Jer 32 | ZomZIV | STEP | Nebuchadnezzar kumpi a suah zawh a kum sawm le giatna kum Judah gamah Zedekiah kumpi a suah zawh a kum sawmna kumin Jeremiah tungah TOPA thu a tung hi.

Jeremiah 32

Jeremiah in Lo Khat Lei

1 Nebuchadnezzar kumpi a suah zawh a kum sawm le giatna kum Judah gamah Zedekiah kumpi a suah zawh a kum sawmna kumin Jeremiah tungah TOPA thu a tung hi. 2 Babylon kumpipa galkapte in Jerusalem a umcih laitak uh, kamsangpa Jeremiah zong Judah kumpi inn huang sunga a kicin cip laitak ahi hi.

3 Judah kumpipa Zedekiah in amah tua lai-ah thong kiasak a, “Bang hangin tu-a na hih bangin thu genkhol na hi hiam? Nang in, ‘Hih in TOPA gen ahi hi: Keimah in hih khuapi Babylon kumpipa khutah ka pia dinga, amah in a la ding hi. 4 Babylon mite ^{▼▼32.4 Ahikeh Chaldea-te tg.5, 24, 25, 28, 29 le 43 ah zong.} khut panin Judah kumpipa Zedekiah a suakta kei dinga ahi hangin Babylon kumpipa khutah ki-apin amah tawh kimaituahin kiho ding uh a, ama mit mahmah in mu ding hi. 5 Amah in Babylon ah Zedekiah tonpih dinga, ama tungah na ka sep matengin a om tadih ding hi,’ TOPA in ci hi. Babylon mite na do hangin na zo kei ding hi,’ ci hi,” na ci hi. ^b

6 Jeremiah in, “TOPA thu kei tungah hong tunga: 7 Na pano Shallum tapa Hanamel kiangah hong pai-in, ‘Anathoth a ka lo hong lei in, bang hang hiam cih leh a lei thei ding lakah ka kinaipih pen nangmah na hi hi,’ hong ci ding hi. ^c

8 Tua ciangin, TOPA gensa bang tektekin huang sunga hong kicinna ka kiangah ka sanggampa Hanamel hong pai a, ‘Benjamin gam Anathoth a ka lo hong lei in. A lei ding le a tan thei ding nang na hih nungsangin nang mahmah in lei lel in,’ hong ci hi.

“Hih in TOPA kammal hi, cih ka thei a, 9 tua ciangin ka sanggampa Hanamel tung panin Anathoth a lo ka lei hi; ama adingin ngun shekel ^{▼▼32.9 Tua in ounce 7 bang (gram 200 bang)} sawm le sagih ka tehkhia hi. 10 Thukimna lai tungah min thuhin seal ka tum uh a, tecite theisakin a tehna ah ngun ka tehkhia hi. 11 Ka kileina uh - ka kithukimna uh le a thu teng a kigelhna seal kitum laidal pen le seal kitup lohna laidal ka lakhawm a - 12 a taktak pen tunga min a thu ka tecite uh le huang sunga hong kicinna muna tu Jew-te khempeuh le ka sanggampa Hanamel omin Mahseiah tapa Neriah tapa Baruch tungah ka pia hi. ^e

13 “Amaute omin Baruch tungah ka hici ciangen hi: 14 ‘Hih in Thahatpen TOPA Israel Pasian gen ahi hi: Hih lo kileina lai thupi - seal kitum le seal kitum lo a nihin lakhawm inla, sawt veipi a kikep theih nadingin leibeel khatin koih in. 15 Ahang in, Thahatpen TOPA Israel Pasian thugen hih ahi hi: Hih gam sungah innte lote le lenggui lote a kilei kik ding hi,’ ci hi. ^f

16 “Nariah tapa Baruch tungah kileina lai ka piak khit ciangin TOPA tungah thu ka ngen a:

17 “O, Thupipen TOPA, na khut zanin na vanglianpi tawh leitung le vantung na bawl khin hi. Nang adingin bangmah a haksa lua kei hi. 18 Tul tampite tungah na itna na lah hangin pate mawhnate amau nunga a tate uh tungah dan na thuaksak hi. A lian mahmah vanglian Pasian aw, na min Thahatpen TOPA hi a, 19 na ngimna lian mahmah in, na sepnate thahat hi. Mihingte lampi khempeuh na mu khin a, amau gamtatna le amau sepnate tawh kituakin pahtakman na pia hi. 20 Nangmah in Egypt ah a lamdang limte le nalamdangte na laka, Israel-te le mihing khempeuh lakah a kibangin tuni dong na lak lai-a, na min a thang lailai hi. 21 Nangmah in na mi Israel-te Egypt panin limte, alamdangte tawh ahi a, a thahat na khutte zankhia-in a lauhuai mahmah in na lakhia hi. 22 Nangmah in a pute uh tungah piak dinga na ciamsa bawngnawi le khuaizu luanna gam amaute na pia hi. 23 Amaute hong pai-in tangpah uh a, ahi hangin na thu hong mang loin na thukham zui lo uh a; amau hih dinga na thupiakte a sem kei uh hi. Tua ahi ciangin nang in hih gimnate amau tungah na tungsak hi. ^g

24 “En in, khuapi lak nadingin leivumte in ki-umcih ta hi. Namsau, kialpi le pulpi hangin amaute a sim Babylon mite tungah khuapi kipia ding hi ta hi. Tu-a na muh bangin na gensate tung ta hi. 25 Tuateh Babylon mite tungah khuapi a kipia ding hi ta leh Thupipen TOPA aw, kei kiangah, ‘Na kilei lam uh a thei teci nei inla tua lo nguntang in lei in,’ nong ci hi,” ka ci hi.

26 Tua ciangin Jeremiah tungah TOPA thu tunga: 27 ‘Keimah TOPA mihing khempeuh Pasian ka hi hi. Kei adingin a haksa lua na khatpeuh om ahi hiam? 28 Tua ahi ciangin TOPA gen hih ahi hi: Keimah in Babylon mite tung le Babylon kumpipa Nebuchadnezzar tungah hih khuapi ka pia dinga, amah in a la ding hi. 29 Hih Babylon khuapi a sim Babylon mite a sungah lutin mei-in hal ding uh a, a mite in kei hong hehsakna uh - innkhum tunga Baal ading gimnamtui a halnate uh le pasian dangte tungah dawntheih-a biakna a sunna uh innte tawh a haltum khawm ding uh hi.

30 Israel le Judah mite in a neutungua kipan kei muhna-ah gamtatsia bekbek a sem uh hi; hi takpi hi, Israel mite in a khut uh tawh a bawlte un kei hong hehsak den uh hi, TOPA in ci hi. 31 Hih khuapi a kisat tunga kipan tuni dong hong hehsak hong thangpaisak uh ahi manin ka muhna pan ka hepkhiat kul ding hi. 32 Israel mite le Judah mite - amaute, a kumpite uh le a uliante uh, a siampite uh le a kamsangte uh Judah mite le Jerusalem mite in a gitloh gamtatnasate un kei hong hehsak uh hi. 33 Amaute in hong nungngatsan uh a, hong maingat kei uh hi; amaute ka hilhhilh hangin ka thu ngai lo uh a, a kisektat nuam kei uh hi. 34 Amaute in ka Min kilawhna inn sungah a kihhuai milimte koihin ninsak uh hi. 35 Amaute in Ben Hinnom Kuam ah a tanu a tapate ^{▼▼32.35 Ahikeh a tanu a tapate uh mei-ah khul nading} uh tawh Molech a biak nadingun Baal ading munsang a bawl uh hangin, hih a kihhuai sepna tawh Judah a mawh nadingin ka sawl genloh ka lungsim sung nangawn ah a lut ngei beek kei hi. ⁱ

36 Note in hih khuapi tawh kisai-in, ‘Babylon kumpipa tungah namsau, kialpi le pulpi in kipia ding hi,’ na ci uh hi; ahi hangin TOPA Israel Pasian gen hih ahi hi: 37 Heh lua thangpai lua-a ka nawhkhiatna gam khempeuh panin amaute ka kaikhawm dinga; hih munah maute puak kikin lungnuamtakin ka tengsak ding hi. 38 Amaute keima mi suakin keimah amaute Pasian ka hi ding hi. 39 Amaute hoih nading, amau nunga a tate uh hoih nading le kei hong kihtak tawntung nadingun lungsim khat le gamtatna khat ka guan ding hi. 40 Amaute tawh tawntung thukhun bawlin amaute hoih nading ka bawl den dinga, kei hong taihsat ngei nawn loh nadingun kei kihtakna ka muam ding hi. 41 Amaute tunga na hoih bawl, nuam ka sa dinga ka lungsim khempeuh le ka hinna khempeuh tawh amaute hih gamah ka phut taktak ding hi.

42 “Hih in TOPA gen ahi hi: Hih mite tungah tuahsiatna lianpi khempeuh ka tunsak bangin amaute tunga ka ciamsa vangphatna khempeuh ka pia ding hi. 43 Note in, ‘Hih gamah mihing ganhing teng loin a kinusiasa gam tulsapi hi a, Babylon mite tunga kipiasa hi,’ na cih uh hangin hih gamah lote a kilei kik ding hi. 44 Benjamin gam, Jerusalem kimkota khuaneute, Judah khuapite, mualtung gam khuapite, nitumna lam zang le kham kicina-te le Negev a te in ngunin lo lei ding uh a, min thu-in, seal tumin teci nei-in kileina a bawl ding uh hi; bang hang hiam cih leh amaute mailam a ngei ka bangsak kik ding hi, ^{▼▼32.44 Ahikeh a saltanna panun ka puak kik ding hi.}TOPA in cikhia hi,” a ci hi. ^k