2Ki 21 | ZomZIV | STEP | Manasseh kumpi a suah in kum sawm le nih upa a, Jerusalem ah kum sawmnga le nga sung a uk hi. A nu min Hephzibah ahi hi.

2 Kings 21

Judah Kumpi Manasseh

1 Manasseh kumpi a suah in kum sawm le nih upa a, Jerusalem ah kum sawmnga le nga sung a uk hi. A nu min Hephzibah ahi hi. 2 TOPA in Israel-te mai pana a hawlkhiat minamte sep a kihhuaite amah in sema, TOPA mit ah a sia-in a gamta hi. 3 A pa Hezekiah in a suksiatsa munsangte lam kik hi; Israel kumpipa Ahab hihsa bangin Baal biak nading taute dawha, Asherah khuam zong a phut hi. Amah aksi honpite lamah kunin tuate a bia hi. 4 TOPA in, “Jerusalem ah ka min ka koih ding hi,” a cihnasa TOPA biakinnpi sungah biakna-taute a dawh hi. 5 TOPA biakinnpi tualte gel ah aksi honte khempeuh biak nading biaknataute a dawh hi. 6 Amah in mei sunga hal ^{▼▼21.6 Ahikeh Amah in ama tapa paisuaksak hi.} dingin biakna-in a tapa pia-a, aisan, khongkhai le vankahte le sikha kamsangte thu a dong hi. Amah in TOPA mit ah a hoih lo tampitak gamta-a, amah phinin a hehsak hi. ^b

7 Amah in ama bawl a kikhuaksa Asherah khuam la in, TOPA in David le a tapa Solomon tungah, “Israel behte khempeuh pana ka teelkhiatsa hih biakinnpi sung le Jerusalem sungah ka Min ka koih tawntung ding hi. 8 Amaute in ka thupiaksa na khempeuh limtakin a zuih uh a, ka nasempa Moses in amaute a piak thukham buppi a zuih uh leh a pute uh ka piaksa leitang panin Israel-te khe ka vakkhiasak nawn kei ding hi,” a cihna biakinnpi sungah a koih hi. 9 Ahi hangin mite in a thu a ngai kei uh hi. TOPA in Israel-te mai pana a suksiatsa minamte sangin a hoih lo zaw a gamta dingin Manasseh in lam a khialhpih hi. ^c

10 TOPA in ama nasem kamsangte tungtawnin: 11 “Judah kumpipa Manasseh in hih a kihhuai mawhnate a hih khin hi. Ama ma-a Amor-te sangin a siazaw in gamta-a ama milimte tawh Judah mawhna a bawlsak hi. 12 Tua ahi ciangin TOPA, Israel Pasian gen hih ahi hi: Jerusalem le Judah tungah a za peuhmah bil a vut ding siatna ka tungsak ding hi. 13 Keimah in Samaria tunga ka zat pikhau le Ahab innkuan tunga ka zat saval-te zangin Jerusalem ka teh ding hi. Mi khatin kuang a nulkhiat bangin Jerusalem ka nulkhia dinga, nul kawmin ka lumlet ding hi. 14 Ka gouluah a baanglaite ka taisan dinga, a galte uh khut sungah ka pia ding hi. A galte khempeuh uh adingin amaute galmat le van kinusia a suak ding uh hi, 15 bang hang hiam cih leh amaute ka muhna ah a sia in gamta uh a, a pute uh Egypt pana a paikhiat ua kipan tuni dong hong phinin hong hehsak uh hi,” a ci hi. ^d

16 Tua tham loin, TOPA mit ah amaute a sia-a a gamtat nadingun Judah-te mawhna a bawlsak banah - Manasseh in mawhpengte sisan tampitak luangsaka, Jerusalem mong khat pan mong khat dong a dim hi.

17 Manasseh uk sunga thupiang dangte le ama sepsate, a bawl mawhnate Judah kumpite khangthu ciamtehna laibu sungah kigelh khin hi lo ahi hiam? 18 Manasseh a pate tawh tawlnga khawm a, ama kumpi-inn huang Uzza huanah a kivui hi. Tuateh ama tapa Amon in a kumpi za luah a kumpi a suak hi.

Judah Kumpi Amon

19 Amon kumpi a suahin a kum sawmnih le nih pha a, Jerusalem ah kum nih sung a uk hi. A nu min Meshullemeth hi a, Haruz tanu hi-in Jotbah pan ahi hi. 20 Amah in a pa Manasseh hihsa bangin TOPA mit ah a sia in a gamta hi. 21 A pa totsa lampi teng tawn hi; a pa biaksa milimte mah bia-in tuate mai-ah a kun hi. 22 Amah in TOPA, a pate’ Pasian taisan-a, TOPA lampi a tawn kei hi.

23 Amon’ uliante in amah sawmsim uh a, a kumpi-inn ah kumpipa a suamlum uh hi. 24 Tua ciangin gam mite in kumpipa a suamsim khempeuh that uh a, ama munah a tapa Josiah kumpi a suaksak uh hi. ^e

25 Amon uk sunga thupiang dangte le ama sepsate Judah kumpite khangthu ciamtehna laibu sungah kigelh khin hi lo ahi hiam? 26 Amah Uzza huan sunga ama hanah kivui hi. Tuateh a tapa Josiah in a kumpi za luah a kumpi a suak hi.