Deu 17 | ZomZIV | STEP | TOPA note Pasian in kihhuai sa ding ahi manin ama tungah bawngtal ahi a, tuu ahi zongin a poi, a melhem khatpeuh biakna-in zang kei un.

Deuteronomy 17

1 TOPA note Pasian in kihhuai sa ding ahi manin ama tungah bawngtal ahi a, tuu ahi zongin a poi, a melhem khatpeuh biakna-in zang kei un.

2 TOPA in note hong piak khuate khatah note laka teng numei ahikeh pasal khat in TOPA note Pasian muhna ah a thukhun palsatin gitlohna a bawl a kimuh a 3 ka thupiak tawh kilehbulhin pasian dangte, vana ni, kha, aksite ahi zongin bia-in a kuna, 4 hih thu no omna ah hong kitut leh siangthotakin kantel pelmawh un. Hih thu amaan ahi-a, Israel sungah hih a kihhuai na a kisem khin takpi ahileh, 5 hih asia-a gamta numei ahikeh pasal, khuapi kongpi ah paipih in tua mi denglum un. 6 Mi nih ahikeh thum theihpihna-in kithat dinga ahi hangin mi khatbek theihpihna-in kuamah a kithat kei ding hi. 7 Tecite khat a that masa in pang pelmawh dinga, tua ciangin mi khempeuh hi pan ding hi. Note lak pan pelloin gitlohna na beimangsak ding uh hi. ^a

Thukhen Zumte

8 Note khen dingin a haksa lua - sisan kisuahna, thu kituhna ahikeh kilaina - thu na zum uh hong tun leh TOPA note Pasian teel nading munah amaute puak un. 9 Siampi ahi Levi-te kiangah pai unla tua huna zum-a om thukhente khensak un. Amaute thu dongin thukhen-satna hong pia ding uh hi. 10 TOPA in a teel nading muna amaute hong piak thukhensatna bangin na sem pelmawh ding uh hi. Amaute in no hong lamlah bangin na khempeuh kidawmtakin hih un. 11 Amaute hong hilh thukham le amaute hong piak thukhensatna bangin gamta un. Amaute hong gen bangin vei lam ahikeh ziat lam ah pial kei un. 12 Thukhenpa ahi-a TOPA note Pasian mai-ah dingin nasem siampipa ahi zongin a simmawhpa kithat pelmawh ding hi. Israel panin gitlohna na beimangsak pelmawh ding uh hi. 13 Tua hileh mi khempeuh in za-in lau ding uh a, a kisimmawh kik nawn kei ding hi.

Kumpipa

14 TOPA note Pasian in hong piak ding gam ah lutin luah a na ten khit uh, “I kim i pama om minam khempeuh bangin ei hong uk ding kumpi khat koih ni,” na cih uh ciangin, 15 note hong uk dingin TOPA note Pasian teelsa kumpi bek koih un. Amah note sanggamte lak pan hi pelmawh ding hi. No hong uk dingin Israel-te sanggam ahi lo gamdang mi koih kei un. 16 Tua banah kumpipa in ama aituamin sakol tampitak a nei thei kei ding hi, tua bang hileh TOPA in, “Tua lampi tawnin na kileh kik nawn kei ding uh hi,” ci khin ahi manin sakol leithuah dingin Egypt ah mite a kilehsak kik kha ding hi. 17 A lungsim lam khialsak ding ahi manin zi tampi a nei kei ding hi. Amah in ngun le kham a tamlua a zonthuah kei ding hi. ^b

18 Amah kumpi-gam kumpi tokhom ah a tut ciangin Levi-te ahi siampite tung panin a kila thukham bu khat ama adingin laizial khatah a teikhia ding hi. 19 TOPA ama Pasian, a zahtak theih nading le a thukham kammalte le a thukipte limtakin a zuih theih nadingin amah le tua omkhawmin a nuntak sungteng a sim ding hi; 20 ama sanggampa sangin a hoihzaw in kingaihsun lo-a, thukham panin veilam ahikeh taklamah a pial loh nading ahi hi. Tua hileh amah le ama kumpi sepna Israel gam, amah le a suan a khakte in sawtpi a uk ding uh hi. ^c