Isa 43 | ZomZIV | STEP | Ahi hangin, tu-in hih in TOPA gen ahi hi - Jacob aw, note hong piangsak amah hi a, Israel aw, note hong bawl amah hi: “Note hong tankhin ka hi manin lau kei un; na minun kong sam khin a; note kei aa na hi uh hi.

Isaiah 43

Israel-te’ Honpa Bek

1 Ahi hangin, tu-in hih in TOPA gen ahi hi -
Jacob aw, note hong piangsak amah hi a,
Israel aw, note hong bawl amah hi: ^a
“Note hong tankhin ka hi manin lau kei un; ^b
na minun kong sam khin a; note kei aa na hi uh hi.
2 Tui na ngahtan uh ciangin ^c
no tawh ka om dinga; ^d
gunte na ngahtan uh ciangin
hong tai kei ding hi;
meikuang lak kantanin na pai uh ciangin ^e
hong hul kei ding hi;
meikuang in nang hong kang kei ding hi. ^f
3 Ahang in, keimah in TOPA note Pasian
Israel Siangtho Pa note Honpa ka hi hi; ^g
nangmah tatna-in Egypt ka pia a,
nang tangin Cush ^{▼▼43.3 Tua in Nile khunglam kual} le Seba ka pia hi. ⁱ
4 Ka muhna ah manpha in kong pahtawi nungsang le
nang kong itna hangin
nang khekna-in mite ka pia dinga,
na nuntakna khekna-in mihingte ka pia ding hi.
5 Hong ompih ka hi manin lau kei in; ^j
nisuahna panin na tate kong puak dinga, ^k
nitumna panin nang kong kaikhawm ding hi. ^l
6 Leilu-lam kiangah, ‘Amaute piakhia un,’ ci in,
leitaw-lam kiangah, ‘Amaute lehkaih kei un,’ ka ci ding hi. ^m
Gamlapi panin ka tapate,
leimongte panin ka tanute -
7 ka minthan nadinga ka piansakte,
sutuah a ka bawlte,
ka mina kilote peuhmah hong puak un,’ ka ci ding hi,” a ci hi. ⁿ
8 Mit nei napi mittawte,
bil nei napi bengngongte pikhia un. ^o
9 Minam khempeuh kikaikhawm in,
mite kikhawm hi;
amaute kua pen in hih thu genkhol a,
a piangsa nate hong tangko ahi hiam? ^p
Midangte in za uh a, “Hih thu man hi,” a cih theih nadingun,
amaute a man a hilam uh a lak dingin teci kipuaksak un.
10 “Note ka teci na hi uh hi,” TOPA in cikhia a,
“kei in amah ka hilam thei-in
um a nong theihtel nadingun ^q
kong teelsa ka nasempa na hi hi. ^r
Kei om ma-in Pasian kibawl lo a,
kei om khitin zong khat beek a om tuan kei hi. ^s
11 Kei, keimah TOPA longal
honpa dang a om kei hi. ^t
12 Keimah kong kilaaka, kong honkhia-a, kong tangko khin hi,
note lakah kei bek ka om a, gamdang pasiante a om kei hi. ^u
Keimah Pasian ka hilam note ka teci na hi uh hi,” TOPA in a cikhia hi. ^v
13 Hi hi, tangtawnga kipan kei amah ka hi hi. ^w
Ka khut panin kuamah in a hukhia thei kei hi.
Na ka sep ciangin kua in hong phelkik thei ahi hiam?” a ci hi. ^x

Pasian Lainatna le Israel Muanhuailohna

14 TOPA gen hih ahi hi -
note hong Tanpa, Israel-te Siangtho Pa in: ^y
“Note tangin Babylon ah ka paisak dinga
Babylon mite ^{▼▼43.14 Ahikeh Chaldea-te} khempeuh amaute kisaktheihpih
a tembawte un ka taimangsak ding hi.
15 Keimah TOPA, note Siangtho Pa,
Israel a Piangsakpa, note kumpipa ka hi hi,” a ci hi.
16 TOPA cih hih ahi hi -
amah tuipi kantana lampi sialpa,
tuihat kantana lampi bawlpa, ^aa
17 sakolte le sakollengte,
galkapte le kihutnate khempeuh nawhkhia a, ^ab
a tho kik nawn lo dingin tua lai- ah a lumsak,
meivak khau sukmit banga sumitpa: ^ac
18 “A tungsa nate mangngilh un,
a beisate tungah na lungsim uh tengsak kei un.
19 En un, na a thak ka bawlbawl ta hi;
tu-in a mengkhia ta hi phawk lo na hi uh hiam?
Sehnel-gam ah lampi ka sial dinga ^ad
gamtul ah luite ka luangsak ding hi. ^ae
20 Gamsate - ngiate le kala-oh vasate in
kei hong pahtawi ding uh hi,
bang hang hiam cih leh sehnel-gam ah
tui ka pia a, ^af
gamtul ah luite luangsakin,
21 tua pen kei mahmah in ka bawlsa, ka teelsa ka mite in ^ag
kei phatna a tangko theih nadingun amaute dawn dinga ka piak ahi hi. ^ah
22 Tua hi napi Jacob aw, note in kei nong sam kei uh a,
Israel aw, kei adingin no le no na kigimsak kei uh hi. ^ai
23 Meihal biakna dingin tuu nong puak kei uh a,
na kithoihnate uh tawh nong pahtawi kei uh hi. ^aj
An-a biakna-in vangik kong suan kei a,
gimnamtui hong ngenin kong kicimtaksak kei hi.
24 Kei adingin kawltu namtui khatpeuh nong leisak kei a,
na biakna sathaute in nong taisak nai kei hi.
Ahi hangin na mawhnate-un vangik nong suan uh a,
na tatkhialhnate-un nong gimsak uh hi. ^ak
25 Kei mahmah ka kikhualna-in
na thupalsatnate uh hong paihsak keimah, ^al
kei mahmah in na mawhnate uh ka ciamteh nawn kei hi. ^am
26 A beisa thu kei adingin en kik dih un,
thu kikumkhawm dih ni, ^an
mawhpeng na hihna thu sung dih in. ^ao
27 Na pa masa pen uh mawh a;
na thu sungte un kei hong lehdo uh hi. ^ap
28 Tua ahi ciangin na biakinnpi ua thuneipite ka mindaisak dinga
Jacob tungah siatna ^{▼▼43.28 Hebrew in mite le nate TOPA} tungsakin,
Israel ka zahlak sak ding hi. ^ar