Gen 46 | ZomZIV | STEP | Tua ciangin a neihsa khempeuh tawh Israel kuankhia-a Beersheba a tun ciangin a pa Isaac’ Pasian tungah biakpiaknate pia hi.

Genesis 46

Egypt ah Jacob Pai

1 Tua ciangin a neihsa khempeuh tawh Israel kuankhia-a Beersheba a tun ciangin a pa Isaac’ Pasian tungah biakpiaknate pia hi. ^a

2 Israel in zanin mang mu a Pasian in, “Jacob, Jacob,” ci hi. ^b

Amah in, “Hiah ka om hi,” ci-in dawng hi. ^c

3 Amah in, “Keimah Pasian, na pa’ Pasian ka hi hi; Egypt ah na paisuk ding lau kei in, ahang in, tua lai-ah nang minam lian khat kong suaksak ding hi. 4 Egypt ah nang kong tonpih suk dinga, kong ciahpih kik pelmawh ding hi. Joseph khut in na mit a khupsak ding hi,” ci hi. ^d

5 Tua ciangin Jacob in Beersheba nusia a, Israel’ tapate in a pa uh Jacob le a zi a tate uh Pharaoh in ama tuan nadinga a khak lengte tungah a tuangsak uh hi. 6 Amaute in a ganhonte uh zong hawl uh a, Canaan-a, a neihsate uh le a suan-le-khakte khempeuh uh tawh Egypt ah a pai uh hi. 7 Amah in ama suan-le-khakte - a tapate, a tupate le a tanute le a tunute khempeuh Egypt ah tonpih hi.

8 Hihte, Egypt a pai Israel mite (Jacob le a suan-le-khakte) ahi hi. ^e

Jacob ta upa pen Reuben.
9 Reuben’ tapate: ^f
Hanoch, Pallu, Hezron, le Carmi.
10 Simeon’ tapate: ^g
Jemuel, Jarmin, Ohad, Jakin, Zohar le Canaan numei’ tapa Shaul
11 Levi’ tapate: ^h
Gershon, Kohath le Merari.
12 Judah’ tapate: ⁱ
Er, Onan, Shelah, Perez le Zerah (ahi hangin Er le Onan Canaan leitangah si zo hi.)
Perez’ tapate: ^j
Hezron le Hamul.
13 Issachar’ tapate: ^k
Tola, Puah, ^{▼▼46.13 Samaritan Pentateuch le Syraic(Kh.7:1 zong en in) Masoretic Bute ah Puvah} Jashub ^{▼▼46.13 Samaritan Pentateuch le Septuagint khutgelh pawlkhat ah (Ms.26:24 le Kh. 7:1 zong en in) Masoretic Bute ah Iob} le Shimron.
14 Zebulun’ tapate: ⁿ
Sered, Elon le Jahleel.

15 Hihte, Paddan Aram ^{▼▼46.15 Tua pen Masopotamia Sak-nitumna} a Leah in Jacob tawh a neih tapate banah ama tanu Dinah ahi hi. Hih ama tanu le tapate a vekin sawm thum le thum ahi hi.

16 Gad’ tapate: ^p
Zephon ^{▼▼46.16 Samaritan Pentateuch le Septuagint(Ms.26:15 zong en in); Masoretic Bu ah Ziphion} Haggi, Shuni, Ezbon, Eri, Arodi le Areli.
17 Asher’ tapate: ^r
Imnah, Ishvah, Ishvi le
Beriah Amau sanggamnu Serah ahi hi.
Beriah’ tapate:
Heber le Malkiel.

18 Hihte, Laban in a tanu Leah tunga a piak, Zilpah in Jacob tawh a neih tate hi a - a vekin sawm le guk ahi hi.

19 Jacob’ zi Rachel’ tapate:
Joseph le Benjamin. 20 Egypt ah Joseph in On ^{▼▼46.20 Tua pen Heliopolis} a siampi Potiphera’ tanu Asenath tawh Manasseh le Ephraim nei hi.
21 Benjamin’ tapate:
Bela, Beker, Ashbel, Gera, Naaman, Ehi, Rosh, Muppim, Huppim le Ard.

22 Hihte, Jacob pana suak Rachel tapate hi a - a vekin sawm le li ahi hi.

23 Dan’ tapa:
Hushim:
24 Naphtali tapate:
Jahziel, Guni, Jezer le Shillem.

25 Hihte, Laban in a tanu Rachel tunga a piak Bilhah in Jacob tawh a neih tapate hi a - a vekin sagih ahi hi. ^t

26 Egypt a Jacob tawh a paite khempeuh - a tapate’ zite kisim lo - ama suan-le-khak bekbek - mi sawm guk le guk ahi hi. 27 Egypt a suak Joseph’ tapa ^{▼▼46.27 Hebrew le Septuagint ah naupang kua} gel tawh, Egypt a pai Jacob innkuan peuhmah a vekin sawm sagih ^{▼▼46.27 Hebrew ( Pai 1:15 le footnote);septuagint (Ns 7:14 zong gen in) sawm sagih le nga} ahi hi. ^w

28 Tu-in Jacob in Goshen lam a lak dingin Joseph kiangah Judah a mapaisak hi. Amaute Goshen kual a tun uh ciangin, 29 Joseph in a sakolleng kithawisak-a, a pa Israel dawn dingin Goshen ah pai hi. Ama mai a muh phetin Joseph in a pa ^{▼▼46.29 Hebrew ah amah pumkawi} pumkawi-a sawtveipi kap hi.

30 Israel in Joseph kiangah, “Tu-in nang a nungta lai na hilam kei mahmah in hong mu khin ka hi manin ka si zongin phamawh ka sa kei hi,” ci hi.

31 Tua ciangin Joseph in a sanggamte le a pa’ innkuanpihte tungah, “Pharaoh kiangah va pai-in, ‘Canaan gama teng ka sanggamte le ka pa’ innkuanpihte ka kiang hong tung zo hi. 32 Tua mite tuu cingte ahi uh hi; amaute in gan cing uh a, a tuuhonte, a bawnghonte, a neih khempeuh uh hong hawl uh hi,’ ka va ci ding hi. 33 Pharaoh in hong sap-a, ‘Bang sem na hi uh hiam?’ ci-a hong dot ciangin, 34 ‘Na nasemte in ka pa uh sep bang tektekin ka neu tungua kipan gan ka cing uh hi,’ ci-in na dawng ding uh hi. Tua hileh note Goshen ah hong kitengsak ding hi; ahang in, Egypt-te in tuucing peuhmah a kih uh hi,” ci hi. ^y