Deu 28 | ZomZIV | STEP | TOPA note Pasian thu kimtakin manga, tuni-a kong piak ama thupiakte khempeuh limtakin na zuih uh leh TOPA note Pasian in leitunga minam khempeuh tung pekah hong koih ding hi.

Deuteronomy 28

Thuman’na hanga Thuphate

1 TOPA note Pasian thu kimtakin manga, tuni-a kong piak ama thupiakte khempeuh limtakin na zuih uh leh TOPA note Pasian in leitunga minam khempeuh tung pekah hong koih ding hi. 2 TOPA note Pasian thu na man uh leh hih thuphate khempeuh no tungah hong tungin hong zui ding hi.

3 Note khuapi sungah thupha hong kipia in khuaneu ah thupha hong kipia ding hi. ^a
4 Note sul pana gahte le na leitang ua ante, na ganhonte-na bawnghonte uh note le na tuuhonte uh pung ding hi. ^b
5 Na seng uh le na annel mekna kuang uh thupha kipia ding hi.
6 Na sungtum ciangin thupha hong kipia dinga, na pusuah ciangin thupha hong kipia ding hi. ^c

7 TOPA in note langa pang galte note mai-ah hong zawhsak ding hi. Amaute lam khat pan hong kuan ding uh a, nang kiang pan lam sagihin a taikek ding uh hi.

8 TOPA in na an salte le na khuta na sepsa peuhmah tungah thupha hong tungsak ding hi. TOPA note Pasian in note hong piak ding gamah thupha hong pia ding hi.

9 TOPA note Pasian hong thupiakte zui-in ama lampi na tot nak uh leh amah tomlo-a a kiciamsa bangin ama misiangtho dingin TOPA in hong kipsak ding hi. 10 Tua ciangin leitung a om mi khempeuh in note, TOPA’ mina hong kisap lam thei-in hong kihta ding uh hi. 11 TOPA in note piak dingin na pate uh tunga a ciamsa gamah - na sul panua gahte, na ganhonte uh note, na leitang pan un a piang ante - tungtawnin na dau uh a paisak mahmah ding hi. ^d

12 TOPA in vantungte le na tampi a kholna inn hongin na gamuah guah a hunin zusak dinga na khut uh tawh na septe khempeuh uh thupha a pia ding hi. Minam tampite na leitawisak ding uh a, ahi hangin no kuama tungpan na leitawi kei ding uh hi. 13 TOPA in a meidawn hi loin a lutangin hong bawl ding hi. Tuni-a note kong piak TOPA note Pasian thupiakte na thupi sim uh a, limtaka na zuih uh leh a tawntungin nuainungpen loin na tungnungpen ding uh hi. 14 Tuni-a kong piak thupiakte khatpeuh panin veilam ahi a taklam ahi zongin pial kei unla, adang pasiante zui loin a na zong sem kei un. ^e

Thuman’lohna Hanga Hamsiatna

15 Ahi hangin note in TOPA note Pasian thu mang loin tuni-a kong piak thupiakte le thukipte limtakin na zuih kei uh leh hih hamsiatnate khempeuh in note hong pha in no tungah hong tu ding hi:

16 Note khuapi ah hong kihamsiat in, khuaneu ah hong kihamsiat ding hi.
17 Na seng uh leh na annel mekna uh kuang a kihamsiat ding hi.
18 Note sul pana gahte kihamsiat dinga, na leitang ua ante, na bawnghonte uh note le na tuuhonte uh note a kihamsiat ding hi.
19 Na sungtum ciangun hong kihamsiat dinga, na pusuah ciangun hong kihamsiat ding hi.

20 Note in amah ^{▼▼28.20 Hebrew ah kei} nusia-in a sia-a na gamtatna uh hangin na khut uh tawh na sepna khempeuhuah TOPA in hamsiatna, taina, buaisakna hong sawl dinga, na kisiat matengun siatpahna hong tungsak ding hi. 21 Note neih dinga na lutna uh gam panin hong siatsak khit matengin TOPA in natnate in hong pulsak ding hi. 22 TOPA in note na manthan matengun, hong vat dinga, thazawm nat, cisa nat, cibawk natna, pol nading zaha nisa, guahtui haang, singno taam le maibuak tawh note hong pulsak ding hi. 23 Note lutunga om van in sumngo hi dinga, note nuai-a om lei in, sik ahi ding hi. 24 TOPA in na gamuah guahtui, leivui le a vuikhu suaksak dinga, na kisiat khit matengun van panin tuate hong zusak ding hi.

25 TOPA in na galte uh mai-ah note hong lelsak ding hi. Amau lam manawhin lam khat in na kuan uh hangin amau kiang pan lam sagihin na taikek ding uh a, leitung kumpi gamte khempeuh ah cikzethuai mahmah na suak ding uh hi. 26 Na luangte uh huih lak vasate le leitung ganhingte an suak dinga, tuate kuamah in a nawhkhia kei ding hi. 27 TOPA in note a kidamsak thei lo natna - Egypt meimatum, pumsung natna, meima gulut, le cithak natna in hong bawlsia ding hi. 28 TOPA in note haina, mit khuamuhlohna, le lungsim buaina-in hong bawlsia ding hi. 29 Suntangpi in mittaw bangin miallak na zawt ding uh hi. Na hihna peuhpeuh uh na zo kei ding uh a, kuama hut lohin, ni khat khit ni khat hong kinuainetin hong kilawk ding hi.

30 Numei khat tawh a teng dingin na kiciam uh hangin midang khat in na la-in a taipih ding hi. Inn khat na lam uh hangin a sungah na tengkha kei ding uh hi. Lenggui na suan uh hangin a gah na nopsakpih man kei ding uh hi. 31 Na muh tangpi un na bawngtal uh hong kigawhsak hangin bangmah na ne kha kei ding uh hi. Na phal lohpi-un na laa uh hong kisut dinga hong kipia kik nawn kei ding hi. Na galte tungah na tuute hong kipiaksak dinga, tuate kuamah in a hu kei ding hi. 32 Na tanu na tapate uh minam dang tungah kipia dinga, nisimin amaute mitpaat liangin na enen ding uh a, na khut khat nangawn uh na liik zo kei ding uh hi. 33 Na theih loh uh mite in no gama piang na sepsate uh ne ding uh a, note in bangmah na neih loh uh hangin na nuntak laisiah uh hong kinengniamin hong kikhelbawl ding hi. 34 Na muhte un hong haisak ding hi. 35 TOPA in a kidamsak thei lo a na valval meimate na khuk uh le na khe uhah hong veisakin tuate na khenuai panun na sipzang dongun a kizelsak ding hi.

36 TOPA in note le no hong uk dinga na koih uh kumpite, note le na pate un na theih loh uh minamte tungah hong hawlkhia ding hi. Tua lai-ah sing le suang pasian - pasian dangte na bia ding uh hi. 37 TOPA in note hong hawlkhiat nading munmun ah minamte khempeuh huat, simmawh le ciamnuihna na suak ding uh hi.

38 Lo ah khaici tampitak na vawh uh hangin kauphe in gai ding ahi manin tawmkha bek na la ding uh hi. 39 Lenggui suanin na khawh uh hangin lung in ne ding ahi manin lenggahzu dawn loin lenggah zong na la kha kei ding uh hi. 40 Gam sung khempeuh ah olive kung na neih uh hangin olive gah pulh ding ahi manin a thau na zang kha kei ding uh hi. 41 Tanute, tapate na neih uh hangin sala pai ding uh ahi manin na kem kha kei ding uh hi. 42 Kauphe honpi in na singkung uh le na gamua ankung khempeuh a gai ding hi. ^g

43 No laka pemtate no tungah khangtoin sang semsem ding uh a, ahi hangin no na kiamsuk semsem ding uh hi. 44 Amah in nang hong leitawi dinga ahi hangin nang amah na leitawi kei ding hi. Amah lutang suak dinga nang a meidawn na suak ding hi.

45 Hih hamsiate khempeuh no tungah hong tung ding hi. TOPA note Pasian’ thu mang loin ama hong piak thupiakte le thukipte zui lo na hi manun note na kisiat matengun tuate in hong nungdelhin hong pha ding hi. 46 Nang le na suan le khakte adingin tuate lim le a lamdang hi tawntung ding hi. 47 Note in na daupai hunun lungnuamtak le lungkimtakin TOPA note Pasian na sem lo na hi manun, 48 gilkial dangtak hun, puan neih loh hun le kitangsap hunin note langkhatah TOPA sawl na galte uh na, na sem ding uh hi. Amah in note hong suksiat khit matengin na ngawnguah sik hakkol hong vawh ding hi.

49 TOPA in a gamlapi, leimong panin note langkhatah a kampau uh na telloh uh minam 50 a kihtakhuai - uhamte a zahtak lo, khangmoite a hehpih lo minam khat muvanlai leilut bangin hong kuansak ding hi. 51 Amaute in na kisiat khit matengun na ganhonte uh note le na gamua piang ante a valhtum ding uh hi. Amaute in na kisiat khit matengun na ante uh, zu thak ahi-a, sathau ahi zongin, na bawnghonte uh note ahi a, na tuuhonte uh note ahi zongin hong nusiat tuan kei ding uh hi. 52 Na muan uh kulh muanhuai sangpipite a puk matengin na gamsung khempeuh ua khuapite khempeuh hong umcih ding uh hi. TOPA note Pasian in hong piak ding gama khuapi om khempeuh amaute in hong umcih ding uh hi.

53 Amaute hong umcih sungin na galte un no hong bawlsiatna na thuakna un TOPA note Pasian in no hong piaksa na sul panun a gah na tanu na tapate uh sa na ne ding uh hi. 54 Note laka mi lungneem a cikzia thei pente nangawn in a sanggampa ahi a, a it a zi ahi a, a nungtasun a tate ahi zongin khuatuah lo dinga, 55 a nek kimlai a tate sa kuamah a hawm kei ding hi. Tua in na galte un na khuapi khempeuh uh a umcih sungin a thuaksiatna uh hanga nek ding a neih lai sun ahi hi. 56 Note lakah mi lungneem a cikzia thei pen numeite - lungneem lua le cikzia lua kisa-in a khenuai le lei a kisukkhak ding nangawn a ut lote in - a it a pasal le ama tanu’ tapate, 57 a sunga piang a ta le a naulamh a pia nuam kei ding hi. Ahang in, na galte un na khuapite uh hong umcihin hong thuaksak uh lungdonna hun sungah tuate a neksim dinga a sawm ahi hi.

58 Hih laibu sunga kigelh hih thukham kammalte limtakin na zuih kei uh a, a minthang a lipkhaphuai min - TOPA note Pasian na zahtak kei uh leh 59 TOPA in no le na suante uh tungah a lauhuai pulpi - sawtveipi a haksa tuahsiatna le a nasia natsaute hong tungsak ding hi. 60 Note in na kihtak uh Egypt natna khempeuh no tungah hong tungsak dinga, note tungah belh den ding hi. 61 Note na siat matengun TOPA in hih Thukham Laibu sungah a kiciamteh lo natna le tuahsiatna namkimte zong no tungah hong tungsak ding hi. 62 TOPA note Pasian thu na man loh manun vana aksi zahin na tam uh hangin tawm no bek na om ding uh hi. 63 Note daupai-in tampi na phak uh ciangin TOPA a lungkim bang tektekin note hong susia dinga na kisiat uh ciangin amah a lungkim ding hi. Note lut-a na neih ding uh gam panin hong kibulkalh ding hi.

64 Tua ciangin TOPA in leimong khat pan mong khat dong minamte lakah note hong thehthang ding hi. Tua lai-ah note in no genloh na pate un zong a theih loh pasian dangte - sing le suang pasiante na bia ding uh hi. 65 Tua minamte lakah na lupna khop genloh na khepek nuai tatna khop zong na mu kei ding uh hi. Tua lai-ah TOPA in na lungsim uh patausakin, lungzuangin na mit uh ngui-in, na lungsim uh a beisak ding hi. 66 Na lunghimawh den ding uh a, sun tawh zan tawh lauthawng in na nuntakna uh na khamuang kei ding uh hi. 67 Zingsangin, “Nitak hi tapeuh leh!” na ci ding uh a, nitak in, “Zingsang hi tapeuh leh!” na ci ding uh hi; - tua pen na lungsim uh launa tawh dimin na mit mahmah un a muh nate hang ahi hi. 68 Note na zin kik ngei nawn kei ding uh hi, ka cihna Egypt ah TOPA in tembaw in hong puak kik ding hi. Tua lai-a na galte uh tungah silanu le silapa dingin na kizuak uh hangin kuamah in hong lei kei ding hi. ^h