Exo 20 | ZomZIV | STEP | Pasian in hih kammal khempeuh a gen hi:

Exodus 20

Thupiak Sawmte

1 Pasian in hih kammal khempeuh a gen hi:

2 “Keimah TOPA note’ Pasian, sila suahna gam, Egypt pana note hong paikhiatpih pa ka hi hi. ^a
3 “Ka mai-ah ^{▼▼20.3 Ahikeh kei simloh} pasian dang na nei kei ding uh hi. ^c
4 “Tunga vanah ahi zongin nuai-a leitungah ahi zongin nuai lama om tui sunga omte tawh a kibangin milim na bawl tawm kei ding uh hi. 5 Tuate mai-ah na kun kei ding uh a, zong na bia kei ding uh hi; ahang in, keimah TOPA, note Pasian, kei hong mudahte a pate uh mawhna, a khang thumna le a khang lina donga, a tate uh tunga a thuk a aam Pasian ka hi hi. 6 Ahi hangin kei hong it-a, ka thupiakte a zui a tultulte tungah itna a lakpa ka hi hi. ^d
7 “TOPA in ama min a zangkhial khatpeuh a khial loin sim lo ding ahi manin, TOPA na Pasian’ min na zangkhial kei ding uh hi.
8 “Sabbath ni a siangtho-a tanna tawh phawk-den un. 9 Note nasep khempeuh niguk sung tengin na sem ding uh a, 10 ahi hangin a ni sagihna ni, TOPA note Pasian’ Sabbath ahi hi. Tua ni-in note na hi uh a, na tanu na tapate uh ahi zongin na sila numei na sila pasalte uh ahi zongin, na ganhingte uh ahi-a, note huang sunga pemtate ahi zongin kuamah in na khatpeuh na sem kei ding uh hi. 11 Ahang in, TOPA in niguk sungin lei le vante, tuipi le tuate sunga omte bawla, ahi hangin a ni sagihna ni-in a khawl hi. Tua ahi ciangin TOPA in Sabbath ni thupha pia-a, a siangthosak hi.
12 “TOPA, Note Pasian hong piakna gamah sawt veipi na ten theih nadingun na nu le na pa pahtawi un. ^e
13 “Tual na that kei ding uh hi.
14 “Ang na kawm kei ding uh hi. ^f
15 “Na gu kei ding uh hi.
16 “Na vengte langah amaan lo teci na pang kei ding uh hi. ^g
17 “Na vengpa’ inn na deihgawh kei ding uh hi. Na vengpa’ zi ahi a, a nasem pasal, a nasem numei, a bawngtal ahikeh a laa ahi zongin na vengpa neihsa na khatpeuh na deihgawh kei ding uh hi,” a ci hi. ^h

18 Mipite in vanpi ging le khuaphia mu uh a, pengkul za-in meikhu in mual a tuam a muh uh ciangin lau-in a ling uh hi. Amaute a gamlapi-ah ding uh a, 19 Moses kiangah, “Nang kia in kote hong hopih lecin ka ngai ding uh hi. Ahi hangin Pasian, kote hong hopihsak kei in, nong hopihsak leh ka si ding uh hi,” a ci uh hi. ⁱ

20 Moses in mipite kiangah, “Lau kei un. Note in Pasian na kihtakna uh tawh mawhna bawlna pan na kikep nadingun Pasian in note hong zia-et ahi hi,” a ci hi. ^j

21 Moses in Pasian omna khuamial sahpi lak lam a manawh laitakin mipite a gamlatna ah a om lai uh hi.

Milimte le Biakna-taute

22 Tua ciangin TOPA in Moses kiangah, “Israel mite kiangah hih thu gen in: ‘Vantung panin note hong kihopihna no ciatin na mu zo uh hi: 23 Kei tawh nong biak khawm dingun pasian khatpeuh bawl kei un; ngun pasian ahi a, kham pasian ahi zongin bawltawm kei un. ^k

24 “Kei adingin lei biakna-tau khat dawh inla, tua tungah na meihal biakna le kilawmtatna biaknate ^{▼▼20.24 Tang ngeina in kilemna biakna} na tuute, na keelte le na bawngte pia in. Ka min ka kipahtawisakna mun khempeuhah nang kiangah hong pai-in thupha kong pia ding hi. 25 Kei adingin suang biakna-tau na dawh leh a kisek suang tawh dawh kei in, ahang in, a tungah van khatpeuh na zat leh na ninsak kha ding hi. 26 Ka biakna-tau tungah kahlei-in kah kei in na kah leh na guaktangna dawk kha ding hi.