Amo 3 | ZomZIV | STEP | Israel mite aw, note langkhata TOPA thugen hih thu za un - Egypt pana kong paikhiatpih innkuante aw, hih thu ngai un:

Amos 3

Israel Langah Tecite Kisam

1 Israel mite aw, note langkhata TOPA thugen hih thu za un - Egypt pana kong paikhiatpih innkuante aw, hih thu ngai un: ^a

2 “Leitung a innkuan khempeuh panin
note bek kong teel hi; ^b
tua ahi manin na mawhna khempeuh uh hangin
dan kong pia ding hi,” a ci hi. ^c
3 A kithutuak lo
minih tonkhawm thei ahi hiam?
4 A mat ding sa a muh loh ciangin
sephih laka humpinelkai mawk hawk ahi hiam?
Bangmah a mat loh ciangin a kua sungah
mawk humham ahi hiam?
5 Lei lakah thang-antah kitah lopi-in
thangah vasa mawk awk ahi hiam?
A sukha om lopi-in
thang kimawk sai ahi hiam?
6 Khuapi sungah pengkul a kimut ciangin
mite ling lo uh ahi hiam?
Khuapi sungah siatna a tun ciangin
TOPA tunsak loh-a tung ahi hiam?
7 Hi takpi hi, Thupipen TOPA in
ama geelna, a nasem kamsangte tungah
a laak lohin bangmah a sem kei hi.
8 Humpinelkai hawk khin hi -
kua in kihta lo ahi hiam?
Thupipen TOPA in gen khin hi -
kamsangte lo kua in gen ding hiam?
9 Ashdod kulh muanhuaite le
Egypt kulh muanhuai-te ah tangko in:
“Samaria mualtungah hong kikhawm unla
ama mite laka buaina lianpi le
kinetniamnate hong en un,” ci un.
10 TOPA in, “Amaute in amaana gamtat ding thei lo uh a, ^d
a kulh muanhuaite uh mite’ na a suhte uh tawh a dim uh hi,” a ci hi

11 Tua ahi manin Thupipen TOPA in:

“Galte in gam khempeuh zogawp dinga,
na mun muanhuaite uh phukpai-in,
na kulhpite uh a luhgawp ding uh hi,” a ci hi.

12 Hih in TOPA gen ahi hi:

“Tuucingpa in humpinelkai kam panin ^e
a kheguh nih ahikeh a bil them khat a ngah bangin,
Samaria sunga
a lupna mong uh le
Damascus a amaute tutna-zal kiu-a tu ^f
Israel-te bek kihonkhia ding hi. ^{▼▼3.12 Hebrew ah hih laigual a cihnopna kician lo hi.}

13 “Topa Thahatpen Pasian, TOPA in: “Hih thu za unla Jacob innkuante langah teci pang un,” a ci hi.

14 “A mawhna hanga Israel ka dantat ni ciangin,
Bethel biakna-tau ka susia ding hi; ^h
biakna-tau kite kisutanin
lei-ah kiasuak ding hi.
15 Keimah in phalbi inn le ⁱ
khuakhal inn ka phelkhia ding hi; ^j
saiha a kizem innte kisusia-in ^k
inn thupite a kisia ding hi,” ^l

TOPA in cikhia hi.