2Sa 20 | ZomZIV | STEP | Tu-in Benjamin mi Bicri’ tapa Sheba min nei buaina bawlpa khat tua lai-ah na om kha hi. Amah in pengkulmutin, “David ah tanh i nei kei hi, Jasse’ tapa ah i kihel kei hi! Israel aw, na puanbuk ciat uh zuan un,” a ci hi.

2 Samuel 20

Sheba in David Lehdo

1 Tu-in Benjamin mi Bicri’ tapa Sheba min nei buaina bawlpa khat tua lai-ah na om kha hi. Amah in pengkulmutin,

“David ah tanh i nei kei hi,
Jasse’ tapa ah i kihel kei hi!
Israel aw, na puanbuk ciat uh zuan un,” a ci hi.

2 Tua ciangin Israel mi khempeuh in David taisan uh a Bicri’ tapa Sheba a zui uh hi. Ahi hangin Judah mite in Jordan panin Jerusalem dong lam tawntungah amau kumpipa mah a zui cinten uh hi.

3 Jerusalem a kumpi inn ah David a ciah kik ciangin kumpipa in inn kem dinga a koih a zino sawmte samin inn khatah koiha, a cingsak hi. Amaute an vaka ahi hangin a luppih kei hi. Amaute a sih dongun meigongin a kikhumcip hi. ^a

4 Tua ciangin kumpipa in Amasa kiangah, “Ni thum sungin Judah mite ka kiangah kikhawmsak inla nang mahmah hiah ompah in,” a ci hi. 5 Ahi hangin Judah-te khawm dingin Amasa a pai ciangin kumpipa seh hun sangin sawt a beisakzaw hi. ^b

6 David in Abishai kiangah, “Tu-in Bicri’ tapa Sheba in Absalom sangin ei tungah siatna a tungsak zaw ding hi. Na topa’ nasemte tawh na va delh kei uh leh kulha ki-um khuapi tuhin a suakta kha ding hi,” a ci hi. 7 Tua ciangin Joab mite le Kereth-te le Peleth-te, mi thahat galhang khempeuh Abishai in ukin a kuankhia uh hi. Bicri’ tapa Sheba delh dingin amaute Jerusalem pan a paikhia uh hi.

8 Amaute Gibeon suangpi ah a om laitakun, amaute tawh kimu dingin Amasa a pai hi. Joab in a galkap puanpi silh-a a paai-a kisiat temtazum khat a kivawh kawnggak khat a kawngah a gak hi. A mailam ah a pai laitakin a paai panin a kidokkhia hi.

9 Joab in Amasa kiangah, “Sanggam aw, na dam hiam?” a ci hi. Tua ciangin Joab in a ziatlam khutin a khamul ah manin a nam hi. 10 Joab in temtazum a tawi lam Amasa in awlmawh kha lo-a, Joab in a gilpi ah dawtin a gilzang leilakah a luangkhia hi. Dawt beh kul loin Amasa a si hi. Tua ciangin Joab le a sanggampa Abishai in Bicri’ tapa Sheba a delh uh hi.

11 Joab mite khat Amasa gei-ah dingin, “Joab guma David mi ahi peuhmah in Joab zui ta un!” a ci hi. 12 Lampi laizanga a sisan lakah Amasa kidiah in lum-a tua a mu galkapte khempeuh tua lai-ah a khawl uh hi. Tuapa in Amasa omna a tung masasa a khawl a muh ciangin lampi panin lopaang ah kaikhia-a a tungah puan khatin a khuh hi. 13 Lampi panin Amasa a kihepkhiat khit ciangin Bicri’ tapa Sheba delhin Joab nungah mi khempeuh a paisuak uh hi. ^c

14 Sheba in Abel Beth Maacah ^{▼▼20.14 Ahikeh Abel, Beth nangawn; tg. 15 ah zong} dong Israel behte khempeuh nawksuakin Ber mite omna kual khempeuh tawnsuak-a, amaute a vekpi un kikaikhawmin amah a zui uh hi. 15 Joab galkapte khempeuh pai-in Sheba omna Abel Beth Maacah a umcih uh hi. Amaute in khuapi umcih in lei sungvum uh a, kulh pualam ah a ding uh hi. Amaute in kulh phukpai dingin a phut damdam uh ciangin, 16 khuapi panin numei pil khat in, “Na ngai dih un! Na ngai dih un! Joab tawh ka kiho nuam hi, hiah hong sapsak dih un,” ci-in a awng hi. 17 Amah tuanu lam manawhin pai-a tuanu in, “Nang Joab na hi hiam?” ci-in a dong hi. ^e

Amah in, “Ka hi hi,” a ci hi.

Tuanu in, “Na nasemnu hong gen ding na ngaihsak in,” a ci hi.

Amah in, “Ka ngai hi,” a ci hi.

18 Tuanu in zom lai-a, “Sawtpek lai-in amaute in, ‘Abel ah nang hong kidawng hi,’ ci uh a, tua in thu a siangsak hi. 19 Israel ah kote, a kilem a muanhuai ka hi uh hi. Nang in Israel sunga mi khat ahi khuapi suksiat na sawm hi. Bang hangin TOPA gouluahna nawmvalh nuam na hi hiam?” a ci hi. ^f

20 Joab in, “Hi deksuai kei! Nawmvalh le siatsak a sawm ka hi peuhmah kei hi! 21 A thu tua hi lo hi. Ephraim mualtung gam pana Bicri’ tapa Sheba min neipa in kumpipa David langah a khut liikto hi. Hih mipa hong pia peuh le uh cin khuapi pan ka nungkik ding hi,” ci-in a dawng hi.

Numei in Joab kiangah, “A lutang kulh panin nang hong kilot ding hi,” a ci hi. ^g

22 Tua ciangin tua numei ama ngaihsutna pilna tawh mi khempeuh kiangah pai-a, amaute in Bicri’ tapa Sheba lutang tankhia-in Joab a lot uh hi.Tua ciangin amah in pengkul muta, khuapi panin a mite kikhenthangin amau inn ciatah a ciah uh hi. Tua ciangin Jerusalem a kumpipa kiangah Joab a ciah kik hi. ^h

23 Joab in Israel galkap buppi uk a: Jehoiada’ tapa Benaiah in Kereth-te le Peleth-te ukin; 24 Adoniram ^{▼▼20.24 Septuagint khutgelh pawlkhat (1Ku. 4:6 le 5:14 en in) Hebrew in Adoram} in zawhthawhthu-a nasemte cinga; Ahilud’ tapa Jahoshaphat, thu ciamteh hi in; 25 Sheva thuvanpi hi a; Zadok le Abiathar siampi hi in; 26 tuateh Jair-te Ira David siampi ahi hi. ^j