Act 4 | ZomZIV | STEP | Peter le John in mipite tungah thu a gengen laitakun siampite, biakinnpi cing makaipa le Sadducee-te va pai uh hi.

Acts 4

Sanhedrin Mai-ah Peter le John

1 Peter le John in mipite tungah thu a gengen laitakun siampite, biakinnpi cing makaipa le Sadducee-te va pai uh hi. 2 Sawltakpite in Jesu ah misite a thawhkikna mipite tungah hilhin a tangkona un, amaute a lungzingsak mahmah hi. 3 Amaute in Peter le John man uh a, nitaklam ahi manin a zingciang dong thong sungah a khum uh hi. 4 Ahi hangin amaute thupuak a za mi tampi in um uh a, pasal tulnga bang pha ta hi. ^a

5 A zing ciangin gam-ukte, upate le thukham siate Jerusalem ah a kikhawm uh hi. 6 Tua lai-ah tulpi Annas om a, amah tawh Caiaphas, John Alexandar le adang tulpite innkuanpihte zong a om hi. 7 Amaute in Peter le John a mai-uah dingsak uh a: “Bang vangliatna le bang min tawh hih bawl na hi uh hiam?” ci-in a dong uh hi. ^b

8 Tua ciangin Khasiangtho tawh Peter kidima, amaute kiangah, “No gam-ukte le upate aw, 9 mipoi khat tunga migitna nasep hangin amah bangci dam hiam cih thusitna thuak dingin tuni-in ko hong kisam ahileh, 10 note le Israel gama midangte khempeuh in hih thu thei ta un. A dam siang sinsensa a note mai-a ding hih mipa pen, note in na kilhlup uh, ahi hanga Pasian in misi pana a thawhkiksak pa Nazareth mi Jesu Christ min hanga dam ahi hi. 11 Amah,

“‘No innlamte nolh suang,
inntungkhum ^{▼▼4.11 Ahikeh innkiu suang} suang a suak ahi hi,’ ^{▼▼4.11 Ph. 118:22}

12 Midang khat beek sungah hotkhiatna a om kei hi. Ahang in, eite kihotkhiat nading van kikhupsin nuai-a mihing tungah a kipia, min dang a om kei hi,” a ci hi. ^e

13 Amaute in Peter le John a hanna mu uh a, lai siam lo mi mawkmawk ahilam uh thei uh ahi ciangin lamdang sa-in hih mite Jesu tawh a om khawm uh hi, cih a phawk uh hi. 14 Ahi hangin cina a damsakpa uh amau tawh ding khawm a muh theih manun bangmah a gen thei kei uh hi. 15 Tua ahi ciangin Sanhedrin panin kihemkhia dinga thu a piak khit uh ciangin, amaute thu a kikum uh hi. 16 Amaute in, “Hih mite bang cih ding i hi hiam? Jerusalem a teng mi peuhmah in lah, nalamdang thupi khat a bawl uh thei uh a, i nial nading lah a om kei hi. 17 Ahi hangin tu-a ban, hih thute milakah a kizelhbeh nawn loh nadingin kham ni. Hih min tawh mi khatpeuh tungah thu a gen nawn loh nadingun i vauhilh kul hi,” a kici uh hi. ^f

18 Tua khit ciangin amaute sam kik uh a, Jesu minin thu gena, a hilh nawn het loh nadingun thu a pia uh hi. 19 Ahi hangin Peter le John in “No le no kingaihsun dih un, Pasian mitmuhna ah Pasian thu sangin no thu kong man ding uh, koi maanzaw ding ahi hiam? 20 Ahang in, ka muhsa uh le ka zaksa uh thu gen loin ka om thei kei uh hi,” ci-in a dawng uh hi. ^g

21 A nasia zaw in tawng’ uh a, tua khit ciangin amaute a paikhiasak uh hi. A piangsa thu hangin mi khempeuh in Pasian phat uh ahi manin, amaute in gawtna a piak nading uh a khensat thei kei uh hi. 22 Ahang in, a lamdangtaka kidamsak tua mipa kum sawmli val upa ta hi.

Thu-umte Thungetna

23 Peter le John a kikhah ciangin amau mite kiangah pai kik uh a, amaute tunga siampi makaite le upate thugen khempeuh a zasak uh hi. 24 Amaute in hih thu a zak uh ciangin a aw uh sangsakin Pasian kiangah thu a ngen khawm uh hi. Amaute in, “Thuneipipen Topa aw, vantung, leitung, tuipite le a sunga omte khempeuh na bawlsa ahi hi. 25 Na nasempa ka pa uh David kam tawnin Khasiangtho-in na gen a:

“‘Bang hang minamte heh a,
mite in a mawknapi sawmsim uh hiam?
26 Topa langa pang ding le
a Sathau Nilh-pa ^{▼▼4.26 Tua pen Christ ahikeh Messiah} langpang dingin,
leitung kumpite panmun la-in,
gam-ukte a kikhawm uh hi,’ ^{▼▼4.26 Ph. 2:1,2} ci hi.

27 Hi takpi hi. Herod le Pontia Pilate in Gentile-te le hih khuapi sunga Israel mite ^{▼▼4.27 Greek ah a tam genna} tawh kimu khawmin na sathau nilhsa pa, na nasem siangtho Jesu langpang dingin kithuhual uh hi. 28 Amaute in nang vangliatna le nang deihna-in a piang dinga a khentat kholsa bangin sem uh hi. 29 Tu-in Topa aw, amaute hong tawnna ngaihsun inla, hangtaka na thu a gen dingin na nasemte hihtheihna lianpi hong guan in. 30 Na nasem siangtho Jesu min tungtawnin cina damsaka, a lamdang limte lak ding le a lamdang tuamtuamte hih dingin na khut hong zankhia in,” a ci uh hi. ^k

31 Thu a nget khit uh ciangin amau te kikhopna mun a ling hi. Amaute khempeuh Khasiangtho tawh kidim uh a, Pasian thu hangtakin a gen uh hi. ^l

Thu-umte in A Neihsate uh Neikhawm

32 Thu-umte khempeuh, lungsim le ngaihsutna kikhatin a om uh hi. Amau neihsate kuamah in aituamin nei lo uh a, ahi hangin a neih khempeuh uh a neikhawm uh hi. 33 Sawltakpite in, vangliatna lianpi tawh Topa Jesu thawhkikna teci pang uh a amaute khempeuh tungah hehpihna tampitak a tung hi. 34 Amaute lakah a kitasam a om kei hi. Ahang in, leitangte ahikeh inn neite in a hunhunin zuak uh a, a khot uh sumte, 35 sawltakpite khe phungah koihin a kitasam peuhpeuh tungah a hawm uh hi. ^m

36 Cyprus pan, Joseph kici Levi mi khat, sawltakpite in Barnabas (Hanthawnna Tapa cihnopna) a cih uh mipa in 37 lo khat a neih zuak a, a sum paipihin sawltakpite khephungah a koih hi. ⁿ