Exodus 40

Biakbuk Dinsakna

1Tua ciangin TOPA in Moses kiangah, 2“Kha masa a ni masa ni-in biakbuk ahi, Kikhopna Puanbuk dingsak in. 3A sungah Tecipanna singkuang koih inla, puanzakin singkuang dal in. 4A sungah sabuai tum inla, tua tawh a kisai teng a tungah koih in. Tua ciangin meivak tunna sungtum inla, a meivakte thuah in. 5Tecipanna singkuang mai-ah gim namtui halna kham biakna-tau koih inla, biakbuk lutna-ah puanzak khai in. ^a

6 “Biakbuk ahi, Kikhopna Puanbuk lutna mai-ah meihal biakna-tau koih in; 7Kikhopna Puanbuk le biakna-tau kikalah kuangpi koih inla, a sungah tui koih in. 8Tua kimkotah a huang bawl inla, a huang lutna-ah puanzak khai in. ^b

9 “Nilh sathau la inla, biakbuk le a sunga na khempeuh nilh in; biakbuk le a na zat khempeuh siansuah in, a siangtho ding hi. 10Tua ciangin meihal biakna-tau le a vanzat khempeuh sathau nilh inla, biakna-tau siansuah in; a siangtho pen ahi ding hi. 11Kuangpi le a tunna sathau nilh inla, tuate siangthosak in.

12 Aaron le a tapate, Kikhopna Puanbuk lutna-ah paipih inla amaute tui-in sil in. 13Tua ciangin a siangtho puansilhte Aaron silhsak in, sathau nilh inla, ka siampi na a sep theih nadingin amah siangthosak in. 14A tapate paipih inla, amaute puansungsilh silhsak in. 15Amaute in ka siampi na a sep theih nadingun a pa uh sathau na nilh bang tektekin amaute nilh in. Amaute sathau kinilhna, khang sawnsawnte khempeuh adingin a kizom dena siampi suahna hi ding hi,” a ci hi. 16TOPA in amah a thupiak bang tektekin Moses in na khempeuh a sem hi. ^c

17 Tua hi-a, a kum nihna a kha masa pen a ni masa ni-in biakbuk kidingsak hi. 18Moses in biakbuk a dinsakin, a bullente a mun tekah koiha, singpekte tungin, a khilna zawlte khumin a khuamte a phut hi. 19Tua ciangin TOPA in amah a thupiak bang tektekin biakbukah puanbuk zal-a, a tungah a khuhna-in a khuh hi. ^d

20 Amah in Tecipanna la-in sing-kuang sungah koiha, singkuang zawlte bulhin thoihdamna sinin a tungah a sin hi. 21Tua ciangin TOPA in amah a thupiak bang tektekin biakbuk sungah singkuang paipih a, dalna puanzak khai-in, Tecipanna singkuang a dal hi.

22 Moses in Kikhopna Puanbuk sung biakbuk leilu-lam pang puanzak pua lamah sabuai koih a, 23TOPA in amah a thupiak bang tektekin TOPA mai tua sabuai tungah anlum a lui hi. ^e

24 Amah in Kikhopna Puanbuk sung, biakbuk a leitaw-lam pang sabuai tawh kigalsai-ah meivk tunna koihin 25TOPA in amah a thupiak bang tektekin TOPA mai-ah meivakte a bulh hi. ^f

26 Moses in Kikhopna Puanbuk sung puanzak mai-ah kham biakna-tau koih-a, 27TOPA in amah a thupiak bang tektekin biakna-tau tungah gim namtui a hal hi. 28Tua ciangin biakbuk lutna-ah puanzak a khai hi. ^g

29 Amah in biakbuk ahi, Kikhopna Puanbuk lutna-ah meihal biakna-tau koih-a, TOPA in amah a thupiak bang tektekin tua tungah meihal biakna le an-a biakna a pia hi. ^h

30 Amah in Kikhopna Puanbuk le biakna-tau kikalah kuangpi koih-a, kisil nadingin a sungah tui koihin, 31Moses le Aaron le a tapate in a khut le a khete uh silna-in a zang uh hi. 32TOPA in Moses a thupiaksa bang tektekin amaute Kikhopna Puanbuk ah a tum uh ciang le biakna-tau a manawh peuhpeuh uh ciangin a kisil uh hi. ⁱ

33 Tua ciangin Moses in biakbuk le biakna-tau kimkotah ahuang bawla, ahuang lutna-ah puanzak a khai hi. Tuaci bangin Moses a nasep a man hi. ^j

TOPA Minthanna

34 Tua ciangin Kikhopna Puanbuk meii in tuama, biakbuk ah TOPA minthanna a dim hi. 35Kikhopna Puanbuk ah Moses a lut thei kei hi, bang hang hiam cih leh meiipi in tuama, TOPA minthanna biakbuk a dim hi.

36 Israel-te a khualzinna khempeuh-uah, biakbuk tung pan meii a kilaktoh ciangin amaute a dingkhia uh hi; 37ahi hangin meii a kilakkhiat kei leh - a kilaptoh matengin a zinkhia kei uh hi. 38Tuaci-in amaute khualzinna tawntungah Israel innkuante mitmuh in biakbuk tung sanah, sun-in TOPA meii kai-a, zanin meii lakah meikuangin a om hi. ^k