1Sa 18 | ZomZIV | STEP | David in Saul a hopih khit ciangin Jonathan lungsim David aa tawh khat suak liana, amah zahin a it hi.

1 Samuel 18

Saul in David Haza

1 David in Saul a hopih khit ciangin Jonathan lungsim David aa tawh khat suak liana, amah zahin a it hi. 2 Tua ni-a kipan Saul in David ompiha, a pa inn ah a ciahsak nawn kei hi. 3 Jonathan in amah zahin David it ahi manin David tawh thukhun a bawl hi. 4 Jonathan in a puantualpi silhlai suahkhia-a, a galdal puan tawh David piakhawmin a namsau, a thal le a kawnggak nangawn a pia hi. ^a

5 Saul in a sep dinga a sawlna peuhmah ah David in a ma hoih takin tun ^{▼▼18.5 Ahikeh piltakin} ahi manin a galkap sungah za lianpi a pia hi. Hih in mi khempeuh lungkimsaka, Saul uliante zong a lungkim uh hi.

6 David in Philistia-pa that khinin mite inn ah a ciah uh ciangin kumpipa Saul dawn dingin Israel khuapite khempeuh panin lungnopna la sa-in, khuangtate le khausai tumtheih tum kawmin numeite lamsa-in a paikhia uh hi. 7 A lam kawmun la sa uh a: ^c

“Saul in a tultulin that,
David in a tul sawmsawmin that,” a ci uh hi. ^d

8 Saul a heh mahmah hi; hih a dawngtawina in a hehsak ahi hi. Amah in, “Amaute in David in a tul sawmsawma thatin ngaihsun uh a, kei a tultul bek a that hi ci-in hong ngaihsun uh hi. Kumpi gam longal ka ngah ding bang om lai ahi hiam?” ci-in a ngaihsun hi. 9 Tua huna kipan Saul in David hazatna mitin a en hi. ^e

10 A zingciangin Pasian kiang panin kha gilo ^{▼▼18.10 Ahikeh liamsak} khat khauhtakin Saul tungah a tung hi. A inn sungah David in a hih ngei bangin harp a tumtum laitakin kam a sang niloh hi. Saul in a khutah teipi khat tawi-a, 11 amah le amah in, “David kawm tawh ka khawhcip ding hi,” ci-in a khawh hi. Ahi hangin David nih vei a kihem man hi. ^g

12 TOPA in Saul nusia-in David ompih ahi manin Saul in David a kihta hi. 13 Tua ciangin mi tulkhat uksa in, a kiang pan kuankhiasak a, David in a galkuanna-uah galkapte a makaih hi. 14 TOPA in amah ompih ahi manin a sepna khempeuhah gualzo ^{▼▼18.14 Ahikeh amah pil mahmah hi.} mahmah hi. 15 Saul in a gualzawh ^{▼▼18.15 Ahikeh pil} mahmahna a muh ciangin a kihta hi. 16 Ahi hangin David in galsimna ah amaute makaih ahi manin Israel le Judah khempeuh in amah a it uh hi.

17 Saul in David kiangah, “Ka tanu upazaw Merab hiah a om hi. Nang tawh kong kitengsak ding hi; TOPA galte hangtakin do inla ka na sem lel in,” a ci hi. Saul in, “Ama tungah ka khut ka liik kei ding hi Philistia-te in sem lel uh hi,” ci-in a ngaihsutna ahi hi.

18 Ahi hangin David in Saul kiangah, “Kumpipa makpa a suak dingin Israel sungah kei le ka pa innkuanpihte ahi-a, ko bawng’ mahmah ahi zongin bang hi lel hiam?” a ci hi. 19 Tua ciangin ^{▼▼18.19 Ahikeh bangbang ahi zongin} Saul in a tanu Merab, David tawh a tensak ding hun ciangin Meholah-te Adriel tawh a kitengsak hi. ^k

20 Tu-in Saul tanu Michal le David kingai uh a, Saul tungah a gen uh ciangin a lungkim hi. 21 Amah in, “Philistia-te khut ama tungah a tuk theih nadingin ka tanu thangkamsa a suak thei ding hi,” ci-in a ngaihsun hi. Tua ciangin Saul in David kiangah, “Tu-in ka makpa na suah theih nadingin hun hoih a nihveina na ngah hi,” a ci hi.

22 Tua ciangin Saul in a cingte kiangah, “David na tuam hopih unla, ‘En in, nang tungah kumpipa a lungkim-a, ko amah a cingte khempeuh in zong nang kong deih uh hi; a makpa suak hoh in,’ ci un,” ci-in thu a pia hi.

23 Amaute in David tungah hihte a ci kikkik uh hi. Ahi hangin David in, “Kumpipa’ makpa suah ding thuneu-in ngaihsun na hi uh hiam? Kei, mizawng kuama theihloh khat ka hi lel hi,” a ci hi.

24 Saul nasemte in David gensa thu amah a koh uh ciangin 25 Saul in, “David kiangah, ‘Kumpipa in a galte phu a lakna-in Philistia-te vundawn zakhat longal moman dang a deih kei hi,’ ci un,” ci-in a dawng hi. Saul in ahileh Philistia-te khutah David sihsak a sawm ahi hi. ^l

26 Amah a cingte in hihte David tungah a gen uh ciangin kumpipa makpa suah ding a thukim hi. Tua hi a, a kiseh hun a tun ma-in, 27 David le a mite kuankhia-in Philistia-te zanih a that uh hi. Amah in amaute vundawn pua-a, kumpipa makpa a suah theih nadingin a cingin kumpipa a pia hi. Tua ciangin Saul in a tanu Michal le amah a kitengsak hi.

28 TOPA in David a ompih lam Saul in thei-a a tanu Michal in David a it lam a theih ciangin amah kihta semsem a, 29 a nuntak sungteng a gal a suak hi.

30 Philistia galkap mangte galsim dingin a kuan ngei bangin kuankuan uh a, Saul uliante khempeuh sangin David gualzo ^{▼▼18.30 Ahikeh David in piltakin a semzaw hi.} zaw ahi manin, a min kidawk mahmah hi.