Exo 15 | ZomZIV | STEP | Tua ciangin Moses le Israel-te in hih la TOPA a sak uh hi: “Amah sangpi in kitawisang ahi manin, TOPA la kasak ding hi. Amah in sakol le a tunga tuangpa tuipi sung a denna hi.

Exodus 15

Moses’ le Miriam’ La

1 Tua ciangin Moses le Israel-te in hih la TOPA a sak uh hi: ^a

“Amah sangpi in kitawisang ahi manin,
TOPA la kasak ding hi. ^b
Amah in sakol le a tunga tuangpa
tuipi sung a denna hi.
2 TOPA, ka thahatna le ka la ahi hi; ^c
amah ka honkhiatna suak zo hi.
Amah ka Pasian hi a, ka phat ding hi.
Ka Pa’ Pasian amah ka tawisang ding hi. ^d
3 TOPA galhat hi. ^e
Ama min TOPA hi.
4 Amah in Pharaoh’ sakolleng le
a galkap honpi tuipi sung a denna hi.
Pharaoh’ ulian hoih pente
San Tuipi ^{▼▼15.4 Hebrew Yam Suph; Pumpeng Tuipi cihna tg. 22 ah zong} sungah kia lum uh hi.
5 Tui thukpi in amau tuama,
a thukna ah suang bangin tumsuk uh hi. ^g
6 TOPA aw, na khut taklam,
vangliatna tawh thupi hi.
TOPA aw, na khut taklam in
galte satpuk khin hi.
7 Na thupina liatna sungah
nang hong langbawlte na lawnthal hi.
Na hehna kuang na khaha;
amaute buhtu bangin kangtum hi.
8 Na nakvang pan na huu-in
tui kiciang to hi. ^h
Tui luanglai kawm bangin dingkip hi;
tuithukte tuipi laizangah khik ngiungeu hi.
9 “Galte kisathei uh a,
‘Ken delh ning amaute ka pha ding hi. ⁱ
Galvan lakte ka hawm dinga,
tuate ka deih zahzah ka tang ding hi.
Ka namsau ka dok dinga,
ka khut in amaute a susia ding hi,’ ci uh hi.
10 Ahi hangin na huu-in na muta,
amaute tuipi in tuum hi.
Amaute haknaw bangin,
tuihat sungah tum uh hi.
11 Nang bang, pasiante lakah kua om hiam? TOPA aw. ^j
Nang bang kua a hiam -
sianthona - a tungtuang, ^k
minthanna - a lauhuai, ^l
nalamdangte a bawl?
12 Na khut taklam na zankhia-a,
lei in amaute valh tah.
13 “A tul ngei lo na itna-in ^m
na tatsa mite na pi ding hi.
Na thahatna-in
amaute na tenna mun siangtho ah na tunpih hi. ⁿ
14 Minamte in za-in ling ding uh a,
Philistia-te, lungtawlna in gakcip ding hi.
15 Edom ukpite laugawpin,
Moab makaite pumlin ding uh a
Canaan-te ^{▼▼15.15 Ahikeh ukpate} a tuisuak ding hi;
16 amaute tungah a mulkimhuai le launa tung dinghi.
Na ban vangliatna tawh suangtum
bangin dai dide ding uh -
TOPA aw, na mite a paisuak
mateng na leisa na mite a paisuak ^{▼▼15.16 Ahikeh piangsak} mateng in. ^q
17 TOPA aw, nangma luahna mualtung, ^r
TOPA aw, na ten nadinga na bawlsa tua mun,
Topa aw, na khuta na lamsa
tua mun siang ah amaute lutpihin na suan ding hi. ^s
18 TOPA in a tawntungin
uk den ding hi,” a ci uh hi.

19 Pharaoh’ sakolte, sakollengte le sakol-tuangte ^{▼▼15.19 Ahikeh sakol-galkapte} tuipi sungah a pai uh ciangin TOPA in amaute tungah tuipi tui luangsak kika, ahi hangin Israel-te in leikeu tawnin tuipi a kantan uh hi. 20 Tua ciangin Aaron sanggamnu kamsang numei Miriam in khuangta khat la-a, numei khempeuh in tuanu zui-in khuangta tawh a lam uh hi. 21 Miriam in amaute tungah, ^u

“TOPA la sak un,
amah sangpi-in kitawisang hi.
Sakol le a tungtuangpa
tuipi sung denna zo hi,” ci-in la sak uh hi.

Marah le Elim Tuite

22 Tua ciangin Moses in San Tuipi panin Israel paipih a, amaute Shur Sehnel-gam sungah a lut uh hi. Tui mu loin gam sungah ni thum sung a zin uh hi. 23 Marah a tun uh ciangin, tui kha ahi manin tui a dawn thei kei uh hi. (Tua hangin tua mun Marah ^{▼▼15.23 Marah pen kha cihna} kici hi). 24 Tua ciangin mite in Moses phunsan uh a, ^w 25 “Bang dawn ding ka hi uh hiam?” a ci uh hi. Tua ciangin Moses in TOPA ko a, TOPA in amah singthem khat a lak hi. Amah in tui sungah tua lawna, tua tui, tui lim a suak hi.

Tua lai-ah TOPA in amaute ading thukip khat le thukham khat bawlsak-a, tua lai-ah amaute a zia-et hi. 26 Amah in, “Note in na Pasian uh TOPA aw limtakin ngai a, ama muhna ah thumaanin na na sep uh leh, a thupiakte thupi sima, a thukipte khempeuh na zuih uh leh keimah in note hong damsak TOPA ka hi manin Egypt-te tunga ka tunsak cinatnate no tungah kong tungsak kei ding hi,” a ci hi. ^x

27 Tua ciangin Elim ah a pai kik uh hi; tua lai-ah tuinak sawm le nih le nisuh kung sawm sagih om-a, tua tui kiangah giahphual a sat uh hi.