Jer 11 | ZomZIV | STEP | Hih in Jeremiah tunga tung TOPA thu ahi hi:

Jeremiah 11

Thukhun Kipalsat

1 Hih in Jeremiah tunga tung TOPA thu ahi hi: 2 Hih thukhunna-a thute ngai inla Judah mite tung le Jerusalem-a tengte tungah gen in. 3 Amaute tungah hih in TOPA Israel-te Pasian gen hi a: ‘Egypt pan - sik-haltuina pummei panin na pute uh ka paikhiatpi lai-in amaute tungah ka thupiaksa ahi - 4 hih thukhunna-a thute a mang lo peuhmah in hamsiatna thuak ta hen,’ ci in. ‘Ka thu hong mang unla kong thupiak khempeuh sem un; tua hileh note ka mi na suak ding uh a, keimah note Pasian ka hi ding hi. 5 Tua ciangin na pute uh tunga, tu-a na neihsa uh - bawngnawi le khuaizu luanna gam piak dingin tomlo-a ka ciamsa ka tangtungsak ding hi,” hong ci hi. ^a

Keimah in, “TOPA, Amen,” ci-in ka dawng hi.

6 TOPA in kei kiangah, “Hih thu khempeuh Judah khuapite le Jerusalem kongzingte ah tangko inla: ‘Thukhun thute ngai unla zui un. 7 Na pute uh Egypt pan ka paikhiatpih a kipan tuni dong, “Ka thu hong mang un,” ci-a ka vauhilh kikkik ahi hi. 8 Ahi hangin ka thu ngai loin zong a thusim kei uh hi; tua sangsikin amau lungtang khauhna a zuizaw uh hi. Tua ciangin amaute zuih dingin thu ka piak hangin a zuih nop loh uh thukhun hamsia khempeuh amau tungah ka tungsak hi,’ ci hi,” a ci hi.

9 Tua ciangin TOPA in kei tungah, “Judah mite le Jerusalem a tengte lakah sawmsimna khat a om hi. 10 Amaute in ka thu mang nuam loin a pute uh mawhna lamah kihei khin uh hi. Amaute in pasian dangte na sem dingin a zui uh hi. Israel innkuante le Judah innkuante in a nihun a pute uh tawh ka bawl thukhun a palsat khin uh hi. 11 Tua ahi ciangin TOPA thugen hih ahi hi: ‘Amaute tungah gimna ka tungsak dinga, amaute a suakta kei ding uh hi. Amaute in kei hong ko in a kiko uh zongin a thugen uh ka ngai kei ding hi. 12 Judah khuapite le Jerusalem a mite, gimnamtui a halna uh a pasiante uh kiangah pai-in va ko ding uh a, ahi hangin gimna in a vat ciangin tuate in a hu thei kei ding hi. 13 Judah aw, nang in khuapi na neih zahzah pasian na nei a; Jerusalem kongzing pha zahzah a zumhuai Baal pasian biakna hal nadingin biakna-tau na dawh hi. ^b

14 “Hih mite adingin ngetna le thumsakna khatpeuhpeuh ahi zongin nei kei in, bang hang hiam cih leh amaute lungdongin hong sap uh ciangin ka ngai kei ding hi. ^c

15 “Ka lawmnu in tampi tawh gitlohna a sep khit nungin
ka biakinn ah bang hong hih nawn ding ahi hiam?
Sa apna in na dantuah ding uh kipelhsak thei tuan ding hiam?
Gitlohna na bawl uh ciangin
na lungnuam ^{▼▼11.15 Ahikeh na dan thuakte uh man dingin sa ap thei na hi uh hiam? Tua ciangin na lungnuam ding uh hi.} uh hi.” ^e
16 TOPA in nang, a hing kiuhkeuh a gah tawh a kilawm mahmah
olive kung hong ci hi. ^f
Ahi hangin huihpi hat mahmah khat hawkin
mei-in hong hal dinga, ^g
na hiangte a kitan ding hi. ^h

17 Nang hong suan Thahatpen TOPA in nang tungah gimna a tunsak ding a khentat khin hi, bang hang hiam cih leh Israel innkuante le Judah innkuante in gitlohna bawlin Baal tunga gimnamtui halna tawh kei hong hehsak uh hi. ⁱ

Jeremiah Kisawmsim

18 Tua hun lai-in TOPA in amau septe kei hong lak ahi manin, amau hong sawmsimnate hong laak-a ka thei hi. 19 A kigo dinga kipaipih hiathiat tuuno bang ka hi-a; amaute in kei theih lohin hong sawmsimin, ^j

“Singkung le a gah susia khawm ni,
ama mihing tenna leitang pan hemkhia-in ^k
a min kiphawksak nawn kei ni” ci uh hi.
20 Ahi hangin Thahatpen TOPA aw, nang in thumaanin thu na khena,
lungsim le ngaihsutna na entel hi;
nang tungah ka thu hong suan khin ka hi manin
amaute tunga na phulakna kei hong musak in. ^l

21 “Tua ahi ciangin hong that nuama, ‘TOPA minin thu hilh kei in, na hilh leh ko khutlumin na si ding hi,’ hong ci Anathoth mite tawh kisai-in TOPA thugen hih ahi hi - 22 tua ahi ciangin Thahatpen TOPA gen hih ahi hi: ‘Amaute dan ka thuaksak ding hi. A tangvalte uh namsau in si ding uh a, a tanu a tapate uh kialpi-in a si ding uh hi. 23 Amaute a baanglai nangawn a om kei ding uh hi, bang hang hiam cihleh amaute dan ka piak kumin Anathoth mite tungah tuahsiatna ka tungsak ding hi,’ ci hi,” a ci hi.