Isa 26 | ZomZIV | STEP | Tua ni ciangin Judah gamah hi la a kisa ding hi: Khuapi muanhuai khat i nei hi; Pasian in kulhte le a kanhte dingin hotkhiatna a bawl hi.

Isaiah 26

Pahtawina La

1 Tua ni ciangin Judah gamah hi la a kisa ding hi:

Khuapi muanhuai khat i nei hi; ^a
Pasian in kulhte le a kanhte dingin
hotkhiatna a bawl hi.
2 A thumaan minamte -
upna a nei den minam lut nadingin
kongte hong un. ^b
3 Lungsim kippa in
nang hong muang ahi manin
lung nuamtakin kem ta in.
4 A tawntungin TOPA muangun,
ahang in TOPA, tua TOPA tawntung Suangpi ahi hi. ^c
5 Amah in a sangna-a tengte niamkhiat a,
khuapi sangpi a khiasuk hi;
leidongin tamsak a,
dengkhamin leivui a suah hi.
6 A kinengniamte’ khete,
mizawngte khekhapte ahi -
khete in a tuancil ding hi.
7 A thumaante lampi tamkim a;
Thutang Pa aw, a thumaante lampi na nelsak hi. ^d
8 Hihi, TOPA aw, na thukham ^{▼▼26.8 Ahikeh thukhenna} zui-a kalsuan dingin ^f
nang kong ngak uh hi: ^g
kote lungsim deihna in
a tawntunga nangma min phawkna ahi hi. ^h
9 Zan ciangin nang kong ngaihsunsun a,
zingsang ciangin ka kha in nang hong ngai hi. ⁱ
Leitung ah na thukhenna hong tun ciangin
leitung mite in thumaan a thei pan uh hi. ^j
10 A tatsiate tungah hehpihna a kilah hangin,
thumaan a thei thei kei uh hi;
thutanna gamah tatsia dingin a kuan laitakun
TOPA thupina a thusim tuan kei uh hi. ^k
11 TOPA aw, na khut sangpi in na viktoh hangin
amaute in a mu kei uh hi.
Na mite adingin na deihluatna musak inla amaute maizumsak in;
na galte a kangtum dingin meikuangsa koih khol in.
12 TOPA aw, ko adingin lemna na kipsak zo hi; ^l
ka sepzawhte khempeuh uh ko adingin nangma sepsa ahi hi. ^m
13 TOPA kote Pasian aw, nang lo pasian dangte in hong uk uh hangin ⁿ
kote in nangma min bek ka pahtawi uh hi. ^o
14 Tu-in amaute si uh a, a nungta nawn kei uh hi; ^p
a paisa khate a tho nawn kei uh hi.
Amaute dan na thuaksak a, na siasak mang hi;
amaute kiciamtehna khempeuh na phiatmang hi.
15 Minam khat nong liansak hi, TOPA aw;
ko minam nong liansak hi. ^q
Nangmah bek in minthanna na ngah hi;
gamgite khempeuh nangma sotsa ahi hi.
16 TOPA aw, amaute lungdongin nangmah hong zuan uh hi; ^r
amaute na sek ciangin
thu ngenin a phun thei mialmial bek uh hi. ^{▼▼26.16 Hebrew ah hih laigual kician lo hi.}
17 Numei gai lai nausuak kuan
na sa-in kizia a, a kah bangin
kote zong nangma mai-ah kong kiko uh hi, TOPA aw.
18 Ko zong nau ka paii uh a, na sa-in ka kizia uh hi;
ahi hangin huih bek ka suakkhia uh hi.
Kote in leitungah hotkhiatna ka puak kei uh hi;
leitunga mite tungah bangmah ka semkhia kei uh hi.
19 Ahi hangin na misi te uh nungta dinga, ^t
a pumpite uh a tho ding hi.
No leivui laka tengte aw,
khanglo unla nuamin kiko un.
Na daitui uh zingsang daitui tawh kibang hi;
leitung in a misite a hingkhia ding hi. ^u
20 Ka mite aw, pai un,
na inndei sunguah lut unla kong kikhaknelh un; ^v
ama thangpaihna a bei matengin ^w
tawlkhat sung bu phot un. ^x
21 En un, leitung mite amau mawhna dan thuaksak dingin
a tenna pan TOPA hong paikhia hi. ^y
Leitung in ama tunga sisan luannate sin lo dinga;
ama thahsate a selcip nawn kei ding hi.