Isa 30 | ZomZIV | STEP | “Thumang lo tate in gimna ngah ta hen,” TOPA in cikhia a, “amaute kei ngimna lo ngimna a neite, kei’ Kha tawh kop lo a kipawlna a phuante, mawhna tungah mawhna a suangsawnte;

Isaiah 30

Thumanglo Minam’ Gimna

1 “Thumang lo tate in gimna ngah ta hen,” ^a
TOPA in cikhia a,
“amaute kei ngimna lo ngimna a neite,
kei’ Kha tawh kop lo a kipawlna a phuante, ^b
mawhna tungah mawhna a suangsawnte;
2 kei hong dong loin
Egypt a paisukte; ^c
Pharaoh huhna beel ding le
Egypt liahna a zongte ahi uh hi.
3 Ahi hangin Pharaoh hutna note maizumna hi dinga,
Egypt liim in note zahlakna hi ding hi. ^d
4 Amaute in Zoan ah ulian nei uh henla ^e
amau thupuakte Hanes ah tung ta leh
5 amau adingin huhna ahi a,
hamphatna ahi zongin a pia thei mihing in kimanna nei loin ^f
maizumna le zahlakna hi lel ahi manin
tuate peuhmah kimaizumsak ding hi. ^g

6 Negev-a ganhingte tawh kisai thusuak: ^h

Humpinelkaite le humpinelkai nute,
mualtante le gul lengtheite omna
haksatna le lungdonna mun kantanin ⁱ
amaute thupuakte in laa nungzangah a hauhnate uh pua in,
a goute uh kala-oh thuvum ah pua uh a, ^j
bangmah metna a pia lo minam tung, amau huhna kimanna a nei lo ^k
7 Egypt-te tungah a puak uh hi.
Tua ahi ciangin amah Sep Awl
Rahab ka ci hi.
8 Tu-in pai inla,suangpek tungah gelhsak-in, ^l
hong tung lai ding hunah
teci a hi tawntung thei dingin ^m
laizial tungah khuaksak in. ⁿ
9 Hihte in a lehdo mite, a zuauphuak tate,
TOPA lamlahna a ngai nuam lo tate ahi uh hi. ^o
10 Amaute in thumute tungah,
“Mang mu nawn kei un!” ci uh a,
kamsangte tungah,
“Ko ading thumaan mangmuhna mu nawn kei un!
Thu-nuam hong gen unla, ^p
hong khembawl un. ^q
11 Hih lampi nusia in ^r
hih lampi pan pial unla,
Israel-te Siangtho Pa tawh
hong kimaituahsak nawn kei un,” a ci uh hi.

12 Tua ahi ciangin Israel-te Siangtho Pa in, ^s

“Note in hih thu nialin nuainetna tungah
na kinga uh a, ^t
zuauphuahna suang na hi manun no adingin ^u
13 hih mawhna a khangkhamsa,
lawtkhia-in a cim dektak kulh sangpi ^v
thakhat thu-a cimzuah tawh a kibang ding hi. ^w
14 Leibeel bangin kitamkham dinga ^x
man theih om loin kitamnenin
a themte lakah meikhuk-a mei-am lak nading,
tuikhuka tui suah nadinga man theih ding
a kimu kei ding hi,” a ci hi.

15 Hih in Thupipen TOPA, Israel’ Siangtho Pa gen ahi hi:

“Kisikna le tawlngakna in note hotkhiatna hi a, ^y
daihna le muanna note hatna ahi hi; ^z
ahi hangin note na tuaci kei uh hi. ^aa
16 Note in, ‘Hi lo hi, sakolin ka tai ding uh hi,’ na ci uh hi. ^ab
Tua ahi ciangin manlangin na tai takpi ding uh hi!
Note in, ‘Sakol hat tungah ka tuang ding uh hi,’ na ci uh hi.
Tua ahi ciangin note hong delhpa zong a hat semsem ding hi!
17 Note, mualdawna kiphut dialkhai khuam bang le
mualtunga dialkhai banga
hong kinusiat matengin
mi khat tawnna hangin
tul khat na taikek ding uha
mi nga tawnna hangin
na vekun na taikek ding uh hi,” a ci hi. ^ac
18 Tua hi napi TOPA in note hong hehpih nuam lailai in; ^ad
ama hong khuatuahna hong lak lailai hi.
Ahang in, TOPA in a thutang Pasian ahi hi.
Amah a ngak zote khempeuh thupha ngah ahi hi. ^ae

19 No Zion mite, Jerusalem a tengte aw, na kap nawn kei ding uh hi. Huhna ngenin na kiko uh ciangin hong hehpih mahmah hi! Amah in a zak phetin hong dawng ding hi. 20 Topa in note lungkhamna anlum le sinkhamna tui hong piak ciangin na siate uh bu nawn loin na mit mahmah uh tawh amaute na mu ding uh hi. 21 Taklam ah kihei-in vei lamah na kihei uh zongin na nung panin na bil un, “Hih lampi hi, tawn un,” a cih na za ding uh hi. 22 Tua ciangin nguna kiluan na milimte uh le khama kizut na milim sunte uh na ninsak ding uh a, numeite nin siakna puan bangin tuate lawnmang in, “Mangthang ou!” na ci ding uh hi. ^af

23 Lei sunga na vawhsa khaici adingin guah zong hong zusak dinga, gam sunga an piangte gahpha in a tam mahmah ding hi. Tua ni ciangin na ganhonte uh lonona zapi ah a gamta ding uh hi. 24 Lokho bawngtalte le laate in kawbia le kangkui-a kitok ngi-ingei gan-an a ne ding uh hi. 25 Kingawng-atna a nasiat mahmah ni-in tausangte a puk ciangin mual sangte le mualsang vumte tung khempeuh ah luituite a luang ding hi. 26 TOPA in a mite liamma tunsakin a gimpiakna-mate a damsak ciangin ni bangin khapi tang dinga, ni sagih sunga a tan zahin ni a zah sagih in a tangzaw ding hi. ^ag

27 En in, TOPA Min, a hehna meikuangsa in hong pai a, ^ah
meikhu sahpi meii-in hong kaii hi.
Thangpaihna tawh a muk kidim a, ^ai
a leii lah a haltum mei ahi hi. ^aj
28 Ama husan ngawng ciang a pha
luitui khang tawh kibang hi. ^ak
Amah in haihna-in minamte siatna haih a,
amaute a makaihna
a khaguh uah a bulh hi.
29 Tuateh note in pawi siangtho na bawl ni zan bangun
la na sa ding uh hi; ^al
Israel Suangpi, ^am
TOPA mual tungah
tamngai tumsa-in na pai uh bangin
na lungnuam ding uh hi. ^an
30 TOPA in a thupi ama aw mite zasak dinga,
a hehsa a khut,
a haltum mei,
meiipi kai, huihpi le gialpi-in a musak ding hi. ^ao
31 TOPA’ aw in Assyria susia gawp dinga; ^ap
a sik ciangkhut in amaute a sattuk ding hi. ^aq
32 TOPA in danpiakna ciangkhutin
amaute a sat simin,
gal sungah amaute a khutin a do bangin
khuangte le harp-te tumging tawh a kituak ding hi. ^ar
33 Topheth a kibawlphat zawh sawt ta hi;
tua in kumpipa adingin a baihsa a om ahi hi.
Tua meikhukpi a thuk le a zai-a kibawl hi a,
mei le sing a kicingtakin kikoihkhol hi;
luiluang tawh a kibang kaat kuanglai
TOPA husan
a kitawhkuang ding hi. ^as