Deu 20 | ZomZIV | STEP | Na galte uh sim dingin kuana, note sangin a lianzaw galte, sakolte le lengte na muh uh ciangin lau kei un, bang hang hiam cih leh Egypt pana hong paikhiatpih to TOPA note Pasian in hong ompih ding hi.

Deuteronomy 20

Galkuanna

1 Na galte uh sim dingin kuana, note sangin a lianzaw galte, sakolte le lengte na muh uh ciangin lau kei un, bang hang hiam cih leh Egypt pana hong paikhiatpih to TOPA note Pasian in hong ompih ding hi. 2 Gal sim dinga na kuan uh ciangin siampipa a mai-ah pai-in galkapte tungah thu a gen ding hi. 3 Amah in, “Israel aw, za in, tuni-in na galte uh do dingin a kuan ding na hi ta uh hi. Lungsi kei unla lau kei un; amaute mai-ah linglawngin patau kei un. 4 Ahang in, TOPA note Pasian in na galte uh hong zosak dingin amaute langkhatah pangin note hong dopih dingin hong tonpih hi,” a ci ding hi.

5 Uliante in galkapte tungah; “Inn thak lama a ap nai lo a om hiam? Ciahsak un, amah gal sungah si-in midang khatpeuh in a inn na ap kha ding hi. 6 Lenggui suana a nekha nai lo a om hiam? Ciahsak un, amah gal sungah si-in midang khatpeuh in ne kha ding hi. 7 Lawm dong khina zipi nai lo a om hiam? Ciahsak un, amah gal sungah si-in midang khat in a pi kha ding hi,” ci-in a gen ding hi. 8 Tua ciangin uliante in, “A lau a, a lungsi dedu na om uh hiam? A sanggamte lungkiasak kha ding ahi manin amah ciahsak un,” a cih beh lai ding hi. 9 Uliante in galkapte tungah thugen a man khit uh ciangin amaute a uk ding a seh ding uh hi. ^a

10 Khuapi khat sim dinga na kuan khiat uh ciangin a mite tungah kilem ding gen masa un. 11 Amaute in hong san theih uh a, a kongpite uh hong hon uh leh a sunga om mi khempeuh na nasem uh suak ding uh hi. 12 Amaute kilem ding ut loin kido a kul leh a khuapi umcih un. 13 TOPA note Pasian in note khut sungah hong piak ciangin a sunga om mi khempeuh namsau-in that un. 14 Numei, naupang, ganhingte le khuapi sunga na peuhmah gal-vanlak in no adingin na la thei ding uh hi. Na galte uh tung pana TOPA note Pasian in hong piak vante na zang thei ding uh hi. 15 Hih in na kimnai-ua om minamte tawh kisai hi loin no tawh a kigamla khuapi khempeuh na bawl nading uh ahi hi. ^b

16 Bangbang ahi zongin TOPA na Pasian un na luah dingun hong piak ding minamte’ khuapite sungah a nungta bangmah hingkhawi kei un. 17 TOPA note Pasian in hong thupiaksa bangin Hit-te, Amor-te, Canaan-te Periz-te, Hiv-te le Jebus-te susia ^{▼▼20.17 Hebrew lai ah TOPA} kiuhkeuh un. 18 Na tua cih kei uh leh amau pasiante biakna-a a hih uh a kihhuai na khempeuh na zuih dingun hong hilh ding uh a, TOPA note Pasian langah na mawh ding uh hi.

19 Khuapi khat a la dingin sawtveipi na umcih uh ciangin khuapi-a singkungte hei-in phukin nusia kei un, bang hang hiam cih leh a gah na ne thei ding uh hi. Tuate phukpai kei un. Na umcih tua lopaanga singte mihing ahi hiam? ^{▼▼20.19 Ahikeh umcihna a kizang hi, ahang in, nektheih singkungte mihingte met nading ahi hi.} 20 Ahi ta zongin, nek theih kung hi lo hi, ci-a na theihte uh na um uh khuapi na zawh matengun umcihna-a na zat dingun na phuk thei ding uh hi.