aJer 18:8; 26:3; Jnh 3:8
bJer 32:12; Eze 2:9
c2Kh 20:3
d1Ku 17:3
e1Ku 22:8
f4; Pk 34:1

Jeremiah 36

Jeremiah’ Laizial Jehoiakim in Halsak

1Judah kumpipa Josiah tapa Jehoiakim kumpi a suah a kum lina kumin hih TOPA thu Jeremiah tungah a tung hi: 2“Laizial khat la inla Josiah kumpi a suah kum nang kong hopih kipata kipan tuni dong Israel, Judah le minam dangte tawh kisai ka gen khempeuh gelh in. 3Judah mite in amau tunga tunsak dinga ka ngim siatna khempeuh a zak uh ciangin amau gitlohna pan kihei kha ding uh a, tua ciangin amau gitlohna le amau mawhna ka maisak kha ding hi,” a ci hi. a

4 Tua ciangin Jeremiah in Neriah tapa Baruch sam a, TOPA in ama tungah a gensa khempeuh Jeremiah in sitin Baruch in laizial tungah a gelh hi. 5Tua ciangin Jeremiah in Baruch kiangah, “Kei hong kikhakcip hi, TOPA biakinnpi ah ka pai thei kei hi. 6Tua ahi ciangin antan ni khatin TOPA inn ah va pai inla laizial sunga na gelh kong sit TOPA kammalte mite zakin va sim in. Amau khuapi tek pana hong lut Judah mi khempeuh zakin va sim in. 7Hih mite tunga TOPA zaksak a hehna le a thangpaihna lian ahi manin TOPA mai-ah amaute thumin a gitlohna panun a kikhel kha thei ding uh hi,” a ci hi. b

8 Neriah tapa Baruch in kamsangpa Jeremiah gen bangin na khempeuh hih a; laizial sunga TOPA kammalte, TOPA biakinnpi sungah a sim hi. 9Josiah tapa Judah kumpipa Jehoiakim kumpi a suah zawh a kum ngana, a kha kuana kha-in Jerusalem a mi khempeuh le Judah khuapite a hong paite in TOPA mai-ah an a tan nadingun thu kizasak hi. 10Huang tungnungpen sunga om biakinnpi Kongpi Thak a lutna-a thuvanpipa Shaphan tapa Gemariah omna inndei panin TOPA biakinnpi sunga om mi khempeuh zakin laizial sunga Jeremiah kammalte Baruch in a simkhia hi. c

11 Gemariah tapa, Shaphan tapa Micaiah in laizial sunga TOPA kammal khempeuh a zak khit ciangin 12kumpi inn sung thuvanpipa inndei a ulian khempeuh a tutkhawm laitakun a va paisuk hi. Tua lai-ah thuvanpipa Elishama, Shemaiah tapa Delaiah, Acbor tapa Elnathan, Shaphan tapa Gemariah, Hananiah tapa Zedekiah le ulian dang khempeuh a om uh hi. 13Baruch in laizial pana thute mipi tungah a sim a za khempeuh Micaiah in maute tungah a gen khit ciangin, 14ulian khempeuh in Cushi tapa, Shelemiah tapa, Nethaniah tapa Jehudi sawlin Baruch kiangah, “Mipi zaka na sim laizial hong tawi inla hong pai in,” a cisak uh hi. Tua ciangin Baruch in a khutah laizial tawikawma amaute omna ah a pai hi. 15Amaute in, “Hehpihna-in tu inla ko zakin zong hong sim dih in,” a ci uh hi.

Tua ciangin Baruch in amaute zakin a sim hi. 16Amaute in hih thute a zak uh ciangin lau-in khat le khat ki-en uh a, Baruch kiangah, “Hih thute khempeuh kumpipa ka zaksak uh kul ding hi,” a ci uh hi. 17Tua ciangin amaute in Baruch kiangah, “Hih teng na bangci gelh hiam? Jeremiah hong gen bangbanga na gelh ahi hiam, hong gen dih in?” ci-in a dong uh hi.

18 Baruch in, “Himah hi, hihte khempeuh amah in hong genin, ken laizial tungah laitui-a ka gelh ahi hi,” ci-in a dawng hi.

19 Tua ciangin uliante in Baruch kiangah, “Nang le Jeremiah pai unla va bu un. Na omna uh kuamah theisak kei un,” a ci uh hi. d

20 Thuvanpipa Elishama inn sungah laizial a koih khit uh ciangin huang sunga kumpipa kiangah pai uh a, thu khempeuh a va zasak uh hi. 21Kumpipa in laizial la dingin Jehudi sawla, Jehudi in thuvanpipa Elishama inndei pan la-in kumpipa le a gei-a ding uliante khempeuh zakin a sim hi. 22A kha kuana kha hi a, kumpipa a phalbi inn sungah tu-in a mai-ah meibung awi-a a tut laitak ahi hi. 23Jehudi in laizial khawk thum khawk li khawng a sim khit simin kumpipa in laitheite temta khatin atkhia pahpah a, laizial buppi a bei dong mei-ah a khul hi. 24Hih thute a za kumpipa le a nasemte lautuak het lo uh a, a puan uh zong a balkek kei uh hi. 25Elnathan, Delaiah le Gemariah-te in kumpipa in laizial a haltum loh nadingin a khoh uh hangin amaute thu a mang kei hi. 26A man sangsikin kumpipa in laithei Baruch le kamsangpa Jeremiah man dingin kumpipa tapa khat Jerahmel, Azriel tapa Seraiah le Abdeel tapa Shelemiah a sawl hi. Ahi hangin TOPA in amaute a seel hi. e

27 Jeremiah gen banga Baruch in a gelhsa thute omna laizial kumpipa in a haltum khit ciangin Jeremiah tungah TOPA thu tunga: 28“Laizial dang khat la inla Judah kumpipa Jehoiakim haltumsa laizial masapen sunga thu khempeuh gelh kik in. 29Judah kumpipa Jehoiakim tungah zong gen inla, ‘Hih in TOPA gen ahi hi: Nangmah in laizial haltumin, “Bang hangin Babylon kumpipa hong pai pelmawh dinga, hih gam susia-in mihing ganhing thatmang khin ding hi, ci na hi hiam?” 30Tua ahi ciangin Judah kumpipa Jehoiakim tawh kisai TOPA thugen hih ahi hi: Amah in David kumpi tokhom tunga tu ding mi khat beek nei lo dinga; ama pumpi kilawnkhia-in sunin nisa lak le zanin daingo lakah a kipaidak ding hi. 31Amaute gitlohna hangin amah le a tate le a nasemte dan ka tuaksak dinga; amaute in ka thu ngai lo ahi manin amaute tung, Jerusalem a tengte le Judah mite tungah tunsak dinga ka zaksaksa gimnate ka tungsak ding hi, ci hi,’ ci-in va genin,” a ci hi.

32 Tua ciangin Jeremiah in laizial dang khat la a, Neriah tapa laitheipa Baruch pia-in Judah kumpipa Jehoiakim in mei-a a khultumsa laizial-a thu khempeuh Jeremiah gen bangin a gelh hi. Tuate sungah a kibang kammal tampi a kibehlap hi. f

Copyright information for ZomZIV