Gen 27 | ZomZIV | STEP | Isaac a tek ciangin a mit gina lo-a khua a mu nawn kei hi. Amah in a tapa upa pen Esau sama, a kiangah, “Ka tapa aw,” ci hi. Amah in, “Hiah ka om hi,” ci-in dawng hi.

Genesis 27

Jacob in Isaac’ Thupha Ngah

1 Isaac a tek ciangin a mit gina lo-a khua a mu nawn kei hi. Amah in a tapa upa pen Esau sama, a kiangah, “Ka tapa aw,” ci hi. ^a

Amah in, “Hiah ka om hi,” ci-in dawng hi.

2 Isaac in, “Putek khat ka hita hi, ka sih ni ding ka thei kei hi. 3 Tua ahi ciangin tu-in na hiamte - na thaltang le na thal la inla, gam sungah kuankhia-in kei ading gamsa va beng in. 4 Ka sih ma-a ka thupha nang kong piak theih nadingin ka duh anlim kei adingin hong huan inla ka nek dingin hong lui in,” ci hi.

5 Isaac in a tapa Esau a hopih laitakin Rebekah in ngai gige hi. Esau in a pa a puak ding sa beng a, gam a kuan ciangin, 6 Rebekah in a tapa Jacob kiangah, 7 “En in, na pa in na sanggampa Esau kiangah, ‘Ka sih ma-in TOPA’ mai-ah ka thupha nang kong piak theih nadingin gamsa pawlkhat hong puakin a lim mahmah in ka nek dingin hong huan in,’ a cih ka za hi. 8 Tu-in, ka ta aw, limtakin na ngai inla kong gen bangin hih in: 9 Ganhon lakah va pai inla keelno dawng nih va teel in. Na pa ading ama duh bang tektekin ka huan ding hi. 10 Tua ciangin na pa in a sih ma-a ama thupha nang hong piak nadingin na pa nek dingin va puak in,” ci hi.

11 Jacob in a nu Rebekah kiangah, “Ahi hangin ka sanggampa Esau a mulpha hi a, kei cinel mi ka hi hi. 12 Ka pa in hong lawng kha leh bangci ding hiam? Amah ka khemna hong kilang dinga, kei tungah thupha hong piak sangsikin hong hamsiat ek kha ding hi,” ci hi. ^b

13 A nu in ama kiangah, “Ka ta aw, tua hamsia kei tung tu ta hen. Ka gen bangin hih peuh in; pai inla tuate va la meng in,” ci hi. ^c

14 Tua ciangin amah pai-a tuate manin a nu puaka, a nu in a pa duh bangin an lim pawlkhat huan hi. 15 Tua ciangin Rebekah in a tapa upazaw Esau in a inn sunga a neih a puan hoih pente la in a tapa nauzaw pen Jacob a silhsak hi. 16 Amah in a khutte le a cinelna mun a ngawng teng zong keelvunte in a tuam hi. 17 Tua ciangin a tapa Jacob tungah ama bawlsa anlimte le anlum pia hi. ^d

18 Amah a pa kiangah pai-a, “Pa aw,” a ci hi.

Amah in, “Hawi, ka tapa aw, kua na hi?” ci-in a dawng hi.

19 Jacob in a pa kiangah, “Na ta masa Esau ka hi hi; nong sawl bangin ka hih zo hi. Na thupha kei nong piak theih nadingin nong hehpihna-in tuto in gamsa ne in,” ci hi. ^e

20 Isaac in a tapa kiangah, “Ka ta aw, koi-ah bang va ci mat pak na hiam?” ci-in a dong hi.

Amah in, “TOPA na Pasian in kei hong lawhcingsak hi,” ci-in dawng hi. ^f

21 Tua ciangin Isaac in Jacob kiangah, “Ka ta aw, ka tapa Esau na hileh na hi loh kong theih nadinga kong lawn theih nadingin ka kiangah hong neh in,” ci hi.

22 Jacob in Isaac kiang neh a, amah in lawngin, “A aw Jacob’ aw hi a, ahi hangin a khut lah Esau khut ahi hi,” a ci hi. 23 A khutte Esau aa bangin a mul pha ahi manin amah a theikhia zo kei hi; tua ahi ciangin amah thupha pia hi. 24 Amah in, “Ka tapa Esau na hi takpi hiam?” ci-in a dong hi. ^g

Amah in, “Hi mah ing,” ci-in a dawng hi.

25 Tua ciangin, “Ka tapa aw, ka thuphate kong piak theih nadingin na gamsa matte ka nek dingin hong pia in,” ci hi.

Jacob in amah pia-a, a ne hi; lenggahzu zong pia-a, dawn hi. 26 Tua ciangin a pa Isaac in ama kiangah, “Ka tapa aw, hiah hong pai inla hong nam in,” ci hi.

27 Tua ciangin amah a kiangah pai-in a nam hi. Isaac in a puan gim a dikkhak ciangin amah thupha pia a, ^h

“Ah, ka tapa gimnam pen,
TOPA thupha piaksa gamlak
gimnam tawh kibang hi.
28 Ka Pasian in vantung daitui le ⁱ
lei’ hauhnate - buh le
lenggahzu thak a dimin hong pia ta hen. ^j
29 Minamte in na na sem henla, ^k
nang tungah mite kun ta hen. ^l
Na sanggamte tungah topa hi inla,
na nu’ tapate na mai-ah kun uh hen.
Nang hong hamsiatte kihamsiat henla,
nang thupha hong piate thupha kipia hen,” ci hi. ^m

30 Isaac in amah thupha a piak man khina, a pa omna a nusiat khit phetin a sanggampa Esau sabetna pan a tung hi. 31 Amah in zong an lim pawlkhat huana, a pa kiangah puak hi. Tua ciangin ama kiangah, ‘Pa aw, na thupha nong piak theih nadingin tuto in ka gamsa ne in,” ci hi.

32 A pa Isaac in, “Nang kua na hiam?” ci-in dong hi.

Amah in, “Nangma tapa, na ta masa Esau ka hi hi,” ci-in dawng hi.

33 Isaac in ling kalkal kawmin, “Tua ahileh gamsa benga kei hong puak kua hi mawk hiam? Nong tun madiakin ka ne khina, amah thupha ka pia khin hi - amah in thupha a ngah takpi ding hi,” ci hi. ⁿ

34 Esau in a pa thugente a zak ciangin nakpi-in awngkhia beba a, “Pa aw, kei thupha hong pia in - kei zong,” ci hi. ^o

35 Ahi hangin amah in, “Na sanggampa in hong khemin na thupha a la khin zo hi,” ci hi. ^p

36 Esau in, “A min Jacob ^{▼▼27.36 Jacob pen amah khetul len tentan cihna (amah in khem cihna lim)} a kiphuah a man ngel veleh; amah’n tu-a tawh nih vei hong khem ta hi. Ka tapa upa za la zo a, tu-in ka thupha la khin zel hi!” a ci hi. Tua ciangin, “Kei ading thupha adang sit lai lo na hi hiam?” ci-in dong hi. ^r

37 Isaac in Esau kiangah, “Amah na topa dingin ka bawl khina, a behte khempeuh ama nasem a suak dingin ka bawla, buh le lenggahzu tawh kidiah dingin ka bawl khin zo hi. Tua ahi ciangin nang ading bang hih thei nawn ding ka hi hiam, ka tapa aw,” ci hi.

38 Esau in a pa kiangah, “Pa aw, thupha khat bek nei na hi hiam? Pa aw, kei zong thupha hong pia in!,” a ci hi. Tua khit ciangin Esau nakpi in kap hi. ^s

39 A pa Isaac in,

“Na tenna,
leitang hoihna pualam,
tunga van daitui pualam hi ding hi. ^t
40 Namsau-in na nungta dinga,
na sanggampa’ na na sem ding hi.
Ahi hangin na kitomtom dinga
na ngawng pana ama hakkol
na lawnkhia ding hi,” ci-in a dawng hi. ^u

Laban Kiangah Jacob Tai

41 A pa in Jacob thupha a piakna hangin Esau in amah langbawla, a hua hi. Amah le amah, “Ka pa hanga thum nading ni nai ta hi; tua khit ciangin ka sanggampa Jacob ka that ding hi,” ci hi. ^v

42 A tapa uzaw pen Esau in tua bang a cih Rebekah tunga a kigen ciangin a tapa nauzaw Jacob vaikhaka, ama kiangah, “Na sanggampa Esau nang thah ding ngaihsutna tawh amah le amah kihehnem hi. 43 Ka ta aw, tu-in kong gen bangin hih in: Haran a ka sanggampa Laban kiangah manlang in taipah in. 44 Na sanggampa hehluatna a kap mateng amah tawh tawmvei sung va om in. 45 Na sanggampa nang tungah heh nawn lo a, amah na bawlnate a mangngilh ciangin tua pana nong ciah nading kam kong vaikhak ding hi. Note gel ni khatthu-in hong taan khawm ding ka hi hiam?” ci hi. ^w

46 Tua ciangin Rebekah in Isaac kiangah, “Hih Hit numeite tawh nuntak ka cimtak hi. Jacob in hih gam numeite lak panin a zi dingin hih bang numei mah a lak leh, ka nuntakna in man a nei kei ding hi,” ci hi. ^x