Eze 2 | ZomZIV | STEP | Amah in, “Mihing tapa aw, na khe in ding in; nang kong hopih ding hi,” hong ci hi.

Ezekiel 2

Ezekiel Kisam

1 Amah in, “Mihing tapa aw, na khe in ding in; nang kong hopih ding hi,” hong ci hi. 2 A pau lai mahin ka sungah Kha hong tunga ka khe in hong dingsaka ama hong hopihna ka za hi.

3 Amah in, “Mihing tapa aw, kei hong lehdo sa, hong lehdo minam Israel-te kiangah nang kong sawl hi; tuni mahmah ciang dong amaute le a pate un kei hong lehdo lai uh hi. 4 Nang kong sawlna mite lungkhauhin paupeng uh hi. Amaute tungah ‘Hih in Thupipen TOPA gen ahi hi,’ ci in. 5 Amaute in a ngai uh a, a ngai kei uh zongin - a langdo innkuan amaute ahi manun - amaute lakah kamsang khat om hi, cih a thei ding uh hi. 6 Ahi zongin nang mihing tapa aw, amaute ahikeh a kampaute uh hangin lau kei in na kimkotah dailing le thangling in hong umin aikam lakah na teng zongin kihta peuhmah kei in. Amaute a lehdo innkuante hita leh amau genna le hong linthawnnate uh hangin lau het kei in. 7 Amaute a lehdote ahi manun a ngai uh a, a ngai kei uh zongin ka thugente amaute tungah na gen kul ding hi. 8 Ahi zongin mihing tapa aw, nang tunga kong gen na ngai in. Tua a lehdo innkuante bangin lehdo kei in; kamka inla kong piak pen ne in,” hong a ci hi. ^a

9 Tua khit ciangin ka en a, khut khat kei lamah hong kizan ka mu hi. Tua khut sungah laizial khat a om hi; 10 amah in ka mai-ah laizial a phel hi. A langnih tuakah tamlawhna, thumna le gimna thu a kigelh ka mu hi.