Gen 29 | ZomZIV | STEP | Tua ciangin Jacob in a khualzin ban zoma, nisuahna mite’ gam tung hi.

Genesis 29

Paddan Aram ah Jacob Tung

1 Tua ciangin Jacob in a khualzin ban zoma, nisuahna mite’ gam tung hi. 2 Tua lai-ah lo sungah tuikhuk khat mu-a, tua tuikhuk ah tui a kipiak mana a kianga lum tuuhon thum a om hi. Tuinak vang sitna suang a lian hi. 3 Tuu honte khempeuh tua lai-ah a kikhop khit ciangin tuu cingte in tuinak hukna suang likkhia-a tuute tui pia uh hi. Tua khit ciangin amaute in a omna ngei tuinak vang ah tua suang koih kik uh hi. ^a

4 Jacob in tuucingte kiangah, “Sanggamte no koi pan na hi ua?” ci-in dong hi.

Amaute in, “Ko Haran pan ka hi uh hi,” ci-in dawng uh hi. ^b

5 Amah in amaute kiangah, “Nahor’ tupa Laban na thei kha uh hia?” ci hi.

Amaute in, “Thei mah ung,” ci-in dawng uh hi. ^c

6 Tua ciangin Jacob in amaute kiangah, “Amah a dam hiam?” ci-in a dong hi.

Amaute in, “Dam mah, hih lai-ah zong tuute tawh a tanu Rachel hong pai hi,” ci uh hi.

7 Amah in, “En un ni sang lai hi; gankhop hun nai lo hi. Tui pia unla lonona-ah khah kik un,” ci hi.

8 Amaute in, “Tuuhon khempeuh kikhawm kim-a tuinak vanga suang a kilikkhiat mateng ka hih thei kei uh hi. Tua khit ciangin tuute tui ka pia pan ding uh hi,” ci-in dawng uh hi. ^d

9 Amaute a kihoho laitakun a pa’ tuute tawh Rachel a va pai hi; amah tuucingnu ahi hi. 10 Jacob in a nu sanggampa Laban’ tanu Rachel le Laban tuute a muh ciangin pai-in tuinak vanga suang likkhia-a, a pu’ tuute tui pia hi. 11 Tua ciangin Jacob in Rachel nama, a kapkhia hi. 12 Amah in Rachel kiangah amah a pa behte hi a, Rebekah’ tapa ahilam kigen hi. Tua ciangin tuanu tai-a a pa a ko hi.

13 Laban in a sanggamnu tapa Jacob thu a zak phetin a kimu dingin taipah hi. Amah in kawi-in nama, a innah paipih in tua lai-ah Jacob in hih thute a gen hi. 14 Tua ciangin Laban in ama kiangah, “Nang ka si le sa taktak na hi hi,” ci hi.

Jacob in Leah le Rachel Tenpih

Jacob amah tawh kha khat bit a om khit ciangin 15 Laban in, “Ka beh taktak na hi manin bangmah thalawh loin ka na nong sepsak ding hiam? Na thaman ding bang hiam hong gen dih in,” ci hi. ^e

16 Tua laitakin Laban in tanu nih nei hi; a uzaw pen min Leah hi-a, a nauzaw pen min Rachel ahi hi. 17 Leah pen a mit zam ^{▼▼29.17 Ahikeh ngaihbaang} a, ahi hangin Rachel ahileh a duang hoih in ithuai-a, a mel hoih hi. 18 Jacob in Rachel ngai-a, “Na tanu nauzaw Rachel kong thalawhna in kum sagih na na kong sepsak ding hi,” ci hi. ^g

19 Laban in, “Midang khat ka piak sangin nang kong piak ding hoihzaw hi. Kei tawh omkhawm in,” ci hi. 20 Tua ahi ciangin Jacob in kum sagih sung Rachel a thalawh hi. Ahi hangin amah a itna hangin tua pen ni tawmno tawh kibang hi. ^h

21 Tua khit ciangin Jacob in Laban kiangah, “Ka zi hong pia in. Ka hun cing khin ta hi; amah tawh ka lumkhawm nuam hi,” ci hi.

22 Tua ciangin Laban in tua muna om mi khempeuh kikhawmsakin pawi bawl hi. 23 Ahi hangin nitak ciangin a tanu Leah paipih in Jacob pia a, Jacob in amah luppih hi. 24 Laban in a nasemnu Zilpah a tanu nasem dingin pia hi. ⁱ

25 Zingsang ciangin Leah na hi mawk hi! Tua ciangin Jacob in Laban kiangah, “Kei hong bangci bawl na hiam? Ke’n Rachel kong thalawh hi; hi lo ka hia? Bang dinga hong khem na hi hiam?” ci hi.

26 Laban in, “Hih lai-a ko ngeina-ah a u neih ma-in a nau in pasal nei ngei lo hi. 27 Hih ka tanu mopawi nipi khat beisak phot inla, tua ciangin adang kum sagih na sepna thaman in a neuzaw pen zong kong pia ding hi,” ci hi.

28 Jacob in a cih bangin a hih hi. Leah tawh nipi kal khat mansaka, tua ciangin Laban in a zi dingin a tanu Rachel amah pia hi. 29 Laban in a nasemnu Bilhah a tanu Rachel nasem dingin pia hi. 30 Rachel tawh zong Jacob lumkhawm a Leah sangin Rachel a itzaw hi. Laban’ na a dang kum sagih sepsak lai hi. ^j

Jacob’ Tate

31 Leah a ki-it loh lam TOPA in a theih ciangin a naubu honsaka, ahi hangin Rachel pen tasel ahi hi. 32 Leah gaii-a tapa khat a nei hi. A min Reuben ^{▼▼29.32 Reuben pen Hebrew ah ka dahna hong mu zo hi, cihna tawh a aw kibang hi. A min pen tapa khat mukhia cihna.} phuak hi. Ahang in, “TOPA in ka gimna a mu khin hi. Tu-in ka pasal in hong it ta ding hi,” ci hi. ^l

33 Nau paii leuleu a, tapa khat a suah ciangin amah in, “Kei hong ki-it loh lam TOPA in za zo a, hih pen zong hong piak ahi hi,” ci hi. Tua ahi ciangin a min Simeon ^{▼▼29.33 Simeon pen a zapa cihna hi kha ding hi.} phuak hi.

34 Aman nau paii kik leuleu a, tapa khat a suah kik ciangin, “Tu ngawngaw in amah tawh tapa thum nei ta ka hi manin ka pasal in hong it ta ding hi,” ci-a a min Levi ^{▼▼29.34 Levi pen beel cihna tawh a aw kibanga tua pana Hebrew a kingah hi kha ding hi.} phuak hi. ^o

35 Amah in nau paii kik leuleu a, tapa khat a suah kik ciangin, “Tu hunin TOPA ka phat ding hi,” ci-a, a min Judah ^{▼▼29.35 Judah pen Hebrew kam in phat cihna aw tawh kibanga tua pana kingah hi kha ding hi.} phuak hi. Tua ciangin a ta neih tawp ta hi.