1Sa 28 | ZomZIV | STEP | Tua hun laitakin Philistia-te in Israel do dingin a galhatna uh a kaikhawm uh hi. Achish in David kiangah, “Nang le na mite in ka galkapte nong zuih ding uh thei pelmawh un,” a ci hi.

1 Samuel 28

Saul le Endor a Aitawinu

1 Tua hun laitakin Philistia-te in Israel do dingin a galhatna uh a kaikhawm uh hi. Achish in David kiangah, “Nang le na mite in ka galkapte nong zuih ding uh thei pelmawh un,” a ci hi. ^a

2 David in, “Tuateh na nasempa in bang hih thei hiam, cih nangmah mah in na mu ding hi,” a ci hi.

Achish in, “Hoih mahmah hi, na khantawnin kei hong cingpa-in kong koih ding hi,” ci-in a dawng kik hi.

3 Tu-in Samuel sita a, Israel khempeuh thumin ama khuapi Ramah ah a vui uh hi. Saul in vankahte le misi thudongte a gam panin a hawlkhia khin hi.

4 Philistia-te kikhawmin Shunem ah giahphual sat uh a, tua hun mahin Saul in Israel-te khempeuh khawmin Gilboa ah giahphual a sat hi. 5 Saul in Philistia-te galkapte a muh ciangin kihta a; a lungsim a lauthawng mahmah hi. 6 Amah in TOPA a dot hangin TOPA in a mang sung ahi a, Urim ahi a, kamsangte pan ahi zongin a dawng kei hi. 7 Tua ciangin Saul in a sawltakte kiangah, “Amah ka dot theih ding sikha kamsang khat hong zonsak un,” a ci hi. ^b

Amaute in, “Endor ah khat om hi,” a ci uh hi. ^c

8 Tua ciangin Saul in a mel selin puan dang khat silh a, tua numei kiangah amah tawh mi nih a va pai uh hi. Amah in, “Kei adingin kha khat hong dotsak inla a min ka gen pen hong saptohsak in,” a ci hi. ^d

9 Ahi hangin numei in, “Saul in a hihsa thu teltakin a theihsa ahi hi. Amah in vankahte le misi thudongte gam sungah a phiatmangsa ahi hi. Bang hangin hong sisak thei dingin ka nuntakna thang hong siah na hi hiam?” a ci hi.

10 Tuanu tungah TOPA lo in Saul kiciam a, “TOPA nuntakna lo a kong gen inah, hih hangin dan hong kituaksak kei ding hi,” a ci hi.

11 Tua ciangin numei in, “Kua hong saptohsak ding ka hi hiam?” ci-in a dong hi.

Amah in, “Samuel hong sapsak in,” a ci hi.

12 Numei in Samuel a muh ciangin a aw neihzahin awng-a Saul kiangah, “Bang hangin hong khem na hi hiam? Saul na hi veleh!” a ci hi.

13 Kumpipa in tuanu kiangah, “Lau kei in. Bang mu na hiam?” a ci hi.

Numei in, “Lei pana hong pusuak-khia kha ^{▼▼28.13 Ahikeh khate mu ahikeh pasiante mu} khat ka mu hi,” a ci hi.

14 Amah in, “Amah bang tawh kibang hiam?” ci-in a dong hi.

Tuanu in, “Puteek puantual silh khat hong paito hi,” a ci hi. ^f

Tua ciangin Saul in Samuel ahilam thei a, kunsukin a mai leilam ngatin a khupbawh suk hi.

15 Samuel in Saul kiangah, “Bang hangin kei hong nawngkaisakin hong samto themthum na hi hiam?” a ci hi.

Saul in ka lung dong lua mahmah hi. Philistia-te in kei hong sim uh a, Pasian in lah kei hong taisan khin hi. Amah in kamsangte ahi-a mang sungah ahi zongin hong dawng nawn lo hi. Tua ahi ciangin ka hihzia ding hong gen dingin nang kong sam hi,” a ci hi. ^g

16 Samuel in, “Bang hangin kei hong dong na hi hiam, tu-in TOPA in nang hong taisan a, na gal suak ta hi lo ahi hiam? 17 TOPA in kei tungtawna a gensa bangin a hih khin hi. TOPA in na khut panin kumpi-gam balkhia khina na vengte khat - David tungah pia zo hi. 18 Nang in TOPA thu mang loin Amalek-te tunga ama thangpaihna tawh kizui-in sem lo na hi manin tuni-in TOPA in nang tungah hih bangin hong bawl ahi hi. 19 TOPA in Philistia-te khutah nang le Israel hong piakhawm dinga, zing ciangin nang le na tapate kei tawh i omkhawm ding hi. TOPA in Israel galkapte zong Philistia-te tungah a pia ding hi,” a ci hi. ^h

20 Samuel thugente hangin Saul lau lua-a leitungah a khup a thalin a puk hi. Tua ni sun le zan an ngawl ahi manin a tha a hawmgawp hi.

21 Saul kiangah numeinu pai-a amah a linglawng luatna a muh ciangin, “En in na nasemnu in na thu kong mang hi. Ka nuntakna khamin nang cih bangin ka hih hi. 22 Tu-in nong hehpihna-in na nasemnu thu ngai inla na pai nading ah na pai zawh nading tha na neih nadingin an pawlkhat hong kipiasak in,” a ci hi. ⁱ

23 Amah in nial a, “Ka ne kei ding hi,” a ci hi.

Ahi hangin a mite in numei tawh kopin sawlhuan uh a, amaute thu a mang hi. Leitual panin thoto a lupna tungah a tu hi. ^j

24 Numeinu in bawngno vakthau khat a inn ah nei a, manlangin a go hi. Annel pawlkhat la-in mekmana, silngo sawh loh anlum a bawl hi. 25 Tua ciangin Saul le a mite lui-a a ne uhhi. Tua zan mahin dingkhia in a nusia uh hi.