2Ch 14 | ZomZIV | STEP | Tuateh Abijah a pate tawh tawlnga a, David Khuapi sungah kivui hi. Ama tapa Asa in a kumpi za luah a, ama uk hun kum sawm sung, gamsung a kilem hi.

2 Chronicles 14

1 Tuateh Abijah a pate tawh tawlnga a, David Khuapi sungah kivui hi. Ama tapa Asa in a kumpi za luah a, ama uk hun kum sawm sung, gamsung a kilem hi. ^a

Judah Kumpi Asa

2 Asa in TOPA ama Pasian mitah ahoih le amanin na a sem hi. 3 Amah in gamdang biakna-taute le munsangte phiatkhia-in suang siangthote dengzan a, Asherah khuamte ^{▼▼14.3 Tua in Asherah nusian lim ahi hi; hih mun le 2Kh sung khempeuh ah zong} a phukpai hi. 4 Judah in TOPA a pate uh Pasian zonga a thukhamte le a thupiakte a man nadingun thu a pia hi. 5 Amah in Judah khuapi tenga munsangte le gimnamtui halna biakna-taute phiatkhia a, ama ukna nuai-ah kumpi-gam a kilem hi. 6 Gam sungah kilemna oma kipan Judah ah kulha ki-um khuapite a bawl hi. TOPA in tawlngasak ahi manin tua kumte sungah kuamah in amah a sim kei hi.

7 Amah in Judah tungah, “Hih khuapite lamin kulhin um ni, tausangte, kongpite le a kalhna zawlte bawl ni. Eite in TOPA i Pasian deihna zong i hi manin i gam ei aa mah hi lai hi; eite in amah i zonga amah in eite i kimkot panin hong khawlsak ahi hi,” a ci hi. Tua ciangin amaute in lam uh a, a lamzang uh hi.

8 Asa in Judah panin lum lian le teipi a tawi galkap tul zathum le Benjamin panin lumneu le thal tawi tul sawmgiat a nei hi. Hihte khempeuh galhang mi vive ahi uh hi.

9 Amaute sim dingin galkap ^{▼▼14.9 Hebrew in galkap tulte tulkhat ahikeh galkap tulte tul tampi tawh} tampitak le sakolleng zathum tawh Cush-te Zerah kuankhia a, Mareshah ciangdong a tung uh hi. 10 Amah maituah dingin Asa kuankhia a, amaute a kido dingin Mareshah kianga Zephthah Kuam sungah panmun a la uh hi.

11 Tua ciangin Asa in TOPA a Pasian sama, “TOPA aw, a thahatte langa hatna nei lote huh dingin nang tawh a kibang khat beek a om kei hi. TOPA kote Pasian aw, kote hong huh in, ahang in, nang tungah kong kinga uh a, nangma minin hih galkap tampitakte langkhatah ka kuan uh hi. TOPA aw, nang in kote Pasian na hi hi; nang langah mihing phuletsak zo kei in,” a ci hi.

12 TOPA in Asa le Judah mai-ah Cush-te a satpuk hi. Cush-te tai uh a, 13 Asa le a galkapte in Gerar dong amaute a nungdelh uh hi. Hizah a tam Cush-te kihu thei lo uh a, TOPA le ama galhatna mai-ah amaute a kisuzan ta hi. Judah mite in van kinusia tampitak a puakhia uh hi. 14 TOPA lauhuaina amaute tungah tung ahi manin amaute in Gerar kima khuaneute khempeuh a susia uh hi. Amaute in hih khuaneute luhgawp uh a, tua lai-ah galvan lak a tam mahmah hi. 15 Amaute in gancingte giahphual zong sim uh a, tuu honpi le keelte le kala-ohte a paikhiatpih uh hi. Tua ciangin amaute Jerusalem ah a ciah kik uh hi. ^d