2Ch 15 | ZomZIV | STEP | Oded’ tapa Azariah tungah Pasian Kha a tung hi.

2 Chronicles 15

Asa Puahphatna

1 Oded’ tapa Azariah tungah Pasian Kha a tung hi. 2 Amah Asa tawh kimu dingin paikhia a, “Asa le Judah le Benjamin-te khempeuh aw, ka thugen na ngai un. TOPA tawh na om khawm uh ciangin amah in note hong ompih hi. Amah na zon uh leh note in na mu ding uh hi, ahi hangin amah na taihsat uh leh amah in hong taisan ding hi. 3 Israel-te sawtveipi Pasian maan tawh sung omlo uh a, a hilh ding siampi khat tawh zong om loin thukham loin a om uh hi. 4 Ahi hangin amaute a lungdon uh ciangin TOPA Israel Pasian lam nga in amah zong uh a, amaute in mu uh hi. 5 Tua hun lai-in zinsuk zintohna lungmuanhuai lo a, tua hangin tua gama teng mite buai mahmah uh hi. 6 Pasian in lungdonna namkim tawh amaute lauthawngsak ahi manin minam khat in adang khat, khuapi khat in adang khat a kisu ciat uh hi. 7 Ahi hangin nang na hileh na pahtakman sang ding na hi manin hat inla tawpsan peuhmah kei in,” a ci hi. ^a

8 Asa in hih kamsangpa Odeb tapa ^{▼▼15. 8 Vulgate le Syriac (Septuagint a tg.1 na zong en in); Hebrew in a tapa Azariah cih nei lo hi.} Azariah thugenkholhte a zak ciangin a kilungkhauhsak hi. Amah in Judah le Benjamin gam buppi le Ephraim mualtung gama, a laksa khuapi khempeuh panin a kihhuai milim khempeuh a phiatkhia hi. Amah in TOPA biakinnpi innliim mai-a TOPA biakna-tau a puahpha hi.

9 Tua ciangin amah in Judah le Benjamin khempeuh le Ephraim, Manasseh le Simeon pana amaute lakah a teng mite khempeuh a kaikhawm hi; ahang in, TOPA amaute Pasian in amaute a ompih lam a theih uh ciangin Israel panin tampitak in amah a beel uh hi. ^c

10 Asa kumpi a suah zawh a kum sawm le ngana a kha thumna sungin amaute Jerusalem ah a kikhawm uh hi. 11 Tua hunin amaute in gal sunga a puak kikte uh panin bawnghon pan bawngtalpi za sagih le tuu le keel tul sagih TOPA tungah biakna-in a pia uh hi. 12 Amaute in a lungsim uh le a hinna khempeuh un TOPA a pate uh Pasian a zon nadingun thukhun khat a bawl uh hi. 13 TOPA Israel Pasian a zong lo khempeuh aneu alian, a numei a pasalin kithat ding hi. 14 Amaute ngaihtaka kikona, otna le pengkulte le sakite tawh TOPA tungah a kiciam uh hi. 15 Judah-te khempeuh a lungsim neih zahun kiciam uh ahi manin tua kiciamna hangin a nuam uh hi. Amaute in lawptakin Pasian zong uh a, amah a mu uh hi. Tua ciangin TOPA in amaute a kim a pam panun a tawlngasak hi.

16 Kumpi Asa in a pi Maacah zong kumpinu hihna panin a hemkhia hi, bang hang hiam cih leh tuanu in a muhthadahhuai Asherah khuam khat a bawl hi. Asa in tua khuam phukin sattan gawpa Kidron Kuam sungah a haltum hi. 17 Israel panin munsangte a phiat loh hangin Asa in a nuntak sungteng a lungsim buppi TOPA tungah a ap hi. 18 Amah le a pa in a apsa ngun le kham vanzatte Pasian biakinnpi sungah a puak hi.

19 Asa a man khit kum sawmthum le nga dong gal dang a om nawn kei hi.