Gen 30 | ZomZIV | STEP | Rachel in Jacob tawh ta khat beek a neih loh lam a theih ciangin a sanggamnu a haza hi. Tua ahi ciangin Jacob kiangah, “Ta nong piak kei leh ka si ding hi!” ci hi.

Genesis 30

1 Rachel in Jacob tawh ta khat beek a neih loh lam a theih ciangin a sanggamnu a haza hi. Tua ahi ciangin Jacob kiangah, “Ta nong piak kei leh ka si ding hi!” ci hi.

2 Jacob a heh suak-a, “Ta hong neisak lo Pasian muna om ka hi hiam?” ci hi. ^a

3 Tua ciangin tuanu in, “Hiah ka nasemnu Bilhah a om hi. Kei ading ta a neih theih nading le ama tungtawna ka innkuan a pian theih nadingin amah luppih in,” ci hi. ^b

4 Tua ciangin ama nasem Bilhah a zi khat dingin a pia hi. Jacob in tuanu luppih a, 5 gaii-in amah tawh tapa khat nei hi. 6 Tua ciangin Rachel in, “Pasian kei lamah pang hi; ka thumna hong ngai zo a, tapa khat hong pia hi,” ci hi. Tua hangin amah in a min Dan ^{▼▼30.6 Hih lai ah Dan pen amah mawhpeng cihna} phuak hi. ^d

7 Rachel’ nasemnu Bilhah in nau paii leuleu a, a tapa nihna a suak hi. 8 Tua ciangin Rachel in, “Ka sanggamnu tawh nakpi takin ka kinawk uh a, ken ka zo hi,” ci hi. Tua ahi ciangin amin Naphtali ^{▼▼30.8 Naphtali pen ka haksatna cihna} phuak hi. ^f

9 Leah in amah tatawp ahi lam a kitheih ciangin a nasemnu Zilpah Jacob zi dingin pia hi. 10 Leah nasemnu Zilpah in Jacob tawh tapa nei hi. 11 Tua ciangin Leah in, “Hampha si’ng!” ^{▼▼30.11 Ahikeh “galkap honkhat hong pai”} ci-in a min Gad ^{▼▼30.11 Gad pen daupai ahikeh hon khat cihna} phuak hi.

12 Leah nasemnu Zilpah in Jacob tawh tapa a nihna a nei hi. 13 Tua ciangin Leah in, “Ka lungdam lua! Numeite in kei lungdam hong ci ding uh hi,” ci hi. Tua ahi ciangin a min Asher ^{▼▼30.13 Asher pen lungdam cihna} phuak hi. ^j

14 Mangbuh lak hun laitakin gamlakah Reuben a vakkhiat leh zawl-ai kung pawlkhat mu-a, a nu Leah a puak hi. Rachel in Leah kiangah, “Hehpihna-in na tapa’ zawl-ai tawm hong hawm in,” ci hi.

15 Ahi hangin amah in tuanu kiangah, “Ka pasal nong suh phazo sa lo na hi hiam? Ka tapa’ zawl-ai zong lak sawm lailai na hi hiam?” ci hi. ^k

Rachel in, “Hoih mahmah hi, na tapa’ zawl-ai tangin amah nang kiangah hong lum thei hi,” a ci hi. ^l

16 Tua hi a, tua nitakin gamlak panin Jacob a ciah ciangin amah dawn dingin Leah a paikhia hi. Amah in, “Ka tapa’ zawl-ai tawh nang kong nuh sa hi,” a ci hi. Tua ciangin amah tuanu tawh tua zan a lum hi.

17 Pasian in Leah thungetna za a, amah gai-in Jacob tawh tapa a ngana a nei hi. 18 Tua ciangin Leah in, “Pasian in ka nasemnu ka pasal tungah ka piak manin kei pahtakman hong pia hi,” ci hi. Tua ahi ciangin a min Issachar ^{▼▼30.18 Isaachar pen pahtakman tawh aw kibang} phuak hi. ⁿ

19 Leah in nau paii leuleu a, Jacob tawh tapa a gukna a nei hi. 20 Tua ciangin Leah in, “Pasian in letsong manpha kei hong pia hi. Tu-in tapa guktak neita ka hi manin ka pasal in hong pahtawi buang ding hi,” ci hi. Tua ahi manin a min Zebulun ^{▼▼30.20 Zebulun pen pahtawi hi thei hi} a phuak hi.

21 Tua khit a sawt sim ciangin tanu khat nei-a, a min Dinah phuak hi. ^p

22 Tua ciangin Pasian in Rachel a phawk hi; tuanu thu ngai-a, a sul honsak hi. 23 Amah gai-in tapa khat nei-a, “Pasian in mi hong maimawlsakna teng lakhia zo hi,” a ci hi. 24 A min Joseph ^{▼▼30.24 Joseph pen aman gawm thei cihna} phuak-a, “TOPA in tapa dang hong piak beh ta hen,” ci hi. ^r

Jacob Ganhonte Khang

25 Rachel in Joseph a neih khit ciangin Jacob in Laban kiangah, “Ka gam leitangah ka ciah kik theih nadingin kei hong sawl ta in. 26 Nang tunga kong thalawhsa ka zite ka tate hong pia inla ka ciah ta ding hi. Na na bangzah in sem ka hiam, cih na thei hi,” ci hi. ^s

27 Ahi hangin Laban in ama kiangah, “Nong angvan zawh leh nong hehpihna in om lai un. Nang hangin TOPA in thupha hong piakna ka mukhin ^{▼▼30.27 Ahikeh a hau ka suak thei khin a} hi,” a ci hi. 28 Amah in, “Na thamante hong gen inla kong pia ding hi,” cih beh lai hi. ^u

29 Jacob in ama kiangah, “Nang ading ka sepsa le na gankhawite ka cin sunga a khanna na thei zo hi. 30 Kong tun ma-a tawmkha na neihte tampitak pha a, ka hihna peuhpeuh ah TOPA in nang thupha hong pia hi. Ahi hangin cik ciangin ka inn sunga ding sem ding ka hi hiam?” ci hi. ^v

31 Amah in, “Nang bang hong pia ding ka hi hiam?” ci-in dong hi.

Jacob in, “Bangmah hong pia kei in, ahi zongin kei adingin hih na khat na hih leh na tuuhonte vaanin ka cing ding hi: 32 Tuni-in na tuuhon khempeuh lakah vak kawikawi in tuu a sihkapte ahikeh a gialte, tuuno vomte le keel a sihkap ahikeh a gialte a honte pan ka khenkhia ding hi. Tuate ka thaman hi ding hi. 33 Mai lamah kei nong piak thamante na et peuhpeuh ciangin ka thumanna in teci hong pang ding hi. Kei neihsa keel lakah a sihkap ahikeh a gial ahi zongin tuuno a vom lo a kimuh leh a kigu in kingaihsun ding hi,” ci-in dawng hi.

34 Laban in, “Ka thu kim hi, na gensa bangin hisak in,” ci hi. 35 Tua ni mah in keel a pate a dunggial le a sihkapte khempeuh le keel a nu a sihkap le a gialte khempeuh (a dangte khempeuh a kang ahi hi.) le tuuno vomte khempeuh khenkhia-a, a tapate cingsak hi. 36 Tua ciangin amah le Jacob kikal ni thum paina-ah cing a, Jacob in a om lai Laban gan honte cing hi. ^w

37 Jacob in hiangpa, almond le poplar kungte pan a hiang thakte sat-a, a hawngte gitin hawkkhia a, a sunga a kangte a dawksak hi. 38 Tua ciangin ganhonte tuidawn a, a pai cianga thakhat-a a muh pah theih nading munah tua singhiang gialte, tui piakna kuangzawn omna khempeuhah a koih hi. Tuuhonte in nisa thuaka, tui dawn dingin a pai ciangin, 39 tua singhiangte mai-ah a kilu uh hi. No a neih uh ciangin a dunggial tawh, a sihkap tawh a gial tawh ahi hi. 40 Jacob in tuunote khenkhia-a, ahi hangin a om laite Laban aa sunga a dunggialte le a vomte lam a ngasak hi. Tua bangin amah in ama aate Laban gante lakah koih loin a tuamin khen hi. 41 A nu a hat zawte a huk a om peuhpeuh ciangin a kianga a kiluk theih nadingun Jacob in a ganhingte mai kuangzawn sungah singhiangte koih hi. 42 Ahi hangin a ganhingte a ginat kei leh tua lai-ah a koih kei hi. Tua ahi ciangin a gina lote Laban aa hi a, a hatzawte Jacob aa ahi hi. 43 Hih bangin mipa daupai pha mahmah a, tuuhon tampi, nasem numei, nasem pasal, kala-oh le laa-te nei hi.