Jer 28 | ZomZIV | STEP | Judah kumpipa Zedekiah kumpi a suah tunglam a kumlina kum, a kha ngana kha-in Gibeon pana Azzur tapa kamsangpa Hananiah in TOPA innpi sunga, siampite le mi khempeuh mai-ah:

Jeremiah 28

Kamsang Zuaupa Hananiah

1 Judah kumpipa Zedekiah kumpi a suah tunglam a kumlina kum, a kha ngana kha-in Gibeon pana Azzur tapa kamsangpa Hananiah in TOPA innpi sunga, siampite le mi khempeuh mai-ah: 2 “Hih in Israel Pasian Thahatpen TOPA gen ahi hi: Keimah in Babylon kumpipa hakkol ka sutan ding hi. 3 Babylon kumpipa Nebuchadnezzar in hih mun pan lakhia-a Babylon ah a puak TOPA inn sunga vanzat khempeuh kum nih sungin hih munah ka puak kik ding hi. 4 Judah kumpipa Jehoiakim tapa Jehoiachin ^{▼▼28.4 Hebrew ah Jeconiah; Jehoichin tawh kilamdang lo} le Judah panin Babylon ah sal-a kikaite khempeuh zong hih munah ka puak kik ding hi.’ TOPA in cikhia hi,’ ahang in, Babylon kumpipa hakkol ka sutan ding hi,’ ci-in kei tungah hong gen hi.” a ci hi. ^b

5 Tua ciangin TOPA inn sunga ding mipi khempeuh le siampite mai-ah kamsangpa Jeremiah in kamsangpa Hananiah a dawng hi. 6 Amah in, “Amen! TOPA in tuacih ta hen! TOPA in nang gen kholh bangin tangtungsak henla, TOPA inn sunga vanzatte le sal-a kikai khempeuh Babylon panin hih munah hong puak kik tapeuh hen. 7 Tua hi taleh, nang le mite khempeuh zaka kong gen ding na ngai un: 8 Hun masa lai nang le kei hun ma lai inah gam tampi le kumpi-gam lianpite tungah gal, pulpi le siatna tung ding hi, ci-in a gen khol uh hi. 9 Ahi hangin kilemna hong tung ding hi, ci-a a genkhol kamsangpa, TOPA kamsang hi taktak ahi hiam cih ama gen banga a tun ciang bekin kithei pan hi,” a ci hi.

10 Tua ciangin kamsang Hananiah in kamsang Jeremiah ngawng panin hakkol lakhia-in kuaitan a, 11 mi khempeuh mai-ah, “TOPA gen hih ahi hi: ‘Hih tawh kibangin minam khempeuh ngawng-a Babylon kumpipa Nebuchadnezzar hakkol kum nih sungin kikuaitan ding hi,’ ci hi,” a ci hi. Tua khitteh kamsang Jeremiah in a paikhiatsan hi.

12 Kamsang Hananiah in kamsang Jeremiah ngawng pan hakkol lakhia-in a kuaihtan zawh a sawt loin Jeremiah tungah TOPA thu tung a: 13 Pai inla Hananiah tungah, ‘TOPA gen hih ahi hi: Sing hakkol na kuaihtan hangin tua mun sik hakkol in ka laih ding hi. 14 Hih in Israel Pasian Thahatpen TOPA gen ahi hi: Babylon kumpipa Nebuchadnezzar na sem ding in hih minamte ngawng ah sik hakkol khat ka vawh dinga, amaute in a na a sem ding uh hi. Ganhing gilote nangawn ka uk zosak ding hi, ci hi,’ va ci in,” a ci hi. ^c

15 Tua ciangin kamsangpa Jeremiah in kamsangpa Hananiah tungah, “Hananiah aw, na ngai dih in! TOPA in nang hong sawl lo napi zuauthu a muang dingin hih minam na zol hi. 16 Tua ahi ciangin TOPA gen hih ahi hi: ‘Lei maitang panin nang kong hemkhia ding hi. TOPA langdona thu hilh na hi manin tu kum mahmah in na si ding hi,’ ci hi,” a ci hi. ^d

17 Tua kum mah a kha sagihna kha-in kamsangpa Hananiah a si hi. ^e