1Sa 8 | ZomZIV | STEP | Samuel a tek ciangin Israel-te thukhen dingin a tapate a koih hi.

1 Samuel 8

Israel in Kumpi Khat Ngen

1 Samuel a tek ciangin Israel-te thukhen dingin a tapate a koih hi. 2 A tapa upa pen Joel hi-in, a nihna Abijah hi-a amaute in Beersheba ah na a sem uh hi. 3 Ahi hangin a tapate ama gamtat bangin a gamta kei uh hi. Amaute amaan lo-a ngahna lamah pial uh a, golhsum la-in thutang a lehhei uh hi. ^a

4 Tua ciangin Israel upate khempeuh a vekun kikhawm uh a, Ramah a Samuel kiangah a pai uh hi. 5 Amaute in, “Nang na tekta a, na tapate in lah na lampi hong zui lo uh hi; tu-in minam dangte neih bangin eite hong makai ^{▼▼8.5 Tang ngei-in thukhen tg.6 le 20 ah zong} dingin kumpi khat seh in,” a ci uh hi. ^c

6 Ahi zongin amaute in, “Kote hong makaih ding kumpi khat hong pia in a cih uh ciangin hih in Samuel lung nuamsak lo a; TOPA tungah thu a ngen hi. 7 Tuateh TOPA in, “Mi khempeuh in nang tunga hong gen ngai in; a kumpi dingun nang hong nial uh hi loin kei hong nial uh ahi hi. 8 Egypt pana ka paikhiatpih toh a kipan tuni ciang dong a hih bangun; kei hong taisanin pasian dangte na a sep bangun nang tungah a hih uh ahi hi. 9 Tu-in amaute thu ngai in; ahi hangin limtakin vauhilh inla, amaute a uk kumpipa in amaute tunga a sepzia ding theisak in,” ci-in a gen hi.

10 Samuel in, kumpi a ngen mite tungah TOPA gente khempeuh a gen hi. 11 Amah in, “No hong uk kumpipa in hih bangin sem ding hi: Amah in na tapate uh sakol le sakolleng nasem in koih dinga sakolleng mai-ah a taisak ding hi. 12 Pawlkhat a tulte uksakin pawlkhat a sawmngate uksak dinga, adangte a lo khosakin an lasak dinga a omlaite galhiam bawlsakin a sakollengte a vawhsak ding hi. 13 Amah in na tanute uh gimnamtui bawl, an huan le moh emin a zang ding hi. 14 Amah in na lo uh, na lenggui huan uh le na olive huan hoihpente uh la-in amah a cingte a pia ding hi. 15 Amah in na an uh le na lenggah kaihkhopsate uh sawm ah khat la-in ama uliante le amah a cingte a pia ding hi. 16 Na nasemnute na nasempate uh le na bawnghonte ^{▼▼8.16 Septuagint; Hebrew ah tuailaite} uh le na laate uh a hoihpente ama zat dingin a la ding hi. 17 Amah in na tuuhonte uh sawm ah khat la dinga note mahmah a sila na suak ding uh hi. 18 Tua ni hong tun ciangin na teelsa uh kumpipa panin hong honkhia in ci-in na kiko ding uh a, tua ni ciangin TOPA in hong dawng lo ding hi,” a ci hi. ^e

19 Ahi hangin mite in Samuel thu mang lo uh a, “Ut kei ung! Hong uk ding kumpi khat ka deih uh hi. 20 Tuateh ko hong makaih kumpipa tawh minam dangte khempeuh ka bang ding uh a, kote mai-ah masa-in ka galte uh hong dosak ding hi,” a ci uh hi. ^f

21 Mite genna Samuel in a zak khit ciangin TOPA mai-ah a gen kik hi. 22 TOPA in, “Amau thu ngai inla kumpi khat pia in,” ci-in a dawng hi. ^g

Tua ciangin Samuel in Israel mite kiangah, “Na khua ciat uah na ciah kik phot un,” a ci hi.