Hab 3 | ZomZIV | STEP | Kamsangpa Habakkuk thungetna. Shigionoth tawh kithuah.

2 TOPA aw, na minliatna ka za khin a, ^b
na sepsate lamdang ka sa mahmah hi, TOPA aw. ^c
Ko hunin hong thaksuaksakin,
ko hun mahin kitheikhiasak inla,
na thangpaih hunin nong lainat ding phawk in.
3 Teman panin Pasian hong pai-a,
Paran Vum panin Siangtho Pa hong pai hi. ^{d
,} ^{▼▼3.3 A kician lo laimal khat hi-a, tumtheih bi khat hi thei ding hi; tg. 9 le 13 ah zong.}
Ama minthanna in vante tuama, ^f
amah kiphatna leitung a dim hi. ^g
4 Ama thupina nisuak tawh kibang hi; ^h
ama khut panin nizangte tangkhia hi,
ama vangliatna tua ah kisel hi. ⁱ
5 Ama ma-ah gimna a pai hi;
a kalsuannate a kilawhbaih natna in zui hi. ^j
6 Amah dinga lei kiling hi;
amah khuadaka minamte a lingsak hi.
Tangtawng mualliante kitamkham a, ^k
tanglai mualneute kicim hi. ^l
Ama lampite a tawntung ahi hi. ^m
7 A lungdong Cushan-te puanbukte le
lunggim mahmah a teng Midian-te ka mu hi. ⁿ
8 TOPA aw, gunte tungah heh na hi hiam? ^o
Luineute tungah thangpai na hi hiam?
Na sakolte tung le
na gualzawhna lengte tungah na tuan ciangin ^p
tuipi tungah thangpai na hi hiam?
9 Na thal na tuam kei a,
thaltang tampi na guang hi. ^q
Gunte in leitung na phelkhap hi;
10 mualliante in nang hong mu uh a, toncip uh hi. ^r
Tuizeupi kihot suk kihot to hi;
tui thukpite hawk uh a, ^s
tuihualte sangpipi ah a kilaamto uh hi.
11 Na thaltangte a len zalzalna, ^t
na teipite khuaphia bangin a tee zalzalna vante ah, ^u
ni le kha a khawlcip hi. ^v
12 Thangpaisa-in leitung na tuancil a,
hehsa-in minamte na tuangawp hi. ^w
13 Nangma mite hukhia ding, ^x
nangma sathau nilhpa honkhia dingin na kuankhia hi.
Migilote gama makaipa na tuangawp-a,
a lutang pan a khepek dong na hawkkhia hi. ^y
14 Munbu sungah migentheite a kisukgawp bangin, ^z
kote hong delh dingin
ama galkap hangte hong kuankhiat laitakin ^aa
ama teipi -in a lutang na sunlet hi.
15 Na sakolte tawh tuipi na tuangawp a, ^ab
tuilianpite a kilokgawp hi.
16 Ke’n ka za a, ka lungtang kisai damdamin
ka muk linga,
ka guh ka tang hong zenin, a muatkhia ding banga,
ka khete a ling daldal hi.
Tua hi taleh ko hong simgawp minamte tungah
kisiat ding ni lungduaitakin ka ngak ding hi. ^ac
17 Theikungte a pak kei zongin,
lenggui ah lenggah gah loin,
olive a gah kei zongin,
lote ah an piang loin, ^ad
tuubuk sungah tuu khatbeek a om kei zongin
gankholna khempeuh hawm khin ta leh,
18 TOPA sungah ka lungnuam lai veve dinga,
ka Pasian kei hong Honpa sungah ka lungnuam veve ding hi. ^ae
19 Thupipen TOPA keima thahatna hi; ^af
ka khepekte sazukpi khe bangsaka,
asanna munte ah hong paizosak hi. ^ag
Tumtheih makaipa ading. Ka khausai tumging pan ahi hi.