Exo 16 | ZomZIV | STEP | Israel mipi bup Elim panin dingkhia uh a, Egypt pana a paikhiat khit uh a khanihna a ni sawm le nga ni-in Elim le Sinai kikala Sin Sehnel-gam a tung uh hi.

Exodus 16

Manna le Vamim

1 Israel mipi bup Elim panin dingkhia uh a, Egypt pana a paikhiat khit uh a khanihna a ni sawm le nga ni-in Elim le Sinai kikala Sin Sehnel-gam a tung uh hi. 2 Sehnel-gam ah mihon bup in Moses le Aaron a phunsan uh hi. 3 Israel-te in amau tungah, “TOPA khutlumin Egypt ah na si zaw mai le ung! Tua lai-ah sabeel umin ka tu uh a, an ka duh zahzah uh ka ne uh hi; ahi hangin note in a puksi khin dingin kote hih sehnel-gam nong tun uh hi,” a ci uh hi. ^a

4 Tua ciangin TOPA in Moses tungah, “Note ading van panin anlum kong zusak ding hi. Nisimin mipite paikhia-in a khamkhop ding uh a kaikhawm ding uh hi. Hih bangin amaute ka zia-et dinga, ka lamlahnate a zuih uh leh a zuih loh uh ka mu ding hi. 5 A nigukna ni-in inn-a a khopsate uh bawl ding uh a, nidanga a kaikhop zah nih a luak ding uh hi,” a ci hi. ^b

6 Tua ciangin Moses le Aaron in Israel-te khempeuh tungah, “Nitak ciangin Egypt pana hong paikhiat-pih TOPA ahilam na thei ding uh a, 7 zingsang ciangin TOPA minthanna na mu ding uh hi, bang hang hiam cih leh amah in na phunsanna uh a za zo hi. Note in ko nong phunsan nadingun kote kua ka hi uh hiam?” a ci uh hi. 8 Moses in zong, “Amah na phunsannate uh za zo ahi manin nitak-a a nek ding uh sa hong piak ciang le zingsanga an na duh zahzah uh hong piak ciangin tua in TOPA hi, cih na thei ding uh hi. Kote kua ka hi uh hiam? Kote hong phunsan na hi kei uh a, TOPA phunsan na hizaw uh hi,” a ci lai hi. ^c

9 Tua ciangin Moses in Aaron kiangah, “Israel mipite khempeuh kiangah, ‘TOPA in na phunnate uh za zo ahi manin ama mai-ah hong pai un,’ ci in,” a ci hi.

10 Aaron in Israel mipi bup tungah thu a gen laitakin, amaute in sehnel-gam lam en uh a, tua lai-a meii lakah TOPA minthanna a kilak hi. ^d

11 TOPA in Moses tungah, 12 “Israel-te phunna ka za khin hi. Amaute tungah, ‘Khuamui ciangin sa na ne ding uh a, zingsang ciangin anlum na kham ding uh hi. Tua ciangin keimah TOPA note’ Pasian, ka hilam na thei ding uh hi, ci hi, ci-in gen in,” a ci hi.

13 Tua nitak-in vamim lengin a giahphual uh tuama, a zingsang ciangin a giahphual kim-uah daitui a daldalin a om hi. 14 Daitui a kap ciangin sehnel gam leitualah daitui khalno banga khal a pum kiukeu a kilang hi. 15 Israel-te in tuate a muh uh ciangin, “Hih bang hiam?” a kici uh hi. Ahang in, amaute in bang hiam cih a thei kei uh hi. ^e

Moses in amaute kiangah, “TOPA in na nek dingun hong piak anlum ahi hi. 16 Hih in TOPA hong thupiak ahi hi: ‘Mikim in ama kisap zahzah a kaikhawm ding hi. Puanbuk sunga om mi khat ai dingin omer ^{▼▼16.16 Tua pen, quart 2 (litre 2 bang) khawng; tg. 18, 32, 33 le 36 ah zong} khat tawm un, ci hi,’ ci-in gen in,” a ci hi.

17 Israel-te in amau kianga kigen bangin a hih uh hi; pawlkhat in tampi kaikhawm uh a, pawlkhat in tawmkha a kaikhawm uh hi. 18 Omer a, a teh uh ciangin tampi a kai-khawmte aa tam lua lo-a, tawmkha a kaikhawmte aa lah a tawm tuan kei hi. Mikim in ama kisap zahzah a kaikhawm uh hi. ^g

19 Tua ciangin Moses in amaute kiangah, “Kuamah in tuate zingsang dong a sit kei ding hi,” a ci hi. ^h

20 Tua hi napi amaute pawlkhat in Moses a thusim kei uh hi; amaute in a zingsang dong pawlkhat a sit uh hi. Ahi hangin ning-a a than gawp hi. Tua ciangin amaute tungah Moses a heh hi.

21 Mi khempeuh in zingsang simin a kisap zahzah uh kaikhawm tek uh a, ni a sat ciangin a tuimang hi. 22 A ni gukna ni ciangin a zah nih - mi khatin omer ^{▼▼16.22 Tua pen quart 4 (litre 4.5 bang) bang hi kha thei ding hi.} nih ta kaikhawm uh a - mipi makaite pai-in Moses tungah a zasak uh hi. 23 Amah in amaute kiangah, “Hih in TOPA thupiak ahi hi, ‘Zing ciang tawlngak ni ding, TOPA adingin Sabbath siangtho khat ahi hi. Tua ahi manin na em nop teng uh em unla, na huan nop teng uh huan un. Na khamvalte uh zingsang dongin sit un, ci hi,’ ci-in gen in,” a ci hi.

24 Tua ciangin amaute in Moses thupiak bangin zingsang dong a sit uh hangin uih loin a sungah zong than a om kei hi. 25 Moses in, “Tuni TOPA adingin Sabbath khat ahi manin tuni-in tuate ne un. Tuni-in leitual ah tuate them zong na mu kei ding uh hi. 26 Niguk sungin tuate na kaikhawm ding uh a, ahi hangin a ni sagihna Sabbath ni-in khat zong a om nawn kei ding hi,” a ci hi. ^j

27 Tua hi napi mite pawlkhat in a ni sagihna ni-in kaikhawm dingin a paikhiat uh hangin, bangmah a mu kei uh hi. 28 Tua ciangin TOPA in Moses kiangah, “Ka thupiakte le ka lamlahnate bang tanvei nial lai ding na ^{▼▼16.28 Hebrew ah a tam genna} hi hiam? 29 TOPA in note Sabbath hong pia hi cih ciamteh gige un; tua ahi manin a ni gukna ni-in ni nih ai tang anlum hong pia hi. A ni sagihna ni-in a kuamah peuh amau omna ciatah om ding uh hi; kuamah a pusuakkhia kei ding hi,” a ci hi. 30 Tua ahi ciangin mipite a ni sagihna ni-in a tawlnga uh hi.

31 Israel mipite in anlum pen manna ^{▼▼16.31 Manna pen Hih bang hiam? cihna (tg. 15 na en in).} a ci uh hi. Tua pen nanan tang tawh kibangin kanga, khuaizu tawh kibawl wafer bangin a lim hi. 32 Moses in, “Hih in TOPA thupiak ahi hi: ‘Manna, omer khat la unla Egypt pana kong paikhiatpih lai-a gamlak-a na nek dingun kong piak anlum, khang sawnsawnte in a muh theih nadingin kem un,’ ci hi,” a ci hi.

33 Tua ciangin Moses in Aaron kiangah, “Thambel khat la inla a sungah manna omer khat koih in. Tua ciangin khang sawnsawnte adinga kep dingin TOPA mai-ah koih in,” a ci hi. ^m

34 TOPA in Moses a thupiak bangin a kikoihcing theih nadingin Aaron in Tecipanna mai-ah manna, a koih hi. 35 Israel-te in mihing tenna leitang a tun mateng uh kum sawm li sung manna a ne uh hi; Canaan gamgi a tun matengun amaute in manna a ne uh hi. ⁿ

36 (Omer khat pen ephah khat seh sawm suah seh khat ahi hi).