2Ch 20 | ZomZIV | STEP | Hih thu khit ciangin Moab-te le Ammon-te, Meunnin-te pawl khat tawh Jehoshaphat do dingin a kuan uh hi.

2 Chronicles 20

Jehoshaphat in Moab le Ammon-te Zo

1 Hih thu khit ciangin Moab-te le Ammon-te, Meunnin-te ^{▼▼20.1 Septuagint khutgelh pawlkhat; Hebrew ah Ammon-te} pawl khat tawh Jehoshaphat do dingin a kuan uh hi. ^b

2 Mi pawlkhat pai uh a Jehoshaphat kiangah, “Nang hong sim dingin Edom ^{▼▼20.2 Hebrew khutgelh khat; Hebrew khutgelh a tampen; Septuagint le Vulgate ah Aram} pan le Tuipi ^{▼▼20.2 Tua in, Si Tuipi} galkhat panin galkap tampitak hong kuan hi. Tuate Hazazon Tamar (tua pen En Gedi) ah om khin ta uh hi,” ci-in a ko uh hi. 3 Jehoshaphat patau a TOPA dot ding khensatin Judah khempeuh antan ding a tangko hi. 4 TOPA tungah huhna zong dingin Judah mi khempeuh a kikhawm uh hi; hi takpi hi, Judah khuapi khempeuh panin amah zong dingin a kuan ciat uh hi. ^e

5 Tua ciangin TOPA biakinnpi huang sung inntual thak mai, Judah le Jerusalem pana mipite kikhopna sungah Jehoshaphat dingin:

6 “TOPA ka pate uh Pasian aw, vantung a om Pasian nang hi lo na hi hiam? Minamte kumpi-gam khempeuh nangma uk ahi hi. Thahatna le vangliatna nangma khutah oma, kuamah in nang hong nang zo kei hi. 7 Kote Pasian aw, nang in na mi Israel mite mai panin hih gama teng mite hawlkhia-in na lawmpa Abraham suante neih den dingin na piaksa hi lo ahi hiam? 8 Tua sungah amaute tengin nangma Min in biakbuk lam uh a, 9 ‘Eite tungah tuahsiatna ahi, namsau-a thukhenna ahi-a, pulpi ahi a kialpi ahi zongin hong tun leh nangma omna na Min a kilam hih biakinnpi mai-ah dingin ka lungdonna uh kong ko ding uh a nang hong za-in kote nong honkhia ding hi,’ ci uh hi. ^f
10 “Ahi hangin tu-in Moab le Seir Vum pana mite, Israel-te Egypt pana a paikhiat lai-un amaute sim dingin na phal kei hi; tua ciangin amaute in kiheisan in a nusia kei uh hi. 11 En in, kote in luah a ka neih dingun nong piaksa panin kote hong nawhkhiatna tawh hong thuk dingin amaute hong kuan uh hi. 12 Kote Pasian aw, amaute tungah thu khen lo ding na hi hiam? Hih kote hong sim galkap tampitakte maingat dingin vang ka nei kei uh hi. Ka cih nading uh ka theih loh manun nangmah kong mitsuan uh hi,” a ci hi. ^g

13 Judah mite khempeuh a zite a tate uh le a tanaute uh tawh TOPA mai tua lai-ah a ding uh hi.

14 Tua ciangin Asaph suante Levi-te khat, Mattaniah tapa, Jeiel tapa Benaiah tapa Zechariah tapa Jahaziel a kikhawm mipite lakah adin laitakin a tungah TOPA Kha a tung hi. ^h

15 Amah in, “Kumpipa Jehoshaphat le Judah le Jerusalem a tengte khempeuh aw, ngai dih un! No tungah TOPA thugen hih ahi hi: ‘Hih galkap tampite hangin lau kei unla lungkia kei un. Ahang in, gal kidona no aa hi loin Pasian aa ahi hi. 16 Zing ciangin amaute do dingin kuansuk un. Amaute Ziz Ciangka zui-in hong kahto ding uh a, Jeruel Sehnel-gam kuampi mongah amaute na mu ding uh hi. 17 Note in hih galte na do kha kei ding uh hi. Judah le Jerusalem aw, na panmun uh la un; kiptakin ding unla TOPA hong hotkhiat ding en un. Kihta kei un; lungkia kei un; amaute maingat dingin zing ciangin kuankhia un, TOPA in note kong ompih hi,’ ci hi,” a ci hi. ⁱ

18 Jehoshaphat leilam nga-in kunsuk a, Judah le Jerusalem-a mite khempeuh TOPA bia-in a bok uh hi. 19 Tua ciangin Korath-te pana Levi-te pawlkhat le Kora-te dingto in aw ngaih mahmah tawh TOPA Israel Pasian a phat uh hi.

20 Amaute zingsang tungin Tekoa Sehnel-gam zuanin a pai uh hi. A kuankhiat laitakun Jehoshaphat dingin, “Judah le Jerusalem a mite aw, ka thugen na ngai un! TOPA note Pasian muang un, na dingkip ding uh hi; ama kamsangte muang un, na gualzo ding uh hi,” a ci hi. 21 Mite a hanthawn khit ciangin Jehoshaphat in galkapte mai-ah a pai kawmun TOPA la sakin ama ^{▼▼20.21 Ahikeh ama thupina tawh} sianthona a thupina a phat ding mi sehin:

“TOPA tungah lungdam ko un,
ama itna kip tawntung hi,” a ci hi.

22 Amaute in la sa a phat dingin a kithawi laitakun Judah a sim Ammon, Moab le Seir Vum a mite langkhatah TOPA in a pangsimte koih a, amaute a kizo hi. 23 Seir Vum a mite susia-a a maimangsak dingin Amon mite le Moab mite a dingkhia uh hi. Amaute in Seir pana mite a gawhmang khit uh ciangin amaute khat le khat a kisiatsak tuahna a huh uh hi. ^k

24 Judah mite sehnel-gam galetna mun tungin galkap honpite lam a et uh ciangin leitungah misi luang lum bekbek mu uh hi; khat beek a suakta kei hi. 25 Tua ciangin amau van nusiatte pua dingin Jehoshaphat le a mite pai uh a, amaute lakah galvan tampitak le puansilh ^{▼▼20.25 Hebrew khutgelh pawlkhat le Vulgate; Hebrew khutgelh a tampen ah misiluang} le vanzat manpha - amaute puakkhiat zawh sangin a tamzaw a mu uh hi. Van kinusia tam lua ahi manin ni thum sung a khawmkhop uh hi. 26 A ni lina ni-in amaute in TOPA a phatna mun uh Beracah Kuam ah a kikhawm uh hi. Tuni dongin Beracah ^{▼▼20.26 Beracah pen phat ahikeh pahtawi cihna} Kuam a kicihna hih hang ahi hi.

27 Tua ciangin Jehoshaphat in makaih a Judah-te le Jerusalem a mite khempeuh lungnuamtakin Jerusalem ah a ciah kik uh hi, ahang in, TOPA in a galte uh tungah a lungnuamsak hi. 28 Amaute Jerusalem ah lut uh a harp-te, lut-te le pengkulte tawh TOPA biakinnpi ah a pai uh hi.

29 TOPA in Israel galte a dosak zia gam sunga kumpi-gam khempeuh in a zak uh ciangin amaute in Pasian a kihta uh hi. 30 Tuateh ama Pasian in a kim a pam panin galmuangsak ahi manin Jehoshaphat kumpi-gam a kilem hi. ⁿ

Jehoshaphat Ukna Bei

31 Tuaci-in Jehoshaphat in Judah a uk hi. Amah Judah kumpi a suahin kum sawmthum le nga pha a, Jerusalem ah kum sawmnih le nga a uk hi. A nu min Azubah hi a, Shilhi tanu ahi hi. 32 Amah in a pa Asa lampi zui-a, tuate panin a pial kei hi; TOPA mitah a maanin gamta hi. 33 Ahi zongin munsangte kiphiat khia lo a, mite in a pate uh Pasian tungah a lungsim uh a nga nai kei lai uh hi.

34 Jehoshaphat in a uk sunga a septe a kipatna pan a tawpna dong Hanani tapa Jehu khang-thute ciamtehna ah kigelh a, Israel kumpite ciamtehna laibu ah a om hi. ^o

35 Tua nung ciangin Judah kumpipa Jehoshaphat in gitlohna a gamta Israel kumpipa Ahaziah tawh kipawlna khat a bawl hi. 36 Amah tawh sumbawlna tembawpi ^{▼▼20.36 Hebrew ah Tarshish a pai thei tembawpite} hon khat bawl ding a kithukim uh hi. Ezion Geber ah hihte a bawl khit nungun, 37 Mareshah a Dodavahu tapa Eliezer in Jehoshaphat tunga tung ding thu gen a, Ahaziah tawh kipawlna na bawl hangin TOPA in na bawlsa a susia ding hi,” a ci hi. Tembawpite kisia-a, sumbawlin khual a zin thei kei uh hi. ^{▼▼20.37 Hebrew ah Tarshish zuana pai}