Dan 11 | ZomZIV | STEP | (Na gam-ukpa uh Michael longal kuamah in kei hong panpih lo hi. Kei in Mede mi Darius a kum khatna kumin amah panpih in ka dal hi.)

Daniel 11

1 (Na gam-ukpa uh Michael longal kuamah in kei hong panpih lo hi. Kei in Mede mi Darius a kum khatna kumin amah panpih in ka dal hi.) ^a

Leilu-lam le Leitaw-lam Kumpite

2 “Tua ciangin, tu-in thutak kong geninah: Persia ah kumpi dang thum hong khang dinga, tua khit ciang adang khempeuh sangin a hauzaw tham ding alina hong khang ding hi. Ama hauhna hangin a vangliat ciangin Greece kumpi-gam langpang dingin mi khempeuh a tokbuai ding hi. 3 Tua ciangin a thahat kumpi khat khang dinga, tuapa vanglian mahmah in a ut bangbangin gamta ding hi. 4 Amah a liat khit ciangin a gam kikhenkham dinga vantung huih lite manawhin kikhenthang ding hi. Ama suante in luah lo tham loin a zatsa a vangliatna zong a nei kei ding hi, bang hang hiam cih leh ama ukna gam kibulkalh dinga midangte kipia ding hi. ^b

5 “Leitaw-lam kumpipa thahat dinga, ahi hangin ama galkap mang liante khat amah sang thahatzaw-in ama aituam kumpi-gam alian vangliatna tawh a uk ding hi. 6 Kum sawtsim khit ciangin amaute kipawlkhawm ding uh hi. Leitaw-lam kumpipa tanu, kipawlna bawl dingin leilu-lam kumpipa kiangah a pai ding hi; ahi hangin tuanu in a vangliatna lensuak lo dinga, tuapa le a vangliatna ^{▼▼11.6 Ahikeh A suan le khakte} zong a kip kei ding hi. Tua ni ciangin tuapa le a tonpih amah a cingte a pa ^{▼▼11.6 Ahikeh naupang (Vulgate le Syriac en in)} le amah a huh peuhmah tawh a ki-apkhawm ding hi.

7 “Ama muna om dingin ama gui pana piang khat a khangkhia ding hi. Tuapa in leilu-lam kumpipa galkapte sim dinga, kulh sung luhgawp ding hi; amaute do-in a gualzo ding hi. 8 A pasiante uh, sik milimte le ngun le khama kibawl a vanzatte uh matsakin Egypt ah a pua ding hi. Kum tawmvei sung leilu-lam kumpipa a sim nawn kei ding hi. 9 Tua ciangin leilu-lam kumpipa in leitaw-lam kumpipa gam sim dinga, ahi hangin ama gamah a nung kik ding hi. 10 A tapate galsim dingin kiging ding uh a galkap tampi a khawm ding uh hi; tuate in tuikhang dallah bangin kulh a tun dongun nawhsuak ding uh hi. ^e

11 “Tua ciangin leitaw-lam kumpipa hehsa in kuankhia dinga leilu-lam kumpipa a do ding hi; tuapa in galkap tampi a kuanpih hangin kizo veve ding hi. 12 Galkapte a kipaikhiatpih ciangin leitaw-lam kumpipa kiphasakin tul tampi ngawng-at dinga, tua hi napi a gualzo suak kei ding hi. 13 Ahang in, leilu-lam kumpipa in a masa sanga tamzaw galkap kaikhawm dinga kum tampi khit ciangin galhiam cingtaka a nei galkap honpi tawh a kuan ding hi.

14 “Tua hun ciangin leitaw-lam kumpipa langah mi tampi a pang ding uh hi. Mangmuhna a tangtun nadingin na mipihte lak panin a ngonghtatte in lehdo ding uh a, a zo tuan kei ding uh hi. 15 Tua ciangin leilu-lam kumpipa kuanin khuapi umcihna lei sungvumin kulh-a ki-um khuapi a la ding hi. Leitaw-lamte in nang zo lo ding uh a, a galkap hon siampente nangawn un zong a nang zo kei ding uh hi. 16 Gal va simpa in a ututin bawl dinga ama langah a nangzo kuamah a om kei ding hi. Gam Melhoih ah amah le amah kikipsakin a suksiat nading hatna a nei ding hi. 17 A kumpi-gam bup hatna teng tawh amah pai-in leitaw-lam kumpipa tawh kipawl a sawm ding hi. Amah in kumpi-gam a zawhgawp theih nadingin a tanute khat tawh amah kitengsak dinga, ahi zongin ama geelnate ^{▼▼11.17 Ahikeh ahi hangin tuanu} tangtung loin zong a huh thei tuan kei ding hi. 18 Tua ciangin tuipi gei lam sim sawm dinga, amaute tampi a la ding hi; ahi hangin ama hiamgamhna galkap mang khatin zo dinga, ama hiamgamhna ama tungah a tukik ding hi. 19 Hih teng khit ciangin kulha ki-um a gam zuanin kileh kik dinga ahi hangin kimuktu in a puk ding hi; amah a kimukha nawn kei ding hi.

20 “Ama zalaihpa in kumpi thupi nadingin siahdong khat a kuankhiasak ding hi. Ahi ta zongin kum tawmno sungin hehna le gal ahi loin amah a kisusia ding hi.

21 “Ama za pen kumpi zahtakna a kipia nai lo mi zahtak huai lo khat in laih ding hi. Kuamah in a awlmawh loh ciangin kumpi-gam sim dinga zuau siamna hangin a zo ding hi. 22 Tua ciangin zawhlah a nei lo galkap honpi, ama mai panin a kisiakmai ding hi; tuate le thukhunna bawl gam ukpa a kisusia khawm ding hi. 23 Amah tawh kilemna a bawl khit ciangin zuautat dinga mi tawmno tawh a vanglian ding hi. 24 Gam haupite a lungmuan uh ciangin va sim dinga a pu a pate hihzawh ngei loh a hih zo ding hi. Gal sunga a ngah uh vante, vanlakte hauhnate a nungzui-te a hawmsak ding hi. Kulhpite zawhgawp sawm dinga - ahi hangin tawlkhat sung bek ahi ding hi.

25 “Leitaw-lam kumpipa sim dingin galkap tampi tawh a thahatna le a hangsanna satsuah ding hi. Leitaw-lam kumpipa in zong a thahat mahmah galkap tampi tawh a na do ding hi, ahi hangin amah a kisawmsimna hangin a nang zo kei ding hi. 26 Kumpipa tawh an nete in amah siatsak ding hanciamin, a galkapte kivatmai dinga gal sungah tampi a si ding hi. 27 Kumpi nih sabuai khatah tukhawmin a lungsim uh gilo tuak ahi manin khat le khat kikhem ding uh a, ahi hangin a lawhcing kei ding uh hi; bang hang hiam cih leh a tawpna dinga kisehsa hun tung lai ding hi. 28 Leilu-lam kumpipa neih le lam tampi tawh a gamah ciah kik dinga ahi hangin a lungsimin a siangtho thukhun a langpan ding hi. A ut bangin mawhsak dinga tua ciangin a gamah a ciah ding hi. ^g

29 “A kisehsa hun a cin ciangin leitaw-lam sim leuleu dinga, ahi hangin hih hun ciangin a masa lai-te tawh kibang lo ding hi. 30 Nitumna gam ^{▼▼11.30 Hebrew in Kittim} tuipi tembawpite in na do ding uh a, a lungkia ding hi. Tua ciangin kileh kikin thukhun siangtho tungah a hehna a tusak ding hi. Amah kileh kik dinga thukhun siangtho a thusim lote a angvan ding hi. ⁱ

31 “Agalkapte in biakinnpi um-in kulh buahsakin nisim biakpiakna a beisak ding uh hi. Tua ciangin amaute in a hawmmangsak kihhuaina a koih ding uh hi. 32 Amah in thukhun a nusiate a siatsak nadingin zuau gen siamna zang dinga ahi hangin amau Pasian a theite in kiptakin a nang ding uh hi. ^j

33 “A pilte in tampi thuhilh ding uh a, ahi zongin tawlkhat sung amaute namsau ahikeh meikihal ahikeh kiman ahikeh galmatin a kikai ding hi. 34 Amaute a puk uh ciangin huhna tawmbang ngah sam ding uh a, a citak lo mi tampi in amaute a pawl ding uh hi. 35 A pil pawlkhatte a bei hun dong kawk bang lo-a a om nadingun kisiansuahin kisiangthosak dinga, amaute a muktu ding uh hi, tua hun pen a kiciangtan hun a tun mateng hi ding hi. ^k

Amahmah Kitawisang Kumpipa

36 “Tua kumpipa a ut bangbangin gamta ding hi. Amahmah pasian kici peuhmah tungah kitawisangin kiliansak dinga pasiante’ Pasian langpanna a kiza ngei lo nate a gen ding hi. Thangpaihna a kim hun mateng a gualzo ding hi; ahang in, a kisehsa peuhmah a tun pelmawh kul hi. 37 Amahmah, a pate’ pasiante, numeite deihte le pasian khatpeuh thusim loin tuate khempeuh sanga sangzaw in kitawisang ding hi. 38 Tuate tangin kulh cing pasian peuh pahbawlzaw dinga; a pate theih loh pasian, ngun le kham, suangmanpha le tampipi man letsongin a pahtawi ding hi. 39 Gamdang pasian huhna tawh a khauh penpen kulh sim dinga amah kumpi-a a sangte nasiatakin a pahtawi ding hi. Amaute tampi uksak dinga aman ^{▼▼11.39 Ahikeh pahtakman leitang} tawh kizui-in leitang a hawm ding hi. ^m

40 “A bei ding hun ciangin Leitaw-lam kumpipa in kisim dingin thu zasak dinga, Leilu-lam kumpipa a sakol galkapte, sakolleng le gal tembaw tampi tawh a kuankhia ding hi. Gam tampi sim dinga tuikhang bangin a nawtmai ding hi. 41 Gam Melhoih zong va sim ding hi. Gam tampi in lel dinga ahi hangin ama khut panin Edom, Moab le Ammon makaite kihukhia ding hi. 42 Amah in gam tampi tungah a vangliatna khan ding hi; Egypt a suakta kei ding hi. 43 Amah in ngun le kham goukholnate le Egypt hauhna khempeuh ukin Libya-te le Nubia-te ama tungah a ki-ap ding uh hi. 44 Ahi hangin nisuahna-lam le leilu-lam pana thuzaksaknate in amah lauthawngsak ding hi. Thangpai lua-in a susia ding le tampi a sumaimang dingin a kuankhia ding hi. 45 Amah in a kumpi puanbukte tuipite kikal ^{▼▼11.45 Ahikeh tuipi le} mual siangtho melhoih ah a lam ding hi. Tua hi taleh ama hun bei dinga kuamah in a huh kei ding hi. ^o