Ezr 3 | ZomZIV | STEP | A kha sagihna a tun ciangin amau khuapi-a tengsa Israel mihonpite mi khat bangin Jerusalem ah a kikhawm uh hi.

Ezra 3

Biakna-tau Dawhkikna

1 A kha sagihna a tun ciangin amau khuapi-a tengsa Israel mihonpite mi khat bangin Jerusalem ah a kikhawm uh hi. 2 Tua ciangin Jozadak’ tapa Jeshua, ama siampi-pihte le Shealtiel tapa Zerubbabel le amah a huhte in, Pasian mipa Moses thukham sunga kigelhsa bangin, a tunga meihal biakna piak nading Israel-te Pasian biakna-tau dawh ding a kipan uh hi. 3 Amaute kima om mite kihta kawmkawmin a bulkip tung mahah biakna-tau dawh uh a, a tungah zingsang le nitakin TOPA tungah meihal biakna a pia uh hi. 4 Tua ciangin a kigelhsa bangin nisima zat dinga, kisam zah meihal biaknate tawh nisimin amaute in Biakbuk Pawi a bawl uh hi. 5 Tua khit ciangin amaute in a hunhunin meihal biaknate, Kha Thak sima biaknate le a kisehsa TOPA pawite bawlin tuate tawh TOPA tungah utthu-a biaknate a puakkhawm uh hi. 6 A kha sagihna a ni masa pen ni-in TOPA biakinnpi bulpi suang a kingak nai loh hangin TOPA tungah meihal biaknate piak a kipan uh hi. ^a

Biakinnpi Lamkikna

7 Tua ciangin amaute in suangseek-te le khut siamte sum pia uh a, Sidon le Tyre mite in Persia kumpipa Cyrus tungpan a thu ngahna bangun tuipi-in Lebanon pan Joppa ah tamtak singluang a puaksuk nadingun annek tuidawn le sathau a pia hi. ^b

8 Jerusalem a Pasian inn a tun uh a kum nihna, a kha nihna kha in Shealtiel tapa Zerubbabel, Jozadak’ tapa Jeshua le amau sanggamte khempeuh (siampite le Levi-te le saltanna pan Jerusalem a ciah kikte khempeuh) in nasep pan uh a, TOPA inn lamna vaan dingin Levi-te, kum sawmnih pan a tungsiah phate a seh uh hi. 9 Jeshua le a tapate le a sanggampate le Kadmiel le a tapate (Hodaviah suante) ^{▼▼3.9 Hebrew ah Yehudah, Hodaviah tawh kilamdang lo.} le Henadad’ tapate le amau tapate, le a sanggampate uh - Levi-te khempeuh kigawmkhawmin Pasian inn sepna a vaankhawm uh hi. ^d

10 TOPA biakinnpi lamte in innbul suang a ngak khit uh ciangin Israel kumpipa David gelkholhsa bangin siampite in a puan uh silh uh a, pengkul tawi kawmin, Levi-te (Asaph tapate) a daltuah uh tawh amau omna munah TOPA phat dingin a om uh hi. 11 Phatna le lungdamkohna tawh TOPA la sak uh a: ^e

“Amah hoih hi;
Israel a itna kip tawntung hi,” a ci uh hi. ^f

Tua ciangin mipi khempeuh nakpi takin awng uh a TOPA a phat uh hi; bang hang hiam cih leh TOPA innbul suang a kinga khin hi. 12 Ahi hangin midang tampite lungdama a ot laitakun biakinnpi a masa pen a mu siampite, Levi-te le innkuan lutang a upa zawdeuhte in biakinnpi bul kinga khin a muh uh ciangin nakpi in a kap uh hi. 13 Mipi gamlum lua ahi manin nuama kikona awging le kahna awging kuamah in a khentel thei kei hi. Tua hi a, gamlapi panin tua awging kiza hi.