Exo 7 | ZomZIV | STEP | Tua ciangin TOPA in Moses kiangah, “En in, Pharaoh tungah nang Pasian in kong bawla, na sanggampa Aaron na kamsangpa ahi ding hi.

Exodus 7

1 Tua ciangin TOPA in Moses kiangah, “En in, Pharaoh tungah nang Pasian in kong bawla, na sanggampa Aaron na kamsangpa ahi ding hi. 2 Kong sawl khempeuh nang na gen dinga, Aaron in Pharaoh tungah Israel mite ama gam pana a paikhiatsak ding a gen ding hi. 3 Ahi hangin Pharaoh lungtang ka khauhsak dinga, Egypt ah a lamdang limte le nalamdang tampi ka bawl hangin 4 amah in hong mang lo ding hi. Tua ciangin Egypt tungah ka khut ka nga dinga, a vanglian thukhennate zangin ka khenkhiattuam ka mi Israel-te ka paikhiatpih ding hi. 5 Egypt langah ka khut zanin Israel-te ka paikhiatpih ciangin kei TOPA ka hilam Egypt mite in a thei ding uh hi,” a ci hi. ^a

6 Moses le Aaron in TOPA thupiak bang tektekin a sem uh hi. 7 Amaute Pharaoh tawh a kiho hunin Moses kum sawmgiat pha a, Aaron kum sawm giat le thum a pha hi. ^b

Aaron’ Ciangkhut Gul Suak

8 TOPA in Moses le Aaron tungah, 9 “Pharaoh in note kiangah, ‘Nalamdang khat bawl un,’ hong cih ciangin Aaron kiangah, ‘Na ciangkhut la-in Pharaoh mai-ah lawn in,’ ci in, gul hong suak ding hi,” a ci hi.

10 Tua ciangin Pharaoh kiangah Moses le Aaron pai uh a, TOPA thupiak bang tektekin a hih uh hi. Aaron in Pharaoh le a uliante mai-ah a ciangkhut lawnsuka gul a suak hi. 11 Tua ciangin Pharaoh in mipilte le aisiamte sama, Egypt mitphial siamte in zong amau siamna tawh tua tawh kibang a hih thei uh hi. 12 A ciangkhut tek lawnsuk uh a, gul a suak hi. Ahi hangin Aaron ciangkhut in amaute ciangkhut a valh tum hi. 13 Tua hi napi TOPA gensa bangin Pharaoh lungsim khauhsak lai-a amaute thu angai tuan kei hi. ^c

Sisan Gimna

14 Tua ciangin TOPA in Moses kiangah, “Pharaoh lungsim nem nai het lo hi; amah in a mite a paisak nuam kei hi. 15 Zingsangin tui-ah Pharaoh a pai ciangin a kiangah va pai in. Amah tawh kituak dingin Nile gun gei-ah ngak inla, gul a suak na ciangkhut na khutin tawi in. 16 Tua ciangin ama kiangah, ‘TOPA, Hebrew-te Pasian in nang kiangah kei hong sawla: Sehnel gam sungah kei hong biak theih nadingun ka mite paisak hen, ci hi. Ahi hangin tu hun dong na mang kei hi. 17 Hih in TOPA gen ahi hi: Hih tawh keimah TOPA ka hilam na thei ding hi: Ka khut sunga ciangkhut tawh Nile guntui ka sat dinga sisan a suak ding hi. 18 Nile sunga ngasate si dinga gun a uih ding hi. Egypt mite in guntui a dawn thei kei ding uh hi,’ ci in,” a ci hi. ^d

19 TOPA in Moses kiangah, “Aaron kiangah, ‘Na ciangkhut la inla Egypt a tuite tung - luite le hawkguamte tung, bualte le tuikholnate tungah na khutzan in’ - tuate sisan a suak ding hi. Egypt mun khempeuh sing tuikuang le thambel sung nangawn ah sisan a om ding hi,” a ci hi. ^e

20 TOPA thupiaksa bangin Moses le Aaron in a hih uh hi. Amah in Pharaoh le a uliante muh in a ciangkhut lamto in Nile tui sat-a, tui khempeuh sisanin a kilaih hi. 21 Nile sunga ngasate si-a gun namsia lua ahi manin Egypt-te in tui a dawn thei kei uh hi. Egypt mun khempeuhah sisan a om hi.

22 Ahi hangin Egypt mitphial siamte in amau siamna tawh tua bang mahin hih uh a, Pharaoh lungsim a khauhsak hi. TOPA cihsa bang tektekin amah in Moses le Aaron thu a ngai kei hi. 23 A ngaih sangsikin kileh in a kumpi inn sungah lut-a, ngaihsutin zong a nei beek kei hi. 24 Tua ciangin Egypt mite khempeuh in Nile dungah tui dawn ding a to uh hi; bang hang hiam cih leh amaute in guntui a dawn thei kei uh hi.

Uiphuk Gimna

25 TOPA in Nile a sat zawh ni sagih cing khin hi. ^f