Eze 22 | ZomZIV | STEP | TOPA thu kei tungah hong tung a,

Ezekiel 22

Jerusalem Mawhnate

1 TOPA thu kei tungah hong tung a, 2 “Mihing tapa aw, tuanu thu na khensak ding hiam? Hih khuapi sisan luansakna thu na khen ding hiam? Tuateh a kihhuai a gamtatna khempeuh maitangsalh gawp inla: 3 ‘Hih in Thupipen TOPA gen ahi hi: Na sunga sisan luanna hangin nang le nang kisiattut a, na milim bawlna hanga a kibuahsak nang khuapi aw, 4 na luansaksa sisan hang le na bawlsa milimte hanga na kibuah-sakna hangin nang hong kimawhsak zo hi. Na nite na beisaka, na kumte a beita hi. Tua ahi ciangin minamte simmawh le gamdangte khempeuh ciamnuih bawlna kong suaksak ding hi. 5 A minsia-a buaina tawh kidim khuapi aw, nang tawh kinaite le nang tawh kigamlate in nang hong simmawh ding uh hi. ^a

6 “‘Na sunga om Israel gam-ukte in amaute thuneihna sisan luansakna-in a zat uh mu in. 7 Na sungah nute le pate kisimmawh hi; na sungah pemtate, meigongnute le pa nei lote kinengniam gawp hi. 8 A siangtho ka vante kithusim lo a, ka Sabbath-te kitang lo hi. 9 Na sungah mihing sisan luangsak dingin mihekte, mualtung a biakbukno a nete le ahuuklua alan lua-a gamtate om uh hi. 10 Na sungah a pa lupna a zahtak lo om a, nang sungah numei nin neih hun - thukham in a phal loh hun a tang lo a om hi. 11 Na sungah a vengte zi tawh a kihhuai-a gamta om-a, adang khat in a mo zumhuaipi in buahsak a, adang khat in a sanggamnu, ama pa’ tanu tektek a buan hi. 12 Na sungah mite in sisan suahsak nadingin golhsum la uh hi. Nang in a met ^{▼▼22.12 Ahikeh summet uanglak le summet} na uang laka a thumaan lopi in na vengte tungah a met la-in na sut hi. Tua ciangin kei nong mangngilh hi, Thupipen TOPA in cikhia hi. ^c

13 “‘Nang sungah thumaan lo-a a met lakna le mihing sisan na luansaknate hangin ka khutte gel ka tum taktak ding hi. 14 Nang tungah kong thuk ni ciangin hang ngam lai-in na khut khauh zo nawn ding ahi hiam? Keimah TOPA in ka gensa hi a, ka sem ding hi. 15 Minamte lakah kong nawhkek dinga gam citeng ah kong thehthang ding hi; tua ciangin na siantholohna uh ka beisak ding hi. 16 Minamte muhna ah hong kinitsak ^{▼▼22.16 Ahikeh nangma gouluahte mite kong piaksak ciangin} ciangin TOPA ka hilam na thei ding hi, ci hi,’ ci-in gen in,” hong ci hi.

17 Tua ciangin TOPA thu kei tungah hong tunga: 18 “Mihing tapa aw, Israel innkuante kei adingin sumngo-ek suak ta uh hi. Amaute khempeuh pumei sunga om sumngo, dal, sik le haknaw kihel ahi uh hi.Tuate hi napi amaute ngun-ek hilel uh hi. 19 Tua ahi ciangin hih in Thupipen TOPA gen ahi hi: ‘Note khempeuh ngun ek suak khin na hi manun Jerusalem ah note kong khawm ding hi. 20 Mite in pummei sungah haltui dingin ngun, sumngo,sik, haknaw le dalte a koih bangun ka hehna le ka thangpaihna tawh kong khawm dinga, khuapi sungah hong koihin kong tuisak ding hi. 21 Note kong khawm dinga ka thangpaih luatna tawh hong mutin tuanu sungah kong tuisak ding hi. 22 Pummei ah ngun a tui bangin tuanu sungah na tui ding uh a, keimah TOPA in nang tungah ka thangpaihna hong sung ka hilam na thei ding hi,’ hong ci hi,” a ci hi. ^e

23 TOPA thu kei tungah hong tung kik a: 24 “Mihing tapa aw, ‘Thangpaih ni-a guah a zu lo, dai a kai lo ^{▼▼22.24 Septuagint; Hebrew ah a kihah siang nai lo ahikeh guah in delh nai loh} leitang na hi hi;,’ ci in. 25 Tuanu gam-ukte ^{▼▼22.25 Septuagint; Hebrew in kamsangte} in humpinelkai hawkin a samatte a balzan bangin mite balzan uh a, a goute uh le a van manphate uh laksak uh a, a sungah meigong numei tampi omsak uh hi. 26 A siampite un ka thukham ngawhbawl uh a, a siangtho ka vante a buahsak uh hi; a siangtho vante le van mawkmawkte a khen kei uh hi; anin asiang cih a om tuan kei hi, ci-in hilh uh hi. Amaute lakah ka min dai theih nadingin ka Sabbath-te a tan ding uh a kitheihmawhbawl uh hi. 27 Tuanu sunga om a uliante, a samatte a balzan keivomte tawh kibang uh hi. Thutang lopi-in a ngah nop manun mihing sisan luangsak uh a mi a that uh hi. 28 A kamsangte in mangmuhna man lo le zuau aisanna tawh amau adingin hih gamtatnate a melh uh hi. Amaute in ‘TOPA thugen lohpi: ‘Hih in Thupipen TOPA gen ahi hi,’ ci uh hi. 29 A gam sunga mite in mi buluhin a na uh a mawk suh uh hi. Mizawngte le a tasamte nengniam uh a, pemtate bawlsia-in thutangin a khensak kei uh hi.

30 “Keimah in gam ka suksiat loh nadingin kulh a lam zo ding, a gam tanga a kisap hun cianga a dingzo ding mi amaute lakah ka zon hangin khatbeek ka mu zo kei hi. 31 Tua ciangin amaute tungah ka thangpaihna ka bua a, ka hehluatna in amaute kangtumin amau gamtat-nasa khempeuh amau lutungah ka tusak hi, Thupipen TOPA in cikhia hi,” hong ci hi.