Deu 9 | ZomZIV | STEP | Israel aw, za in. Note in Jordan kantanin van a ban kulh a nei khuapi lian mahmahte a teng, no sanga a lianzaw a thahatzawte a suankhia ding na hi ta uh hi.

Deuteronomy 9

Israel’ Thumaanna Hang Hilo

1 Israel aw, za in. Note in Jordan kantanin van a ban kulh a nei khuapi lian mahmahte a teng, no sanga a lianzaw a thahatzawte a suankhia ding na hi ta uh hi. 2 A mite a tunsang, a thahat - Anak-te ahi hi! Amaute thu na theihsa uh hi-a, “Anak-te langah kua pang zo ding hiam?” a kicih na zaksa uh ahi hi. 3 Ahi hangin tuni-in TOPA note Pasian a haltum mei bangin note mai-ah pai taktak ahilam telcian un. Amah in amaute susia dinga, note mai-ah amaute hong zawhsak ding hi. Tuateh TOPA in hong ciamsa bangin amaute hawlkhia dinga, manlangin a phiatmang ding hi. ^a

4 TOPA note Pasian in note mai-ah amaute a hawlkhiat khit ciangin, “Eite thumaanna hangin hih leitang a nei dingin hih lai ah TOPA in eite hong puak hi,” kici kha kei un. Hi peuhmah lo hi, hih minamte a gitlohna uh hangin TOPA in note maiah a hawlkhiat ahi hi. 5 Na thumaanna hang uh le na cihtakna hangun amaute’ leitang la-in a nei hi loin, hih minamte gitlohna hangin TOPA note Pasian in na pate uh, Abraham, Isaac le Jacob tunga a kiciamna a tangtunsakna-in note mai panin amaute a hawlkhia ahi hi. 6 Tua ahi ciangin theitel un, note thumaanna hangin TOPA note Pasian in na neih dingun hih gam hoih hong pia hi lo hi ahang in, note ngawngkhauh mite na hi uh hi.

Kham Bawngno

7 Sehnel gamah TOPA note Pasian phin-a, na hehsak uh ciamteh unla mangngilh ngei kei un. Egypt na nusiat ua kipan hih lai na tun dong uh TOPA na langpan niloh uh hi. 8 Horeb ah TOPA na thangpaisak uh a note susia ding zahin a heh hi. 9 TOPA in note tawh a bawl thukhun suangpek - tua suangpek la dingin mualtungah ka paitoh lai-in, mualtungah sun sawmli le zan sawmli ka om a; an ne loin tui lah ka dawn kei hi. 10 TOPA in Pasian khutme-a kigelh suangpek nih hong pia hi. Tuate tungah mualtunga mipi kikhop ni-a meikuang pana TOPA in a tangko thupiak khempeuh a om hi. ^b

11 Sun sawmli le zan sawmli a cin ciangin TOPA in thukhun suangpek ahi, suangpek nih kei hong pia hi. 12 Tua ciangin TOPA in kei kiangah, “Egypt pana na paikhiatpih na mite kisiagawp khin uh ahi manin hih lai panin paisuk meng in, ka thupiaknasa panin amaute pialkhia pak uh a, amaute ading a kisung milim a bawl uh hi,” ci-in hong gen hi. ^c

13 Tuateh TOPA in kei kiangah, “Hih mite a ngawngkhauh mi ahi takpi lam ka mu khin hi! 14 Amaute susia-a, a min uh van kikhupsin nuai pan ka phiatkhiat theih nadingin ka ut bangbangin hong tasak in. Tuateh amaute sangin tamzaw-a, a hatzaw minam khat kong suaksak ding hi,” hong ci hi. ^d

15 Tua ciangin mual kuanglaipi mah panin kihei-in ka paisuk hi. Tua hunin thukhun suangpek nih ka khutte gelah ^{▼▼9.15 Ahikeh Tuateh thukhun suangpek nih ka khut lang tuakah ka nei hi} ka tawi hi. 16 Ka khuadak ciangin TOPA note Pasian tungah na mawh lam uh ka mu hi; no mahmah in bawngno lim suna kisung lim khat na bawl khin uh hi. TOPA in note hong thupiaksa lampi pan na kiheikhia khin pak uh hi. 17 Tua ciangin suangpek nihte ka la-a, ka khutte panin lawnkhia-in, note mitmuhin ka sunen hi. ^f

18 Tua ciangin na bawlsa uh mawhna le TOPA muhna ah a sia-a na gamtatna te khempeuh un amah hehsak lua ahi manin an ne lo tui dawn loin sun sawmli le zan sawmli TOPA mai-ah khatvei ka khupbawh kik leuleu hi. 19 Note suksiat nading khopin TOPA heh ahi manin ama hehna le a thangpaihna ka kihta hi. Ahi hangin TOPA in ka thu hong ngai kik hi. 20 Aaron suksiat nading khopin ama tungah TOPA heh a, ahi zongin tua hun laitakin Aaron ading zong ka ngetsak hi. 21 Tua note mawhna - na bawlsa uh bawngno ka la-a mei-ah ka khul hi. Tua ciangin ka sunen-a, leivuinel bangin ka gawivui khit ciangin, mual pana luangsuk lui sungah avui ka lawn hi.

22 Note in zong Taberah, Massah le Kibroth Hattaavah ah TOPA na hehsak uh hi. ^g

23 Kadesh Barnea pan TOPA in hong sawlkhiat ciangin, “Pai to unla, note kong piaksa gam va luah un,” hong ci hi. Ahi hangin note in TOPA note Pasian thupiak langpanin na lehdo uh hi. Amah muang loin a thu zong na mang kei uh hi. 24 Note kong theih a kipan TOPA langpangin na lehdo uh hi.

25 TOPA in note ka susia ding hi ci khin ahi manin sun sawmli le zan sawmli sung TOPA mai-ah khupbawhsa in ka om hi. 26 TOPA kiangah thu ka ngen a, “Thuneipen TOPA aw, na vanglianpi-in na mite na tankhia-a, a thahat khut tawh Egypt pana na paikhiatpih nangma gouluah dingte susia kei in. 27 Nangma nasem Abraham, Isaac le Jacob-te phawk in. Hih mite lungsim khauhna, a gitlohna uh le a mawhna uh awlmawh kei in. 28 Tua hi kei leh kote nong paikhiatpihna gamte in, ‘TOPA in amaute a khapsa gam ah tun zo kei, amah in amaute mudah a, sehnel gamah thah dinga a paikhiatpih ai ve maw!’ ci ding uh hi. 29 Ahi hangin amaute nangma mite hi a, na vanglianpi le na ban zankhiat tawh na paikhiatpih nangma gouluahte ahi hi,” ka ci hi. ^h