2Ki 20 | ZomZIV | STEP | Tua hun lai-in Hezekiah cina a, a si dektak hi. Amoz tapa kamsangpa Isaiah ama kiangah pai-in, “ TOPA gen hih ahi hi: Si ta ding na hi manin na innkuan sung vai ding hawm in; na dam zo kei ding hi,” a ci hi.

2 Kings 20

Hezekiah Cinatna

1 Tua hun lai-in Hezekiah cina a, a si dektak hi. Amoz tapa kamsangpa Isaiah ama kiangah pai-in, “TOPA gen hih ahi hi: Si ta ding na hi manin na innkuan sung vai ding hawm in; na dam zo kei ding hi,” a ci hi.

2 Hezekiah kawm lam nga-in TOPA tungah, 3 “TOPA aw, nangma mai-ah muanhuaitakin ka kalsuan a, ka lungsim buppi nang hong apin na mit ah a hoihin ka gamta hi,” ci-in thu a ngen hi. Tuateh Hezekiah kah cihtakin a kap hi.

4 Isaiah in innhuang laita a khen ma-in ama tungah TOPA thu tunga: 5 “Kileh kik inla ka mite makaipa Hezekiah kiangah, ‘TOPA na pa David Pasian gen hih ahi hi: Na thungetna ka za a, na khituite ka mu hi; nang kong damsak ding hi. Tu-a kipan a nithumna ni-in TOPA biakinnpi ah na paito ding hi. 6 Na nuntak hun kum sawm le nga ka sotto ding hi. Nang le hih khuapi Assyria kumpipa khut panin ka hukhia ding hi. Keimah le ka nasempa David ka khualna-in hih khuapi ka dal ding hi, ci hi,’ ci-in gen in,” a ci hi.

7 Tua ciangin Isaiah in, “Thei gah beu khat bawl in,” a ci hi. Amaute in bawl uh a, meimatum tungah a belh uh leh a dam hi. ^a

8 Hezekiah in Isaiah kiangah, “TOPA in kei hong damsak ding leh tu-a kipan a ni thumna ni-in TOPA biakinnpi ah ka paitoh ding, bang limin hong om ding hiam?” ci-in a dong hi.

9 Isaiah in, “TOPA in nang tungah hong ciamsa a tunsak nading TOPA lim hih ahi hi: Niliim kal sawm mai pai ding hiam, kal sawm nung kik zaw ding hiam?” ci-in a dong hi.

10 Hezekiah in, “Niliim kal sawm a mai pai ding thu baih ahi hi, tua sangin kal sawm nung kiksak in,” a ci hi.

11 Tua ciangin TOPA tungah kamsang Isaiah kiko a, TOPA in Ahaz kahlei tungah ni a tumsaksa kalsawm a kilehkiksak hi. ^b

Babylon Panin Palai

12 Tua hun laitakin Babylon kumpipa Baladan tapa Merodach-Baladan in Hezekiah cinatna za-a lai le letsong a khak hi. 13 Hezekiah in kamtaite zindo-a, a gou kholna-a om khempeuh - ngun, kham, gimnam-tuite, sathau siangtho a galhiamte le a kimu thei goute khempeuh amaute a lak hi. A kumpi-inn sung le a kumpi-gam sung khempeuh ah amaute a lah loh khat beek a om kei hi.

14 Tua ciangin Kumpipa Hezekiah kiangah kamsangpa Isaiah paia, “Tua mite in bang gen uh a, amaute koi pana hong pai uh hiam?” ci-in a dong hi.

Hezekiah in, “Mun gamlapi pan ahi hi. Babylon pana hong pai uh ahi hi,” ci-in a dawng hi.

15 Kamsangpa in, “Amaute in na kumpi inn sungah bang mu uh hiam?” ci-in a dong hi.

Hezekiah in, “Ka kumpi-inn sunga na khempeuh a mu uh hi. Ka goute khempeuh amau ka lah loh khat beek a om kei hi,” a ci hi.

16 Tua ciangin Isaiah in Hezekiah kiangah, “TOPA kammal za in: 17 Na kumpi-inn sunga na khempeuh le na pate in tuni donga a khol nate khempeuh Babylon ah a kipuak khiat hun hong tung taktak ding hi. Bangmah a kinusia kei ding hi, TOPA in ci hi. 18 Tuateh nangma suante nangma si le sa, nang pana piang lai dingte kikaimang dinga, amaute Babylon kumpipa kumpi-inn ah cilgehte a suak ding uh hi,” a ci hi. ^c

19 Hezekiah in, “Na gensa TOPA kammal a hoih hi,” ci-in a dawng hi. Ahang in amah in, “Kei nuntak hun sungin lemna le ngaihmuanna om buang lo ding ahi hiam?” ci-in a ngaihsun hi. ^d

20 Hezekiah uk sunga thupiang dangte le ama zawhsa khempeuh le a bual bawlzia le leitovanga khuapi sunga tui a tunsaknate,Judah kumpite khangthu ciamtehna laibu sungah kigelh khin hi lo ahi hiam? 21 Hezekiah a pate tawh a tawlnga khawm hi. Tuateh a tapa Manasseh in a za luah a kumpi a suak hi.