamah a lut theih loh nading dalna-in kulhin Ramah a um hi.

18 Tua ciangin Asa in TOPA biakinnpi le ama kumpi-inn sunga a om lai ngun le kham khempeuh a la hi. Amah in a uliante tungah tuate ap a, Damascus a uk Aram kumpipa Hezion tapa Tabrimmon tapa Ben-Hadad tungah a khak hi. 19 Amah in, “Na pa le ka pa bangin nang le kei kikalah thuciamna khat omsak ni. En in ngun le kham letsong kong khak hi. Tu-in Israel kumpipa Baasha kei kiang panin a nungkin nadingin amah tawh na thuciam pel in,” a ci hi. ^g

20 Kumpipa Asa thugen Ben-Hadad thukim-a Israel khuapite langah galkap mangte a kuansak hi. Amah in Ijon, Dan, Abel Bethmaacah le Kinnereth khempeuh, Naphtali tawh a zo khawm hi. 21 Tua thu Baasha in a zak ciangin Ramah a lam khawl a, Tirzah ah a nung kik hi. 22 Tua ciangin Kumpi Asa in Judah khempeuh tungah thu pia a - khat beek pengsak loin - Ramah panin Baasha in tua lai-a a zatsa suangte le singluangte amaute a puamangsak hi. Kumpipa Asa in tuate tawh Benjamin a Geba lam-a, Mizpah zong a lam hi.

23 Asa uk sunga a thupiang dangte khempeuh, a matutnate, ama sepsa le ama lam khuapite Judah kumpite khangthu ciamtehna laibu sungah kigelh hi lo ahi hiam? Ahi zongin a tek ciangin a khe ah natna a vei hi. 24 Tua ciangin Asa a pate tawh tawlnga khawm ta a, a pa David khuapi ah amaute tawh a kivui khawm hi. Tuateh a tapa Jehoshaphat in a za luah a kumpi a suak hi. ^h

Israel Kumpi Nadab

25 Judah kumpipa Asa a kum nihna kumin Jeroboam tapa Nadab Israel kumpi suaka, kum nih sung Israel a uk hi. 26 TOPA mit-ah a sia-in gamta a, a pa lampite zui-in, ama mawhna ah Israel zong a mawhsak hi. ⁱ

27 Issachar innkuan a Ahijah tapa Baasha in amah sawmsim a Nadab le Israel khempeuh in Philistia-te khuapi Gibbethon a umcih laitakun amah a sattuk hi. 28 Judah kumpipa Asa a kum thumna kumin Baasha in Nadab thata ama mun luahin kumpi a suak hi.

29 Gam uk ding a kipat phetin amah in Jeroboam innkuan buppi a that khin hi. TOPA in Shihon-te anasem Ahijah tunga a thupiakna tawh kizui-in amah in Jeroboam sunga husang khat beek sit loin a vekin a maimangsak hi - 30 bang hang hiam cih leh Jeroboam in a bawlsa mawhnate le mawhnate Israel bawlsaka, TOPA Israel Pasian phinin, a hehsak hi.

31 Nadab uk sunga thupiang dangte le ama sepsate khempeuh Israel kumpite khangthu ciamtehna laibu sungah kigelh hi lo ahi hiam? 32 Asa le Israel kumpipa Baasha in a uk sung teng amaute gel kido tawntung uh hi.

Israel Kumpi Baasha

33 Judah kumpipa Asa a kum thumna kumin Tirzah a Ahijah tapa Baasha Israel kumpi suaka, kum sawmnih le li sung a uk hi. 34 TOPA mit ah amah a hoih loin gamta a, Jeroboam lampite tawnin ama mawhna ah Israel zong mawhna a bawlsak hi.