Ecc 8 | ZomZIV | STEP | Mipilpa tawh kibang kua hiam? Nate ahi bang liana a thei kua ahi hiam? Pilna in mite maitaangsak a, a maipuakzia khengsak hi.

Ecclesiastes 8

1 Mipilpa tawh kibang kua hiam?
Nate ahi bang liana a thei kua ahi hiam?
Pilna in mite maitaangsak a,
a maipuakzia khengsak hi.

Kumpipa Thu Man’na

2 Pasian mai-ah kiciam khin na hi manin ken kong cih inah kumpipa thupiak mang in. 3 Kumpipa omna mun pan paikhia baih lua kei in. Amah in a lungkimna bangbang hih ding ahi manin thusia lamah pang kei in. 4 Kumpipa thu a sangpen ahi manin ama kiangah,”Bang hih na hiam?” kua in ci thei ding ahi hiam? ^a

5 Ama thupiakna a mang peuhmah in siatna thuak lo dinga,
lungsim pil in a hun leh a paizia thei ding hi.
6 Ahang in, mi khat haksatna ama tungah a gik hangin
na khempeuhah a hun leh a paizia om hi. ^b
7 Mailam thu kuamah in a theih loh nungsang,
ama tunga piang ding kua in gen thei ding ahi hiam?
8 Huih khumcip nading vaang a nei kuamah om lo-a, ^{▼▼8.8 Ahikeh a kha a ngah kik nading}
tua mah bangin a sih ni ding tungah vaang a nei kuamah a om kei hi.
Gal kikap hun laitakin kuamah a kitawpsak loh mah bangin
gitlohna gilo-a gamtatna a khahkhia kei ding hi.

9 Sunni nuai-a kibawlsa peuhmah ka ngaihsutsut ciangin hih teng ka mu hi. Mi khat in ama ^{▼▼8.9 Ahikeh amaute tungah} siat nadingin midangte a uk hun om hi. 10 Tuateh migilote hanah a kivui hi - tuate mun siangtho ah sung tumin pusuak uh a a gamtatna uh hangin khuapi sungah phatna ^{▼▼8.10 Hebrew khutgelh pawlkhat le Septuagint (Aquila); Hebrew khutgelh khempeuh ah -te a kimangngilh} a ngah uh hi. Hih zong a mawknapi mah ahi hi. ^f

11 Mawhna thukhenna khat manlangin a kisep khiat loh ciangin mite lungsim in siatna bawl ding a sawm hi. 12 Migilo khat in zavei dong mawhna bawl napi a nuntak veve hangin Pasian mai-ah siangtho a Pasian kihta mite a hoih zawk ding lam ka thei hi. 13 Tua hi napi migilote in Pasian a kihtak loh manun a ma uh vang lo dinga, nilim tawh a kibang a nuntak hun uh zong a kisawtsak kei ding hi. ^g

14 Leitunga piang a mawknapi pawlkhat om lai hi: migilopa ngah dinga kilawm a thumaan mipa in ngah a, a thumaan mipa ngah dinga kilawm migi lopa in ngah hi. Hih zong a mawknapi mah hi, ka ci hi. 15 Tua hi-a mihing adingin sunni nuai-ah ne-in dawna gualnuama om kana hoihzaw om lo ahi manin gualnopna ka phat hi. Tua ciangin Pasian in sunni nuai-a a dam hun dinga a piak sung teng a nasepna ah amah in nuam a sa ding hi. ^h

16 Pilna le leitunga mihingte nasepna theih sawmin - sun le zana ihmu lo lianga a om uh ka ngaihsunsun a - 17 tua ciangin Pasian sepsa khempeuh ka mu hi. Sunni nuai-a a piang khempeuh kuama theihtel zawh ding hi lo hi. Ama sepsa khempeuh i zonkhiat nop hangin mihing in a khiatna theikhia zo lo hi. Mipil khat in thei a kisak hangin a thei siang taktak thei kei hi. ⁱ