Eze 29 | ZomZIV | STEP | A kum sawmna, a kha sawmna ni sawm le ni nih ni-in kei tungah TOPA thu hong tunga:

Ezekiel 29

Egypt Siat ding Genkholhna

1 A kum sawmna, a kha sawmna ni sawm le ni nih ni-in kei tungah TOPA thu hong tunga: 2 “Mihing tapa aw, Egypt kumpipa Pharaoh lam nga inla Egypt-te khempeuh le ama kisiat nading genkhol in. 3 Amah hopih inla: ‘Hih in Thupipen TOPA gen ahi hi: ^a

“‘Egypt kumpipa Pharaoh aw, ^b
nang na luite sunga a bok ganhing lianpi na hi a,
nang langah ka pang hi.
Nang in, “Nile kei aa ahi hi;
keima adinga ka bawlsa ahi hi,” na ci hi. ^c
4 Ahi hangin na khaguh ah sikkawi ka phut dinga, ^d
na lui sunga om ngasate nang tungah ka belhsak ding hi.
Na luite sung panin na tunga belhte khempeuh tawh ^e
nang hong kikaikhia khawm ding hi.
5 Nang le na luite sunga om ngasa khempeuh
sehnel-gamah kong hici nusiat ding hi.
Lopaang lakah na kia dinga
kuamah in hong khawm lo-in hong tawm kei ding hi. ^f
Leitung ganhingte le huihlak vasate an dingin
kong pia ding hi.

6 Tua ciangin Egypt-a tengte khempeuh in keimah TOPA ka hilam a thei ding uh hi.

“‘Nang Israel-te pumpeng ciangkhut na suak hi. 7 A khutun hong mek uh ciangin paa na hi manin kitamin a liangko uh na at a, nang tungah hong kingap uh ciangin na kitana a nung uh a hek ^{▼▼29.7 Syriac (Septuagint le Vulgate zong en in) Hebrew in nang in a nungzang uh na tang suaksak hi.} uh hi. ^h

8 “‘Tua ahi ciangin hih in Thupipen TOPA gen ahi hi: Nang kiangah namsau khat kong kuansak dinga na mite le a ganhingte uh ka thatsak ding hi. 9 Egypt-te a kinusia gamval a suak ding uh hi. Tua ciangin amaute in keimah TOPA ka hilam a thei ding uh hi. ⁱ

“‘Bang hang hiam cih leh nang in, “Nile kei aa hi a; keima bawlsa ahi hi,” na ci hi. 10 Tua ahi ciangin keimah nang le na luite langah ka pang hi, Egypt leitang ka siasak dinga Migdol panin Aswan ciang, Cush ^{▼▼29.10 Tua in Nile khunglam kual} gamgi dong gamtul gam simtham ka suaksak ding hi. 11 Mihing khe ganhing khe in tawn lo dinga; tua lai-ah kum sawmli sung kuamah a teng kei ding hi. 12 A kisiagawpte lakah Egypt leitang gamkhing ka suaksak dinga khuapi kisiate lakah gamkhingin a om ding hi. Minamte lakah Egypt mite ka delhzak dinga gam tuamtuam ah ka thehthang ding hi. ^k

13 “‘Tua khit ah hih in Thupipen TOPA gen ahi hi. Kum sawmli a cin ciangin a kithehthangna uh minamte lak panin Egypt mite ka kaikhawm ding hi. 14 A saltanna panun amaute ka paikhiatpih kik dinga a pute a pate uh Egypt ^{▼▼29.14 Hebrew in Pathros ah} saklam ah a ciah kik ding uh hi. Tua lai-ah kumpi gam gina lo khatin a om ding uh hi. 15 Kumpi gamte lakah a gina lo pen hi ding uh a, minam dangte tungah a suak kik zo nawn kei ding uh hi. Ginasak lo lua ding ka hi manin minamte khat beek a uk zo ngei nawn kei ding uh hi. 16 Israel mite adingin Egypt-te a muan bulpi uh ahi ngei nawn kei ding hi. Ahi hangin a huh ding deih ama lam a nga peuhmah adingin mawhna phawksakna hi ding hi. Tua ciangin amaute in keimah Thupipen TOPA ka hilam hong thei ding uh hi,’ ci in,” hong ci hi. ^m

17 A kum sawmnih le sagihna a kha masa, a ni masa ni-in TOPA thu kei tungah hong tung hi. 18 “Mihing tapa aw, Babylon kumpipa Nebuchadnezzar in a galkapte nakpi-in hanciamsak a Tyre a sim hi. A vek un a sam uh pulhin a lu uh tol a, a liangko uh a vun kolhkhia hi. Tuaci zawzen napi Tyre a simna uh hangin amah le a galkapte in bangmah pahtakman a ngah kei uh hi. 19 Tua ahi ciangin hih in Thupipen TOPA thugen ahi hi: Keimah in Babylon kumpipa Nebuchadnezzar tungah Egypt ka pia dinga a hauhnate a puakhia mang ding hi. A galkapte khasum dingin a leitangte matsakin a laksak ding hi. 20 Amah le a galkapte in ka na sem uh ahi manin a hanciamna ka thukna-in pahtakman in amah Egypt ka piak ahi hi, Thupipen TOPA in cikhia hi. ⁿ

21 “Tua ni ciangin Israel innkuante adingin ki ^{▼▼29.21 Hih lai-ah ki in thahatna lim hi} khat ka khangkhiasak dinga, amaute lakah na kam ka hong ding hi. Tua ciangin amaute in keimah TOPA ka hilam hong thei ding uh hi,” hong ci hi. ^p