Eze 26 | ZomZIV | STEP | A kum sawm le khatna tua kha a ni masapen ni-in TOPA thu kei tungah hong tunga:

Ezekiel 26

Tyre Siat ding Genkholhna

1 A kum sawm le khatna tua kha a ni masapen ni-in TOPA thu kei tungah hong tunga: 2 “Mihing tapa aw, Tyre in Jerusalem tung ah, ‘Awi bek si’ng! Minamte kongpite kitan khina, a kongkhakte kei adingin kihong kek hi; tu-in tuanu kisia ta hi, kei ka khangto ta ding hi’ cihsan hi. 3 Tua ahi ciangin hih in Thupipen TOPA gen ahi hi: Tyre aw, nang langah ka pang hi. Nang langkhatah minamte tampi ka pangsak dinga tuipi hual khang a bang ding uh hi. 4 Amaute in Tyre kulhte susia in a tausangte kaipuk ding uh hi. A leisek tangte nilkhia-in suang gawtak bek ka dawksak ding hi. 5 Keimah Thupipen TOPA in ka gensa ahi manin tuipi pua-a len phona mun a suak ding hi. Tuanu minamte galmat suak dinga, 6 a munpi-a a tensakte namsau in kivatmang ding hi. Tua ciangin amaute in keimah TOPA ka hilam hong thei ding uh hi.

7 “Bang hang hiam cih leh hih in, Thupipen TOPA gen ahi hi: Tyre a kumpite kumpipa Babylon kumpipa Nebuchadnezzar ^{▼▼26.7 Hebrew ah Nebuchadrezzar pen Nebuchadnezzar hi-a, a kilamdang lo ahi hi. Ezekiel mun le Jerimiah ah om thithe hi.} sim dingin leilu-lam panin galkap tampi, sakol, sakolleng le sakol galkapte tawh ka kuansak ding hi. 8 Amah in a munpi-a a tensakte namsau-in a vatmang ding hi; nang hong umcih nading bawlin na kulh banin phung ciang ding uh a, hong doin lum tawh kidal ding uh hi. 9 Amah in na kulhte molh-tumpi in khawhkham dinga, a galhiamte in na tausangte a phukmai ding hi. 10 A sakolte tam lua mahmah dinga leivui in nang hong tuamcip ding hi. Kulh kiphuvang a mi a lut henhan bangin na kongpi-ah amah a lut ciangin sakol galkap, van pua lengte le sakol-leng huging in na kulh a lingsak ding hi. 11 A sakolte in na kong zing khempeuh tuancil khin ding uh hi; na mite namsau in that dinga, a khauh mahmah na khuampite lei-ah puk ding hi. 12 Na hauhna hong puakmangsak ding uh a, na sum-buk van a la mang ding uh hi; na kulhte satkham ding uh a, a hoih mahmah na innte phelgawpin suangte, inn singte le leiseek-tangte tuipi sungah a pai ding uh hi. 13 Lasa-a gamlumna ka beisak dinga na harp tumging-te uh a kiza nawn kei ding hi. 14 Suang gawtak lak kong suaksak dinga nga betna lente kiphona mun na suak ding hi. Keimah TOPA in ka gensa ahi manin nang hong kilam kik ngei nawn kei ding hi, Thupipen TOPA in ci khia hi.

15 “Hih in Tyre tungah Thupipen TOPA gen ahi hi: Nang sungah mi kithatin aliamte a tau hun ciangin na pukna awging in tuipi gei-a gam teng lingsak ding hilo ahi hiam? 16 Tua ciangin tuipi gei-a gam-ukte khempeuh a kumpi tokhom panun tuakkhia ding uh a, a puantualpite uh koihkhia in a kizepna thupite uh a suahkhia ding uh hi. Patauhna bek silhin lei lakah tu ding uh a, a paisuk a paitohna-uah nang hong gimneihin lingling ding uh hi. 17 Tua ciangin nang tamlawhna in hong nei ding uh a, nang tungah: ^b

“‘Tuipi gei-a mite omna a minthang khuapi aw,
kinak siat na lawmlawm cia!
Nang le na sunga tengte,
tuipi tunga vang neite in
tua lai-a tengte khempeuh
na lausak uh hi.
18 Na pukni-in
tuipi gei-a gamte ling uh a,
na kicipna in
tuipi sunga tuikulhte lausak hi,’ hong ci ding uh hi. ^c

19 “Hih in Thupipen TOPA gen ahi hi: Keimah in kuama ten nawnloh nading gamsimtham kong suahsak ciang le tuipi thukpi nang kong tuupsak ciang, tuihualpite in nang hong tuam ciangin, 20 lei nuai-ah a paisate tawh tanglai peka a paisate kiangah, nang kong puak ding hi. Tangkum a kisiasa lei nuai-a a paisate tawh kong tengkhawmsak dinga, a nungtate tenna lei tungah hong kilehin mun ^{▼▼26.20 Septuagint Hebrew ah kihei lecin kong gualzosak ding hi} na ngah kik nawn kei ding hi. 21 A lipkhaphuai mahmah in kong beisak dinga na om nawn kei ding hi. Nang hong kizongzong dinga ahi hangin hong kimukik nawn kei ding hi, Thupipen TOPA in cikhia hi,” hong ci hi.