1Sa 15 | ZomZIV | STEP | Samuel in Saul kiangah, “ TOPA in ama mi Israel-te uk dingin nang sathau nilh dinga hong sawlpa kei ka hi hi; tua ahi ciangin tu-in TOPA thupuak na ngai in.

1 Samuel 15

TOPA in Kumpi dingin Saul Nial

1 Samuel in Saul kiangah, “TOPA in ama mi Israel-te uk dingin nang sathau nilh dinga hong sawlpa kei ka hi hi; tua ahi ciangin tu-in TOPA thupuak na ngai in. 2 Thahatpen TOPA thugen hih ahi hi: ‘Amaute Egypt pan a paikhiat toh lai-un lamkala Israel tungah Amalek-te a gamtatna uh hangin dan ka thuaksak ding hi. 3 Tu-in pai unla, Amalek-te simin amau tawh kisai khempeuh susia ^{▼▼15.3 Hebrew lai ah mihing le nate TOPA} kiuhkeuh un. Amaute hingkhawi kei un; numei pasal, naupang naungeek, bawnghon, tuuhon, kala-oh le laa-te that khin un,’ ci hi,” a ci hi. ^b

4 Tua ciangin Saul in mite sama, Telaim ah a kaikhawm hi - khe galkap tul zanih le Judah panin mi tulsawm a kikhawmsak hi. 5 Amalek-te khuapi ah Saul pai a, guam sungah a pangsimsak hi. 6 Tua ciangin Ken-te tungah, “Amalek-te tawh kong suksiat khawm loh nadingin paikhia-in amaute nusia un; no na hi uh leh amaute Egypt pan a paikhiat un Israel-te khempeuh tungah na migi uh hi,” a ci hi. Tua ciangin Amalek-te kiang panin Ken-te a kihemkhia uh hi. ^c

7 Tua ciangin Saul in Amalek-te sima, Havilah pan Shur, Egypt nisuahna dong - lampi dung khempeuh a la hi. 8 Amah in Amalek-te kumpipa Agag a hingin mana a mite khempeuh namsau-in a susia mang hi. 9 Ahi hangin Saul le a galkapte in Agag le tuu le bawng a hoihpente le bawngno ^{▼▼15.9 Ahikeh bawngtal khankhinsa; Hebrew ah hih gual kician lo hi.} le tuuno a thaute - na a hoih peuhmah a khawi uh hi. Amaute in hihte susiamang nuam lo uh a, ahi hangin a simmawhhuai a ginalote susiamang uh hi.

10 Tua ciangin Samuel tungah TOPA thu tung a: 11 “Saul in kei hong pialsanin ka lamlah bangin sem lo ahi manin kumpi ka suahsak ka dah hi,” a ci hi. Samuel lungmanga, tua zan tawntung TOPA tungah a kiko hi. ^e

12 Zingtungin Samuel tho-a Saul tawh kimu dingin a pai hi. Ahi hangin ama kiangah, “Carmel ah Saul paikhin hi. Tua lai-ah amah kipahtawina mual khat phut-a, kileh kikin Gilgal ah paisuk hi,” ci-in a kigen hi. ^f

13 Samuel in amah a phak ciangin Saul in, “TOPA in thupha hong pia hen! TOPA lamlahna bangin ka sem khin hi,” a ci hi.

14 Ahi hangin Samuel in, “Tua ahi leh ka bila ka zak tuu hamte bang hiam? Ka zak bawng hamte bang hiam?” a ci hi.

15 Saul in, “Galkapte in Amalek-te aa a puak uh hi-a tuuhon hoihpente le bawnghon hoihpente, TOPA na Pasian biak nading ahi hi; ahi zongin a omlai khempeuh ka susia khin kiuhkeuh uh hi,” ci-in a dawng hi.

16 Samuel in Saul tungah, “Khawl sin! Tuzan a TOPA in kei tunga hong gen kong gen sindeh,” a ci hi.

Saul in, “Hong gen in,” a ci hi.

17 Samuel in, “Khatvei lai-in nang mitin a neu tawh na kibat hangin Israel behte lutang suak hi lo na hi hiam? TOPA in Israel kumpi in nang sathau hong nilh hi. 18 Tuateh nasem dingin nang hong sawlin, “Pai inla tua migilo Amalek-te susiamang in; na siaksiang matengin amaute tungah galphuang in,’ hong ci hi. 19 Bang hangin TOPA thu mang lo na hi hiam? Bang hangin van kinusia bawhin TOPA mitah a hoih lo gamta na hi hiam?” a ci hi. ^g

20 Saul in, “TOPA thu mangmah veng e. TOPA in ka sep dinga hong sawl nasepna ah ka pai hi. Amalek-te ka susiamang khina amaute kumpipa Agag kong ciahpih khin hi. 21 Galkapte in Pasian tunga ap ding tuuhon le ganhon hoihpente, Gilgal a TOPA na Pasian tungah biakpiak nadingin la uh hi,” a ci hi.

22 Ahi hangin Samuel in:

“TOPA awging man’na zahin meihal biaknate le
biakpiaknate ah TOPA lungkim ahi hiam?
Biakpiakna sangin thuman’na hoihzaw a,
tuutalte’ thau sangin thusimna hoihzaw hi. ^h
23 Ai sanna hanga mawhna le lehdona a kibang hi a,
milim bia a gamtatsiatna le kiphatsakna a kibang ahi hi.
TOPA thu nial khin na hi manin
amah in kumpi dingin nang hong nolh khin hi.” ci-in a dawng kik hi.

24 Tua ciangin Saul in Samuel kiangah, “Ka mawh mah hi! TOPA thupiakna le nangma lamlahnate ka palsat khin hi; mite ka kihta a, amaute thu ka zuikha hi. 25 Tu-in nang tungah kong thum hi. TOPA ka biak theih nadingin ka mawhna hong maisak inla kei hong lehzuih kik in,” a ci hi. ⁱ

26 Ahi hangin Samuel in, “Kong lehzuih kei ding hi. Na TOPA thu na nial a, TOPA in zong Israel tunga kumpi dingin nang hong nolh khin ahi hi!” a ci hi. ^j

27 Samuel in paisan dinga a kihei laitakin Saul in a puanpi mongah len a, a kikek hi. 28 Samuel in, “Tuni-in TOPA in nang tung panin Israel kumpi gam balkek khina, nang sanga a hoihzaw - na vengte khat tungah a pia hi. 29 Israel Minthannapa zuau loin a lungsim a khel kei hi; ahang in a lungsim khek dingin amah mihing hi lo hi,” a ci hi. ^k

30 Saul in, “Ka mawh hi. Ahi hangin nong hehpihna-in ka mipih upate mai le Israel mai-ah hong pahtawi in; TOPA na Pasian ka biak theih nadingin hong lehzuih hoh in,” ci-in a dawng hi. 31 Tua ciangin Saul le Samuel ton kik uh a, Saul in TOPA a bia hi.

32 Tua ciangin Samuel in, Amalek kumpipa Agag kei kiangah hong paipih in,” a ci hi.

Agag in, “Sihsia-a sihna a bei taktak ta hi buang inteh” ci-in lungmuang ^{▼▼15.32 Ahikeh amah a ling nawn kei hi.} sa-in ama kiangah a pai hi.

33 Ahi hangin Samuel in,

“Na namsau in numeite ta nei lo a suahsak bangin
numeite lakah na nu ta nei lo a suak ding hi,” a ci hi. ^m

Tuateh Samuel in Gilgal a TOPA mai-ah Agag a that hi.

34 Tua ciangin Ramah ah Samuel pai-a, Gibeah-a a inn ah Saul a paito hi. 35 Samuel in a sih ni dong ama adingin a thum zongin Saul tawh kimu dingin a pai kik nawn kei hi. Tuateh Israel uk dinga Saul a koih khak TOPA a dah hi. ⁿ