Isa 24 | ZomZIV | STEP | En un, TOPA in leitung, gamtul suaksakin a beisak ding hi; leimaitang susia in a sunga tengte thehthang dinga -

Isaiah 24

TOPA in Leitung A Suksiatna

1 En un, TOPA in leitung, gamtul suaksakin a beisak ding hi;
leimaitang susia in
a sunga tengte
thehthang dinga -
2 mi mawkmawkte le siampite,
nasempa le a pu,
naucingnu le a pi,
a leipa le a zuakpa, ^a
a kawmpa le a kawmnapa,
a leitawipa le a leitawinapa,
a kibang ding hi.
3 Leitung kisia kiuhkeuh dinga
a kisusiamang ding hi.

Hih thu TOPA gensa ahi hi.
4 Leitung vulin keucip a,
leitung thanemin vulgawp a,
leitunga kitawisangte a thanem uh hi. ^b
5 Leitung, a mite in ninsak a, ^c
amaute in thukham mang loin ^d
ngeina-kipte zui lo uh a,
tawntung thukhun a palsat uh hi.
6 Tua ahi ciangin hamsiatna in leitung kangtuma
a tunga tengte in amau khialhna a thuak pelmawh ding uh hi.
Tua ahi ciangin leitunga tengte kangtum uh a, ^e
tawmno bek a om lai hi.
7 Zuthakte keucip in lenggui a vul hi; ^f
a gualnuam khempeuh a tau uh hi.
8 Gualnopna khuanggingte dai khipkhep a, ^g
nopsakna gamlumna bei-in ^h
harp tawh lungnuam a lasakna lah a dai dide hi.
9 Amaute in zu dawn kawmin la sa nawn lo uh a, ⁱ
a zucil dawnte uh khazaw a sa uh hi. ^j
10 Khuapi kisiasa a hawmin om a,
inn sima kongvangte a kikalh bikbek hi.
11 Zu duhin lamdungah kiko uh a;
lungnopna khempeuh lungzinna suakin
gualnopna khempeuh leitung panin a kinawhmang hi.
12 Khuapi a siasa in kinusia a, ^k
a kongpite a kikhawhkham zangawp hi.
13 Olive kung a kisat khit ciang le
lenggah lak khita asangh a kinusiat bangin ^l
leitung le minamte tungah
a kihih ding hi.
14 Amaute lungdamin kiko ding uh a, a aw uh a sangsak ding uh hi; ^m
nitumna lam pan TOPA thupina a thangsak ding uh hi.
15 Tua ahi ciangin tuipi tuikulhte a nisuahna lam mite in;
TOPA min thangsakin; ⁿ
TOPA Israel-te Pasian min a tawisang ding uh hi. ^o
16 Leimongte panin:
“Thuman Pa minthang ta hen,” ^p
ci-a la kisa eite in i za hi. ^q
Ahi hangin, “Beimang ta’ng ei! Bei mang ta’ng ei!
Gimna hong tung ei!
Mi khemte in hong lehkhem ei!
Mi khemte in khemna tawh hong lehkhem uh ei!” ka ci hi.
17 Leitung mite aw, ^r
launa gum le thang in note hong ngak hi. ^s
18 Launa aw za-a a tai peuhmah ^t
gum sungah kia ding uh a;
gum sung pan a kahkhia to peuhmah
thangah a awk ding uh hi.
Vante-a tui kongpite kihong a, ^u
leitung bulpi a kilok hi ^v
19 Leitung khangkhamin
a themthemin kikhen dinga,
nakpipi in a kising ding hi.
20 Zukham bangin leitung hoi dinga ^w
huihpi mut bukno bangin suk-awn to-awn ding hi;
a lehdo mite mawhna gikpi in nen tukin - ^x
a tho kik ngei nawn kei ding hi. ^y
21 Tua ni ciangin TOPA in
tunga vante a vangliatna le
nuai-a leitunga kumpite dan a thuaksak ding hi. ^z
22 Thongkiate dumpi sungah a kigawmkhawm bangin
amaute kikhum khawm dinga, ^aa
thong sungah kikalhnelhin ni tampi khit ciangin
dan ^{▼▼24.22 Ahikeh khahkhia} a kithuaksak ding hi. ^ac
23 Thahatpen TOPA in Zion Vum le
Jerusalem panin a upate mai-ah ^ad
thupi takin uk ding ahi manin khapi mial dinga, ^ae
ni a maizum ding hi. ^af