Eze 27 | ZomZIV | STEP | TOPA thu kei tungah hong tunga:

Ezekiel 27

Tyre Kitamlawhna

1 TOPA thu kei tungah hong tunga: 2 “Mihing tapa aw, Tyre taamlawh in. 3 Tuipi zuatna kongpi ah tengin tuipi gei mun tuamtuam pana sumbuk bawlte kisuktuahna-a teng Tyre tungah gen in: ‘Hih in Thupipen TOPA gen ahi hi: ^a

“‘Tyre aw, nang in,
“Mel hoihna khempeuh ka cin hi,” na ci hi.
4 Na ukna gam tuipite umcihna sung hi a;
nang hong lamte in hoihna kima hong zep uh ahi hi.
5 Amaute in hong lamna uh singte khempeuh
Senir ^{▼▼27.5 Tua pen Harmon} pana takkungte ahi hi.
Na puankhai khuam dingin
Lebanon panin tamtak sing a la uh hi. ^c
6 Nang hong kihawhna-khe dingin
Bashan pana tawsaw sing a bawl uh hi. ^d
Cyprus ^{▼▼27.6 Hebrew in Kittim} gei panin cypress ^{▼▼27.6 Targum; Masoretic Bupi in aw a suaksak lo} taksan la-in, ^g
na sual dingin phah uh a, saihapakin a zem uh hi.
7 Na puankhai pen hoihtaka kizem Egypt pana saihadial puan hi-a
na dialkhai-in kizang hi.
Na tungkhuh adum le adupsan-te ^h
Elishah dung pan ahi hi.
8 Nang hong hotte Sidon-te le Avad a tengte ahi uh hi;
Tyre aw, na misiamte mah in nang hong hawl uh hi. ⁱ
9 Gebal ^{▼▼27.9 Tua in Byglos} panin tanglai khutsiamte hong tuanga ^k
tembawpi hong lem uh hi.
Tuipi tunga tembaw khempeuh le a hawlte ^l
nang tawh kidawlsawn dingin hong zuan uh hi.
10 “‘Persia, Lydia le Put mite in ^m
na galkap na sem uh hi.
Amaute in a lum uh le a sik lukhu uh na kawm tungah khai uh a,
nang hong thupisak uh hi.
11 Avad le Helech mite in
na kulh kimkotah cing uh a,
Gamad-te
na tausangah om uh hi.
Amaute in na kulh kimkotah a lumte uh khai uh a;
na mel hoihna kimsak uh hi.

12 “‘Van hau lua mahmah na hi manin Tarshish in nang tawh sumbuk bawlkhawm hi; na sumbuk vante ngun, sik, daal le haknaw in hong kheng uh hi. ⁿ

13 “‘Greece-te, Tubal-te le Meshech-te in nang tawh sum a bawl khawm uh hi. Amaute in silate, sumngo a kibawl vante in na vante hong kheng uh hi. ^o

14 “‘Beth Togarmah mite in van pua sakolte, sakol galkapte, le laate-in na sumbuk van hong kheng uh hi. ^p

15 “‘Rhodes ^{▼▼27.15 Septuagint; Hebrew in Dedan} mite in nang tawh kizomin sumbawl uh a, tuipi gei-a om gam tampite in nang hong dawl uh hi; amaute in saihapak le ningsing hong pia uh hi. ^r

16 “‘A piang na tampi nei na hi manin Aram-te ^{▼▼27.16 Hebrew khutgelh tampen; Hebrew khutgelh pawlkhat le Syriac ah Edom} in nang tawh sum bawlkhawm uh hi. Amaute in na sumbuk vante turquoise, puan dupsan, puan kizemte, saihadial hoihte, suang khi le ruby-te in hong kheng uh hi. ^t

17 “‘Judah le Israel in nang tawh sum bawlkhawm uh a, na vanzatte, Minith pana piang mangbuh, moh namkim ^{▼▼27.17 Hebrew in hih kammal kician lo hi.} khuaizu, sathau le sing namtui tuamtuamin hong kheng uh hi. ^v

18 “‘A piang na tampi hang le van na hauh mahmah manin Damascus in nang tawh sum bawlkhawm a, Helbon pana zu le Zahar pana samulte hong zong uh hi. ^w

19 “‘Uzal pana Dan-te le Greek-te in na sumbuk vante hong lei uh hi; amaute in sik huansa, thaksing le thalsingte-in na vanzatte hong kheng uh hi. ^x

20 “‘Dedan-te in sakol dapphah puante sum bawlna in hong nei uh hi. ^y

21 “‘Arabia-te le Kedar gam-ukte khempeuh na van hong leite ahi uh hi; amaute in tuuno, tuutal le keel in hong lei uh hi. ^z

22 “‘Sheba le Raamah sumbukte in nang tawh sum a bawl uh hi; na sumbuk vante a hoih penpen sing namtui nam khempeuh le suang manpha le khamin hong kheng uh hi. ^aa

23 “‘Haran, Canneh le Eden le Sheba, Asshur le Kilmad sumbukte in nang tawh sum bawl uh hi. 24 Na sumbuk-zawn ah puan melhoihte, puandum, puan kizemte, limtaka kiphek sualphah puan mel tuamtuam le ciiptaka kihek bikbek khauhualte hong zuak uh hi. ^ab

25 “‘Na vanzatte
Tarshish tembawte in a pua uh hi. ^ac
Tuipi laizangah ^ad
van gik pipi tawh na kidim hi.
26 Nang hong hotte in
tuipi thuk tungah hong hot uh hi.
Ahi hangin nisuahna huih in ^ae
tuipi laizangah nang hong kitamnensak ding hi.
27 Na tembaw a kisiat ni ciangin
na hauhna, na sumbuk vante le na vanzatte, ^af
na tembaw hawlte, na tembaw nasemte, tembaw lemte,
na sumbukpa-te, na galkapte khempeuh le
tembaw tunga tuangte peuhmah
tuipi sungah a tum ding uh hi. ^ag
28 Na tembaw nasemte awng ding uh a,
tuipi gei teng a ling ding hi.
29 Tembaw hawhna lente khempeuh in
a tembaw uh taisan ding uh hi;
a hawlte le a nasemte khempeuh
tui gei-ah a ding diing uh hi.
30 A aw uh sangsakin
nakpi-in nang hong kah ding uh a,
amaute lutungah leivui thehin ^ah
vut lakah a kikhuk ding uh hi. ^ai
31 Nang hangin a lu uh mettol ding uh a, ^aj
ippi puan a silh ding uh hi.
Khasia lua-in nang hong kah ding uh a,
thumthum ding uh hi.
32 Amaute in nang hong kahin
a thum kawmun nang hong kahtapin: ^ak
“Tuipi in a umcih
Tyre banga gamdai kua om ngei tam?” ci-in taamlo ding uh hi.
33 Na sumbuk vante tuipi tungah a paikhiat ciangin
minam tampi tangsapna cingsak a;
na hauh mahmahna le na vanzatte in ^al
leitunga kumpite a hausak hi.
34 Tu-in tuipi in tuipi thuk sungah
nang hong kitamzansaka
na vanzatte le na mite khempeuh
nang tawh na tum khawm uh hi.
35 Tuipi gei-a tengte khempeuh in
mulkimhuai hong sa in ^am
a kumpite uh pumlin ding uh a,
lau in mengawp ding uh hi. ^an
36 Sumbukte in minamte lakah nang hong phitsan in,
lauhuaipi in na bei dinga,
na om kik nawn kei ding hi,’ ci-in,” hong ci hi. ^ao