Jer 33 | ZomZIV | STEP | A kicinna huang sungah Jeremiah a kikhumcip lai mahin ama tungah TOPA thu a nihveina tunga:

Jeremiah 33

Angei Batsak nading Kamciam

1 A kicinna huang sungah Jeremiah a kikhumcip lai mahin ama tungah TOPA thu a nihveina tunga: 2 “Hih in a min TOPA, leitung bawlin lema a kipsak TOPA - amin TOPA thugen ahi hi: 3 ‘Kei hong sam un, kong dawng dinga na theih loh uh a kimukhia thei lo na lianpite kong gen ding hi,’ ci hi. 4 Ahang in, Babylon mite ^{▼▼33.4 Ahikeh Chaldea-te} tawh kidona-a hong ki-umcihna munsang bawlna le namsau a kisia khuapi sunga innte le Judah kumpi innte tawh kisai-in 5 TOPA Israel Pasian gen hih ahi hi: ‘Tuate ka hehna le ka thangpaihna hanga ka thah ding misisa luang tawh a kidim ding hi. Hih khuapi gitlohna khempeuh hangin ka maitang ka seel ding hi.

6 “‘Ahi zongin tua khua ah cidamna puakin ka damsak dinga; ka mite damsakin kilemna kicing nuamsa-in ka ngaihmuangsak ding hi. 7 Keimah in a saltanna ^{▼▼33.7 Ahikeh Judah le Israel mailam hun a ngei a bang ding hi.} panun Judah le Israel ka lakhia kik dinga, a saltan ma uh ka bangsak kik ding hi. 8 Kei tunga hong bawl uh mawhna ka siangsak dinga, kei hong langdona khempeuh uh ka maisak ding hi. 9 Tua ciangin hih khuapi in ama tunga na hoih ka bawlte a za minam khempeuh mai-ah hong minthangsak, hong lungnuamsak hong phatin hong pahtawi dinga; a tunga ka piak vangphatna le lemna hangin lau-in a ling ding uh hi,’ ci hi. ^c

10 “‘Hih in TOPA gen ahi hi: Hih mun tawh kisai-in, “Hih mun in mihing ganhing omlohna a kinusia gamtul ahi hi,” na ci uh hi. Tua hi napi kuama tenlohna Judah khuapite le Jerusalem kongzingte ah mihing ganhing om kikin 11 lungdamna le kipahna awging, zi nei thakpa le mothaknu aw le TOPA inn a, lungdamkoh biakna puaktote awging kiza kik dinga, ^d

“TOPA hoih ahi manin ^e
Thahatpen TOPA tungah lungdam ko un;
ama itna kip tawntung hi,” a ci ding uh hi.

Ahang in, mailam hunah gamsung a ngei ka bangsak ding hi,’ TOPA in ci hi. ^f

12 “Thahatpen TOPA gen hih ahi hi: ‘Mihing ganhing omlohna hih mun - khuapite khempeuh ah tuucingte tuucin nading lonona mun le tuuhonte khawl nading mun a om kik ding hi. 13 Mualtung khuapite, nitumna-lam zang le kham kicin, Negev, Benjamin gam, Jerusalem kima khuaneute le Judah khuapite ah tuuhonte a simpa khut nuai-ah a pai kik ding uh hi, ‘TOPA in ci hi. ^g

14 “‘Judah innkuan le Israel innkuan tunga ka thuciam ka tangtunsak hun hong tung ding hi, TOPA in ci hi. ^h

15 “‘Tua ni, tua hun ciangin
David gui pan a thumaan Hiang khat ka selkhiasak dinga, ⁱ
amah in thumaan thutangin na a sem ding hi.
16 Tua ni ciangin Judah kihonkhia dinga, ^j
Jerusalem lungmuangtakin teng ding hi.
A kisap nading min: ^{▼▼33.16 Ahikeh amah
,} ^l
‘TOPA Eite Thumaanna’ kici ding hi. ^m

17 Ahang in, hih in TOPA gen ahi hi: David in Israel innkuante kumpi tokhom tunga tu ding mi a kibansam ngei kei ding hi. 18 Ka mai-ah a kizom suakin meihal biakna pia ding, an-a biakna hal ding le kithoihna pia dingin a ding den ding Levi mi siampi a kibansam ngei kei ding hi,’ ci hi,” a ci hi. ⁿ

19 Jeremiah tungah TOPA thu tunga: 20 “Hih in TOPA thugen ahi hi: Nang in sun le zan amau hun ciangtan banga hong tun nawn loh nadingin sun tawh ka thukhun le zan tawh ka thukhun na siatsak theih leh 21 tua ciang bekin ka nasempa David tawh ka thukhun le - keima mai-a siampi nasem Levi-te tawh ka thukhun - kisia thei pan dinga, David in ama tokhom a luah ding suan le khak a nei kei pan ding hi. 22 Keimah in ka nasempa David suante le ka mai-a biakna nasem Levi-te mite, a kisim zo lo vana aksi zah le a kiteh zo lo tuipi gei-a sehnel zah ka phasak ding hi,’ ci hi,” a ci hi.

23 Jeremiah tungah TOPA thu tunga: 24 “Hih mite in,’TOPA in a teelsa kumpi-gam nihte ^{▼▼33.24 Ahikeh innkuante} nial hi,’ a cih uh phawk nawn lo na hi hiam? Amaute in tua bangin ka mite simmawh uh a, minam in zong a sim nawn kei uh hi. 25 Hih in TOPA gen ahi hi: ‘Sun le zan tawh ka thukhun kipsak nai loin, van le lei tawh ka thukhamte a khosak nai lo hileng, 26 ka nasem Jacob le David suan le khakte ka nial dinga, Abraham Isaac le Jacob suante a uk dingin a tapate lakah khat ka teel kei ding hi. Ahang in, a mailam hun ^{▼▼33.26 Ahikeh amaute salsuahna panin puak kik ding} uh a ngei ka bangsak dinga, amaute ka khuatuah ding hi,’ ci hi,” a ci hi. ^q