Heb 2 | ZomZIV | STEP | Tua ahi manin eite i tolhmang loh nadingin i zaksa thute limtakin i thudon semsem kul ding hi.

Hebrews 2

Thudon dinga Vauhilhna

1 Tua ahi manin eite i tolhmang loh nadingin i zaksa thute limtakin i thudon semsem kul ding hi. 2 Ahang in, vansawltakte gen thupuak kip zo a; tua thu zui loin a palsatte in gawtna diktak thuak tektek uh ahileh, 3 tua zahtaka thupi hotkhiatna thudon kei lehang bang i ci suahtak zawh ding hiam? Hih hotkhiatna a masa penin Topa in a genkhiat, ama gen a zate in ei tunga a kipsak ahi hi. 4 Pasian in zong limte, a lamdangte le nalamdang tuamtuamte le ama deih banga a hawm Khasiangtho letsongte tawh tua thu teci a pang hi. ^a

A Sanggamte tawh kibangin Jesu Kibawl

5 Eite gen mailam huna hong om ding leitung pen vansawltakte nuai ah a koih kei hi. 6 Ahi hangin mi khat in teci a pannasa mun khat ah:

“Nang ngaihsut tham dingin mihing bang hi-a,
na thudon dingin mihing tapa bang ahi hiam?
7 Vansawltak sangin a niam zawzek ^{▼▼2.7 Ahikeh amah tawmvei sung; tg. 9 ah zong} in na bawl a;
minthanna le pahtawina khusak in,
8 ama khepek nuai-ah na khempeuh na koih hi,” ^{▼▼2.8 Ph. 8:4-6} ci hi.

Na khempeuh ama nuai ah koih a, Pasian in ama nuai ah a koih loh bangmah a om kei hi. Tua hi napi tu tadihin na khempeuh ama nuai-a omin i mu kei hi. 9 Ahi hangin vansawltakte sangin a niam zawdeuh a kikoih phot Jesu in, Pasian hehpihna hangin mi khempeuh adinga sihna a ciap theih nadingin sihna a thuak manin tu-in minthanna le pahtawina a kikhusak eite in i mu hi.

10 Tapa tampi minthanna ngahsakna ah ama ading le ama tungtawna na khempeuh a omna pa Pasian in, amaute hotkhiatna a piangsak pa thuakna tungtawna, a bukimsak ding mah kilawm hi. 11 Mite a siangthosak pa le a kisiang thosakte innkuan khat hi khawm hi. Tua ahi ciangin amaute sanggamte cih ding, Jesu a maizum kei hi. 12 Amah in, ^d

“Ka sanggamte tungah na min ka pulak ding hi;
mihonte kikhopna ah nang phatna la ka sa ding hi,” ^{▼▼2.12 Ph. 22:22}

13 Tua ciangin,

“Amah ka muang ding hi,” ^{▼▼2.13 Isa. 8:17} ci kik hi.

Amah in,

“Pasian in kei hong piaksa tate tawh, hiah ka om hi,” ^{▼▼2.13 Isa. 8:18} ci leuleu hi.

14 Tate in si le sa nei ahi nungsang amah in zong a sihna tungtawn a, sihna vangliatna a nei dawimangpa, a suksiat theih nading 15 le a nuntak sung teng sih ding launa sila-a omte a suahtak theih nadingin amaute mihing hina hong tang hi. 16 Ahang in, a taktakin ama huh vansawltakte hi loin Abraham suan le khakte hizaw hi. 17 Hih thu hangin Pasian na a sepna sungah mi lainat siam le a muanhuai tulpi a suah nading le mite mawhnate thoihdamna a bawl theih nadingin ^{▼▼2.17 Ahikeh amah in Pasian thangpaihna heikhia a phiatmang theih nading} lam khempeuh ah a sanggamte mah bangin hong suah ding mah ahi hi. 18 Bang hang hiam cih leh zia-etna a thuakte a huh theih nadingin amah zong kizia-etin a thuak hi. ⁱ